Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
34 Псалом
Давидлӧн псалом.1 Дӧсвидзисьӧ, лэбтісь ны вылӧ,
кӧдна ме вылӧ лэбтісисӧ,
пессьы мекӧт пессиссезкӧт.
2 Босьт сайӧвтча́нтӧ
*а да кӧрт кышӧттӧ
*б,
сувт меным отсавны.
3 Кыскы шыпурттӧ,
ме сьӧрӧ вӧтчиссезлісь туйнысӧ пӧднав.
Менам ловлӧ висьтав:
«Тэнӧ Мездісьыс ─ Ме».
4 Ась рожа куля́нӧдз усясӧ да гӧрдӧтасӧ нія,
кӧдна мӧдӧны менчим лолӧс босьтны.
Ась бӧр бергӧтчӧны нія,
кӧдна мӧдӧны меным лёксӧ керны.
Отирыс ась пондӧны ны вылын серавны.
5 Нія ась лоӧны тӧлӧн нуӧтӧм бус кодьӧсь,
кӧр Енлӧн ангел нійӧ вашӧтас.
6 Дӧсвидзисьлӧн ангел ась вӧтчӧ ны сьӧрӧ,
нылӧн туйныс ась лоӧ пемыт да нильыг.
7 Нем умӧльыс абу ме сайын,
а нія менӧ кутны кыйся́н сайӧвтісӧ,
лолӧс босьтны яма гарйисӧ.
8 Нылӧн ола́ныс видзчисьтӧг ась орӧ.
Менӧ кутны сайӧвтӧм кыйся́нӧ асьныс ась шедӧны,
гарйӧм ямаас кувны ась усьӧны.
9 А менам лолӧ гажмас, пондас гажӧтчыны,
менам эд эм Дӧсвидзись.
Сія менӧ мездӧ.
10 Быдӧс лыэзӧ менам шуасӧ:
«Дӧсвидзись, эм разь кинкӧ Тэ кодьыс?
Тэ вынтӧмсӧ мездан вына дынісь,
умӧля олісьсӧ да корисьсӧ ─ мырддись дынісь».
11 Лэбтісисӧ ме йылісь вӧвлытӧмсӧ висьтавліссез,
мый ме ог тӧд, сійӧ юасьӧны.
12 Бурсӧ керӧ́мӧ понда умӧльнас вештісьӧны,
ме чунь ӧтнам кольччи.
13 Нылӧн шогалӧ́м коста
ме пасьтасьлі тӧждіся́н паськӧмӧ,
ны понда кӧслуна́лі-тшыгьялі да кейми.
Кӧр менам кеймӧ́м сьӧрті Еныс эз сетлывлы отсӧтсӧ,
14 сэк ме тӧжді ны понда
кыдз ёрт понда али вон понда.
Ме ветлӧті гажтӧм чужӧ́ма, юрӧс ӧшӧтӧмӧн,
жыв мам понда герьяси.
15 А кӧр ме падмывлі,
нія ӧтлаӧ ӧксьывлісӧ да гажӧтчисӧ.
Видіссез ӧксьывлісӧ,
менӧ дугдывтӧг умӧльтісӧ,
ачым ог тӧд мый понда.
16 Ылӧтлісь згальниккезкӧт
*в нія пиннезнысӧ йирисӧ ме вылӧ
*г.
17 Дӧсвидзисьӧ, дыр я Тэ пондан видзӧтны эта вылӧ?
Нылӧн лёк керӧ́ммезісь мезды менчим лолӧс,
этна леввез дынісь мезды менӧ,
менам ола́нӧ эд ӧтік.
18 Уна чукӧртчӧм отир коласын ме Тэнӧ сьылӧта,
Тэнат ӧксьӧм отир одзын ме Тэнӧ ошка.
19 Эн сет серавны ме вылын нылӧ,
кӧдна немись лэбтісисӧ ме вылӧ.
Ась озӧ кваркышалӧ синнэзнаныс ӧтамӧдныслӧ нія,
кӧдна ме вылӧ видзӧтны озӧ вермӧ,
ме сайын эд умӧльыс нем абу.
20 Нія озӧ баитӧ лӧня олӧ́м йылісь,
а баитчӧны умӧльсӧ керны му вылас лӧня оліссезлӧ.
21 Нія ӧммезнысӧ паськӧтлӧны, меным горӧтлӧны:
«Сідз, сідз!
Мийӧ асланым синнэзӧн быдӧс адззылім!»
22 Дӧсвидзисьӧ, Тэ эд быдӧс адззылін,
эн чӧв!
Дӧсвидзисьӧ, эн мун ме дынісь!
23 Дӧсвидзисьӧ, менам Енӧ, лэбтісь!
Сувт веськыта чулӧтны судтӧ
да менӧ дорйы!
24 Дӧсвидзисьӧ, менам Енӧ,
судит менӧ веськыта,
медбы нія ме вылын эзӧ сералӧ.
25 Сьӧлӧманыс ась озӧ пыртӧ:
«Бур, [бур]! Быдӧс петіс миян сьӧрті».
Ась озӧ шуӧ: «Мийӧ сійӧ ньылыштім».
26 Ась рожа куля́нӧдз усьӧны нія,
кӧдна гажӧтчӧны мекӧт умӧльыс петӧ́мсянь.
Отирыс ась сералӧны ны вылын,
кӧдна ме одзын асьнысӧ лэбтӧны.
27 Ме дор сулаліссез видзчисьӧны,
кӧр менӧ Еныс дорьяс.
Нія ась гажмӧны, гажӧтчӧны
да дугдывтӧг шувлӧны:
«Вына Дӧсвидзисьыс!
Сія сетӧ Аслас раблӧ лӧнь ола́нсӧ».
28 Ме понда висьтасьны
Тэнат веськыта керӧ́ммез йылісь,
быд лун понда ошкыны Тэнӧ.
*а 34:2 сайӧвтча́н ─ щит
*б 34:2 кӧрт кышӧт ─ броня
*в 34:16 згальник ─ насмешник
*г 34:16 йирны пиннез кинкӧ вылӧ ─ злыться, угрожать
Глава 34
