Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
35 Псалом
1 Сьыліссезӧн веськӧтлісьлӧ. Псаломыс Давидлӧн, Дӧсвидзись раблӧн.2 Ентӧг олісь мортлӧн сьӧлӧмас
умӧль керӧ́мыс
*а шушкӧ керны умӧльсӧ.
Енісь полӧ́мыс сылӧн абу.
3 Умӧль керӧ́мыс куньӧм сылісь синнэсӧ.
Сія оз адззы ассис лёк керӧ́мсӧ.
Аслас лёк керӧ́мсянь сійӧ оз вуктӧт.
4 Сы ӧмись петӧм кыввес ─ бӧбӧтчӧ́м да ылӧтлӧ́м,
сія оз мӧд вежӧрсявны,
медбы керны бурсӧ.
5 Нельки ольпасяс куйлікӧ
сія юрас пыртӧ керны умӧльсӧ,
сувтӧ умӧль туй вылӧ,
лёк керӧ́мсис оз бергӧтчы.
6 Дӧсвидзисьӧ,
Тэнат небыт сьӧлӧмсянь керӧ́ммет ─ енӧжӧдз,
Тэнат быльыт ─ кымӧррезӧдз!
7 Тэнат веськыта керӧ́мыт вылын керӧсся вылынжык,
веськыта судитӧ́мыт пыдӧстӧм саридзся пыдынжык.
Дӧсвидзисьӧ, Тэ отир да пода сьӧрын видзӧтан.
8 Енӧ, кытшӧм дона Тэнат небыт сьӧлӧмсянь керӧ́мыт!
Отирыс Тэнат борддэз увтӧ дзебсисьӧны.
9 Нія пӧтӧны Тэнат керкуись сетӧм сёя́нӧн,
Тэ юкталан нійӧ Аслат чӧскыт ваӧн.
10 Ола́ныс эд Тэсянь визывтӧ,
Тэнат югдӧтӧ́мсянь мийӧ адззам югытсӧ.
11 Дӧсвидзисьӧ,
и одзлань ло небыт сьӧлӧма Тэнӧ тӧдіссез дынӧ,
сӧстӧм сьӧлӧмаэзлӧ мыччав веськыта керӧ́мтӧ.
12 Асьсӧ лэбтісь мортлӧн кокыс
ась оз тальччы ме вылӧ,
умӧльсӧ керисьлӧн киыс
ась оз вашӧт менӧ.
13 Лёк кериссез усисӧ му вылас,
нійӧ уськӧтісӧ кок вылісь,
нія озӧ вермӧ чеччыны.
Ошкӧ́м.
*а 35:2 умӧль керӧ́м ─ грех
Глава 35
