Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
32 Псалом
[Давидлӧн псалом.]1 Веськыта оліссез,
гажӧтчӧ, тіян эд эм Дӧсвидзись!
Сӧстӧм сьӧлӧмаэзлӧ лӧсялӧ ошкыны Дӧсвидзисьсӧ.
2 Ошкӧ Дӧсвидзисьсӧ гусли вылын,
сьылӧ Сылӧ дас сиа орса́н
*а вылын!
3 Сьылӧ Сылӧ виль сьыланкы́в,
сьылӧ Сылӧ басӧка,
Сійӧ горӧн ошкӧ!
4 Дӧсвидзисьлӧн кылыс эд быль,
Сія быдӧс керӧ веськыта.
5 Сія радейтӧ быльсӧ да веськыта судитӧ́мсӧ,
муыс тырӧм Сылӧн небыт сьӧлӧмсянь керӧ́мӧн.
6 Дӧсвидзись кылӧн аркмисӧ енӧжжез,
Сы лолыштӧ́мӧн ─ быдӧс, мый эм енӧжас.
7 Саридззезісь ваэсӧ Сія ӧктіс чукӧррезӧ,
пыдын ваэсӧ пуктіс видзаніннэзӧ.
8 Дӧсвидзисись ась полӧ быдсӧн муыс,
Сы одзын ась зэгсьӧны му вылын оліссес быдӧнныс.
9 Сылӧн висьталӧ́мыс лоис,
Сылӧн тшӧктӧ́мыс аркмис.
10 Дӧсвидзись разьӧ ентӧдтӧммезлісь баитчӧ́ммесӧ,
отиррезлісь ─ юраныс пыртӧ́ммесӧ.
[Ӧксуэзлісь баитчӧ́мсӧ Сія вайӧтӧ абутӧмӧдз.]
11 А Дӧсвидзисьлӧн туйдӧтӧ́ммес пыр олӧны,
Сы сьӧлӧмись петӧм висьталӧ́ммес
айезсянь челядьлӧ пыр вуджӧны.
12 Шуда сія отирыс,
кӧдналӧн Еныс ─ Дӧсвидзись.
Шуда сія отирыс,
кӧдӧ Дӧсвидзись бӧрйис Аслыс.
13 Дӧсвидзись енӧжсянь видзӧтӧ,
Сія адззӧ быдӧс отирсӧ.
14 Аслас юрала́н пукӧ́с вывсянь
Сія видзӧтӧ му вылын быд олісь вылӧ.
15 Сія аркмӧтіс сьӧлӧммесӧ нылісь быдӧнныслісь.
Сія тӧдӧ нылісь быдӧс керӧ́ммесӧ.
16 Ӧксусӧ оз мезды сылӧн ыджыт воин чукӧр,
вына морт оз вермы дорйыны асьсӧ ыджыт выннас.
17 Вӧв оз отсав мезмыны,
оз мезды сылӧн ыджыт выныс.
18 Но Дӧсвидзись видзӧтӧ ны сьӧрын,
кӧдна полӧны Сыись
да надейтчӧны Сылӧн небыт сьӧлӧм вылӧ.
19 Сія нійӧ кулӧ́мись видзас,
тшыгьяла́н кадӧ нійӧ вердас.
20 Миян ловным надейтчӧ Дӧсвидзись вылӧ:
Сія миянлӧ Отсасись да миянӧс Сайӧвтісь.
21 Миян эм Дӧсвидзись,
сійӧн миян сьӧлӧмным гажӧтчӧ.
Сылӧн вежа ним вылӧ эд мийӧ надейтчам.
22 Дӧсвидзисьӧ,
ло миян дынӧ небыт сьӧлӧма,
мийӧ эд Тэ вылӧ надейтчам.
*а 32:2 дас сиа орса́н ─ десятиструнный инструмент
Глава 32
