Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
24 Псалом
Давидлӧн псалом.1 Дӧсвидзисьӧ, ме Тэныт ассим сьӧлӧмӧс осьта.
2 Менам Енӧ, Тэ вылӧ надейтча.
Ме ась ог лок рожа куля́нӧдз,
ась озӧ гажӧтчӧ ме вылӧ лэбтісьӧммес.
3 Тэ вылӧ надейтчиссезлӧ оз ло рожа куля́ныс.
Рожа куля́ныс лоас нылӧ,
кӧдна озӧ олӧ Тэнат Туйдӧ́т сьӧрті,
мортлӧ умӧльсӧ керӧны, кӧть и нем понда.
4 Дӧсвидзисьӧ, мыччав меным Ассит туйетӧ.
Велӧт менӧ ветлӧтны Аслат туйез кузя.
5 Туйдӧ́т менӧ Аслат быльӧ да велӧт менӧ,
Тэ эд менӧ мездӧтісь Ен.
Ме быд лунӧ Тэ вылӧ надейтча.
6 Дӧсвидзисьӧ, уськӧт тӧдвылат
Ассит небыт сьӧлӧмсянь керӧ́мтӧ да радейтӧ́мтӧ.
Тэнат эд нія пырсяӧсь.
7 Дӧсвидзисьӧ,
томся умӧль да лёк керӧ́ммезӧс
эн касьтывлы.
Но Аслат небыт сьӧлӧмсянь уськӧт менӧ тӧдвылат,
Тэ эд бур Ен!
8 Дӧсвидзисьыс бур да веськыта Олісь,
сійӧн умӧль кериссесӧ Сія бур туй вылӧ петкӧтӧ.
9 Раммесӧ Сія веськыта овны туйдӧтӧ,
Аслас туйез кузя ветлӧтны велӧтӧ.
10 Дӧсвидзисьлӧн быдӧс туйес
бурӧсь да быльӧсь нылӧ,
кӧдна Сылісь ныкӧт керӧм йитӧ́тсӧ
*а да Сылісь тшӧктӧ́ммесӧ сьӧлӧманыс видзӧны.
11 Дӧсвидзисьӧ, Аслат ним понда
простит менчим ыджыт умӧль керӧ́мӧс.
12 Кин олӧ Дӧсвидзисись полӧмӧн,
Сія сылӧ мыччалас, кытшӧм туй бӧрйыны.
13 Сылӧн ола́нас быдӧс лоас тырмӧмви,
сы увтырлӧ дӧнзяс Енлӧн кӧсйӧм му.
14 Дӧсвидзисьыс Ассис тӧдлытӧмсӧ
*б сетӧ тӧдны Сыись поліссезлӧ,
нылӧ Ассис керӧм йитӧ́тсӧ осьтӧ.
15 Менам синнэзӧ пыр видзӧтӧны Дӧсвидзись вылӧ,
Сія эд менчим коккезӧс кыйся́нісь мездӧтӧ.
16 Видзӧт ме вылӧ да ло ме дынӧ небыт сьӧлӧма,
ме эд чунь ӧтнам, сьӧлӧм шогӧ личкӧ.
17 Сьӧлӧм шогӧ менам содіс,
петкӧт менӧ умӧльсис.
18 Видзӧт, кыдз ме песся-мырся, садьӧ бырис.
Простит менчим быдӧс умӧль керӧ́ммезӧс.
19 Видзӧт, кытшӧм унаӧн ме вылӧ лэбтісисӧ!
Ме вылӧ лӧгалӧ́мсянь нія кучиксиныс петӧны.
20 Мезды менӧ, видз менчим ола́нӧс,
медбы эзӧ сералӧ ме вылын,
кӧр Ме Тэ вылӧ надейтча.
21 Менӧ ась видзӧны
сӧстӧма олӧ́мӧ да веськыта керӧ́мӧ,
ме эд Тэ вылӧ надейтча.
22 Енӧ, мезды Израиль отирсӧ быд шогсьӧ́мись
*в!
*а 24:10 йитӧ́т ─ завет
*б 24:14 тӧдлытӧм ─ тайна
*в 24:22 шогсьӧ́м ─ скорбь
Глава 24
