Библия
Выбрать язык
Книги Ветхого Завета
Книги Нового Завета
с русским текстом
ПСАЛТЫР
18 Псалом
1 Сьыліссезӧн веськӧтлісьлӧ. Давидлӧн псалом.2 Енӧжыс висьтасьӧ Енлӧн югьяла́н вын йылісь.
Сы киӧн керӧ́ммез йылісь енвевт
*а юӧртӧ.
3 Ны йылісь лун юӧртӧ лунлӧ,
ой висьтасьӧ ойлӧ.
4 Он адззы сэтшӧм кыв, сэтшӧм баитӧ́м,
кытӧн эз бы кыв нылӧн шыыс.
5 Нылӧн шыыс му пасьта горалӧ,
кыввезныс енӧжжез дорӧдз локтӧны.
Сэтчин Еныс керис шонділӧ оланін.
6 Сэтісь шондіыс петӧ,
кыдз гӧтрасись зон аслас гӧтрася́н жырись.
Котрасьӧ́мын вермасись моз сія гажӧтчӧ,
ассис туйсӧ котӧртны лӧсьӧтчӧ.
7 Сія енӧжас ӧт дорсис петӧ
да мӧд дорӧдззас мунӧ.
Сылӧн шонытыс быдлаӧдз сидзӧ.
8 Дӧсвидзисьлӧн Туйдӧ́тыс быдсӧн бур,
сія лов вынсьӧтӧ.
Дӧсвидзисьлӧн висьталӧ́мыс надейнӧй,
велӧттӧммесӧ мывкыдсьӧтӧ.
9 Дӧсвидзисьлӧн тшӧктӧ́ммес веськытӧсь,
сьӧлӧм гажӧтӧны.
Дӧсвидзисьлӧн велӧтӧ́ммес югытӧсь,
синнэз осьтӧны.
10 Дӧсвидзисись полӧ́мыс сӧстӧм,
сія пыр эм.
Дӧсвидзисьлӧн быдӧс туйдӧтӧ́ммес
быльӧсь да веськытӧсь.
11 Тэнат тшӧктӧ́ммет зарнися
*б донажыкӧсь,
уна сӧстӧм зарнися.
Нія мася чӧскытжыкӧсь,
соттэзісь ма воттезся.
12 Нія видзӧны менӧ ─ Тэнчит рабтӧ.
Ны сьӧрті олӧ́м понда меным дӧнзяс ыджыт козин.
13 Кинкӧ казялас разь ассис умӧль керӧ́ммесӧ?
Сӧстӧмт менӧ умӧль керӧ́ммезісь,
кӧднӧ ме тӧдтӧг кери.
14 Тӧдӧмӧн умӧльсӧ керӧ́ммезісь видз ассит рабтӧ,
медбы нія эзӧ вермӧ менӧ.
Сэк ме сайын оз ло умӧль керӧ́мыс,
ме лоа сӧстӧм,
ог лэдзчись умӧльсӧ керны.
15 Дӧсвидзисьӧ,
менам кыввезӧ да юрын видзӧ́мӧ
ась лоасӧ Тэныт сьӧлӧмви!
Тэ менам чорыт из керӧс да Мездӧтісь!
*а 18:2 18:2 енвевт ─ небо, твердь
*б 18:11 зарни ─ золото
Глава 18
