Bible Stories
Выбрать язык
Choose Old Testament Story
Choose New Testament Story
СИЗЬЫМ СЮТЭМ АРЪЁС
Сизьым ар ортчыса, быдэс музъем вылэ сютэм улон вакыт вуиз. Вань кунъёсысь адямиос Египетэ Иосифлэсь няньзэ басьтыны лыктылӥзы, уго со Египетысь вань городъёсы тырмыт юнянь дасяз.
Египетын нянь вань шуыса кылэм бераз, Иаков дас пиоссэ отчы нянь басьтыны келяз, бордаз покчи пизэ, Вениаминэз, гинэ кельтӥз. Египет музъемын Иосиф кивалтӥсь вал бере, со ик вань калыклы нянь но вузаз. Агайёсыз дораз вуизы но, няньзэ вузаны курыса, музъемозь йыбырттӥзы. Иосиф агайёссэ тодмаз, нош соос сое ӧз тодмалэ. Вынзэс вузам бере, соос со сярысь номыр но ӧз ни кылэ, ӧз но тодэ макем со сӥё-дано ужась луиз шуыса. Иосиф соосты тодымтэ улэ аналскиз, шуиз, тӥ, пе, Египетлэсь ляблыкъёссэ лушкемен чакланы-эскерыны лыктӥды. Агай-вынъёс сеськизы*а, ми, пе, чылкыт сюлэмо адямиос, одӥг атайлэн нылпиосыз; вань, пе, милям гуртамы кылем одӥг покчи вынмы. Иосиф соосты пытсэтэ ворсаны косӥз. Куинь нунал ортчыса, со агайёсызлы шуиз: «Зэмзэ но тӥ чылкыт сюлэмо адямиос ке, тӥ пӧлысь одӥгез татчы мед кылёз, нош мукетъёсыз, сютэм улӥсьёстылы нянь нуыса, гуртазы мед мынозы. Собере, верам кылдэс оскымон карон понна, татчы покчи вындэс вае, соку мон оско та кунэ тӥ урод малпанъёстэк лыктӥды шуыса».
Соку агай-вынъёс ог-огзылы шуизы: «Зэм ик, та асьмелэн вынмес вузам сьӧлыкмы выламы вуиз. Асьмеос адӟимы, кызьы со курадӟиз, мед жаляломы вал шуыса, кӧня сюлвориз, нош асьмеос сое санэ ӧм понэ». Иосиф соослэсь вераськемзэс вала шуыса, соос ӧз тодэ, уго агай-вынъёс соин берыктӥсь пыр вераськизы. Соослэсь вераськемзэс кылэм бераз, бӧлет сьӧры потыса, Иосиф бӧрдыны кутскиз. Берен лыктыса, со косӥз одӥгзэс, Симеонэз, Египетэ кельтыны, нош мукетъёссэ, пуйыоссэс (мешокъёссэс) нянен тырмытыса, гуртазы келятӥз.
Улон-вылон 41:54-57; 42:1-25
*а Сеськыны – танӥськыны; шонертэм вераны.
74 
