Bible Stories
Выбрать язык
Choose Old Testament Story
Choose New Testament Story
ДЫШЕТСКИСЬЁСЛЭН СВЯТОЙ ДУХЕН ТЫР ЛУОНЗЫ
Иисуслэн Инме ӝутскем интыысьтыз, Елеон гурезьысь, Иерусалиме берытскем беразы, апостолъёс Лушкем Ӝытан ортчытэм коркалэн бадӟым палаз пыризы. Отын соос кышномуртъёсын огазьын, Иисуслэн Анаеныз Марияен ӵош ялан вӧсяськыса улӥзы. Иуда интые, пус чӧлтыса, апостолъёс радэ бырйизы Матфиез.
Аранэз быдтэм бере, Быдӟымнуналлэн (Пасхалэн) витьтонэтӥ нуналаз, Витьтонэтӥ нунал (Пятидесятница) праздник ортчыку, ваньзы дас кык апостолъёс огазьын пуко вал. Малпамтэ шорысь, инмысь кужмо сильтӧллы укшась куара кылӥськиз. Пукон корка пушказы пырыса, со куара кужмо шуккиськиз. Соос доры тыллы укшась, люкылӥськись кылъёс лыктыса, ваньзы вылэ одӥген-одӥген пуксьылӥзы. Ваньзы Святой Духен тыр луизы но мукет кылъёсын вераськыны кутскизы, со кылъёсты соос азьвыл уг тодо вал.
Нош со виын инбам улысь вань калыкъёс пӧлын мур осконэн вӧсяськыса улӥсь иудейёс Иерусалиме лыктэмын вал. Та куара кылӥськем бере, татчы трос адямиос лыктӥзы, абдразы соос: уго котькудзы но соос апостолъёслэсь асьсэлэн кылынызы вераськемзэс кылӥзы. Паймыса ог-огзылэсь юалляськизы: «Та вераськисьёс ваньзы ик Галилеяысь ӧвӧла? Нош кызьы бен ваньмы таослэсь асьмелэн вордскем кылынымы вераськемзэс кылӥськомы?.. Инмарлэн быдӟым ужъёсыз сярысь асьме кылын верамзэс кылӥськомы!»
Тросэз паймыса юалляськизы: «Мар таӵе та?» Нош куд-огез серекъяса, исамес карыса шуизы: «Соос ческыт вина юыса кудӟиллям».
Апостолъёслэн ужъёссы 1:12-26; 2:1-13
444 
