Bible Stories
Выбрать язык
Choose Old Testament Story
Choose New Testament Story
ИИСУСЛЭН НИКОДИМЕН ВЕРАСЬКОНЭЗ
Фарисейёс пӧлын иудейёслэн Никодим нимо одӥг кузёйырзы вал. Со уин Иисус доры лыктыса шуиз: «Равви (Дышетӥсь)! Ми тодӥськомы, Тон Инмар дорысь лыктэм Дышетӥсь луиськод шуыса. Уго таӵе паймымон ужъёсты, кудъёссэ Тон лэсьтӥськод, нокин но лэсьтыны уг быгаты, соин ӵош Инмар ӧз ке луы». Иисус солы шуиз: «Зэм ик, зэм ик тыныд верасько: кин вылӥысен ӧз ке вордӥськы, Инмар Эксэйлыкез адӟыны уз быгаты». Соку Никодим Солы шуэ: «Пересь луыса но, кызьы адями быгатэ выльысен вордӥськыны?» Иисус солы тазьы ответ сётэ: «Зэм ик, зэм ик тыныд верасько: кин вулэсь но Духлэсь ӧз ке вордӥськы, со уг быгаты Инмар Эксэйлыке пырыны. Лулмугорлэсь вордӥськемез лулмугор луэ, нош Духлэсь вордӥськемез, дух луэ. Эн паймы Мынам тыныд верамелы: тӥ вылӥысен вордӥськыны кулэ».
Никодим та веранэз ӧз вала, со юаз: «Кызьы озьы луыны быгатоз?» Иисус солы шуиз: «Кызьы кыр дуннеысен Моисей кыез ӝутэм, озьы ик ӝутӥськемын луыны кулэ Адями Пи*а но. Нокин но Солы оскись мурт медаз быры, солэн быронтэм улонэз мед луоз. Инмар сокем дуннеез яратӥз, Аслэсьтыз одӥг вордӥськем Пизэ сётӥз, одӥгез но Солы оскись мурт медаз быры, солэн быронтэм улонэз мед луоз шуыса. Уго Инмар Аслэсьтыз Пизэ дуннее дуннеез судить карыны ӧз лэзьы. Со пыр дунне мед утиськоз шуыса, Сое дунне вылэ лэзиз. Солы оскись мурт судэ уг сюры, нош оскымтэ мурт судэ сюремын ни, малы ке шуоно, Инмарлэн огназ вордӥськем Пиезлы ӧз оскы».
Иоаннлэсь Ӟеч Ивор 3:1-21
*а Адями Пи – та нимын Иисус Ассэ нимаз.
322 
