Choose Language
Old Testament Books
New Testament Books
1Та толэзьлэн кызь ньылетӥ нуналаз Израильысь вань пиос, визяса, бышкись дӥськут дӥсяса, йыр вылазы пень пызьнаса, огазе люкаськизы.2Соку Израильлэн кидысэз мурт калык выжыослэсь люкиськиз, султӥзы но сьӧлыкъёссы понна ӧпкелизы, атайёссылэн йыружъёссы понна но.3Ас интыязы сылӥзы но нуналлэн ньылетӥ люкетэз ӵоже Инмарзылэн Кузё-Инмарлэн законэныз книгаез лыдӟизы, ньылетӥ люкетсэ сьӧлыкъёссылэсь ӧпкельыса куштӥськылӥзы, Инмарзылы Кузё-Инмарлы йыбыртъяса улӥзы.4Левитъёслы лэсьтэм ӝужыт интые султӥзы: Иисус, Вания, Кадмиил, Шевания, Вунний, Шеревия, Вания, Хенани. Соос, бадӟым куара поттыса, Инмарзылы Кузё-Инмарлы вазиськылӥзы.5Левитъёс – Иисус, Кадмиил, Вания, Хашавния, Шеревия, Годия, Шевания, Петахия шуизы: «Султэлэ, вапумъёсысь вапумъёсы улӥсь Инмардэс Кузё-Инмарез данъялэ. Мед данъялозы данолэсь дано, котькыӵе данъянлэсь, ушъянлэсь вылӥ нимдэ!»
6[Соку Ездра шуиз:] «Кузё-Инмаре, – Тон одӥг. Тон инбамез, инъёслэсь инъёссэс кылдытӥд, соослэсь вань ожгарчиоссэс, музъемез но мар со вылын вань, зарезьёс но мар соос пушкын вань, ваньзэ соосты Тон улэп возиськод но Инмысь вань ожгарчиос Тыныд йыбыртто.
7Инмаре Кузё-Инмаре, Тон Ачид Аврамез бырйид но Халдеяысь Ур карысь сое поттӥд, солы Авраам ним сётӥд,8адӟид, солэн сюлмыз Тон азьын оскиськымон луэ шуыса, соин сӥзён-косон пыр кусып кылдытӥд солы но, солэн выжыезлы но хананейёслэсь, хеттейёслэсь, аморрейёслэсь, ферезейёслэсь, иевусейёслэсь, гергесейёслэсь музъемзэс сётон понна. Тон сётэм кылдэ быдэстӥд, уго Тон шонерлыкез яратӥсь Инмар.9Тон адӟид Египетын атайёсмылэсь курадӟемзэс, Горд Кам зарезь дорын тэльмырыса бӧрдэмзэс кылӥд,10фараон вылын, солэн вань ляльчиосыз, солэн музъемысьтыз вань калык азьын паймымон ужъёс, паймымон тодметъёс возьматъяд, уго Тон тодӥд, соос атайёсмес ултӥяса возизы, та дырозьлы Тон Аслэсьтыд нимдэ дано карид.11Тон соос азьын зарезез шортӥз ӵогыса вайяд но, соос зарезь шортӥ, кӧс азьтӥ, потӥзы, соос сьӧры уйиськыса мынӥсьёсты мур вуэ, зол бызись вуэ куштэм изэз кадь сэрпалтӥд.12Нуназе соосты Тон пилем юбо бӧрсьын нуид, уйин – тыл юбо бӧрсьын, мыноно сюрес вылзэс югдытыса нуид.13Тон Сӥнай гурезе васькид но инмысен соосын вераськид, соослы шонер суд лэсьтон сётӥд, шонер законъёс сётӥд, ӟечесь пуктон-косонъёс, курон-косонъёс сётӥд.14Аслэсьтыд святой субботадэ, курон-косонъёстэ возьматӥд, Моисей ляльчиед пыр пуктон-косонъёстэ, закондэ тодытӥд.15Сютэм улыкузы, инмысь няньдэ Тон сётылӥд, сюзы куасьмыса улыку, из пушкысь ву поттылӥд но соослы косон сётӥд, мыныса музъемез мед киултозы, кудзэ Тон, кидэ ӝутыса, соослы сётыны кылдэ верад.
16Нош соос, атайёсмы но вогъяськыса улӥзы, чыртыоссэс куасаллятэк возизы, Тынэсьтыд курон-косонъёстэ санэ ӧз понэ;17тэрытскемзы ӧз поты, соослы возьматэм паймымон ужъёстэ тодазы ӧз вае, чыртыоссэс чурытомытыса возизы, асьсэлэн вог сямзыя асьсэлы азьветлӥсь пуктӥзы нош ик ляльчи луон радэ берытскон понна. Но Тон, сьӧлыкъёсты куштыны яратӥсь Инмар, ӟечлыко, гажась-жалясь, кема чидась, трос жалясь Тон, соосты ӧд кушты.18Кисьтыса-ӵыжатыса соос асьсэлы ошпи лэсьтӥзы но ”тани тынад Египетысь поттэм инмаред” шуизы ке но, озьы соос Тонэ туж сантэмазы ке но,19нош Тон Аслад туж бадӟым гажан-жалянэд ванен соосты кыр дуннее огназэс ӧд кельты; нуназе соос дорысь пилем юбо ӧз кошкылы соосты сюрес кузя валтон понна, уйин тыл юбо мынон сюрессэс югдытыса улӥз.20Соослы Тон визьнодан понна Аслэсьтыд ӟеч Духтэ сётӥд, ымдурысьтызы маннадэ но Тон ӧд басьтылы, сюзэс юзматон понна соослы ву сётылӥд.21Ньыльдон ар ӵоже Тон соосты кыр дуннеын сюдыса возид; номырлы но соос ӟудыса ӧз улэ, дӥськутсы ӧз пӧсьтылы, пыдъёссы ӧз тӧрналэ.22Соослы тон эксэйлыкъёсты, калыкъёсты киулазы сётӥд, люкылӥд, соос Сӥгон музъемез, Есевон эксэйлэсь музъемзэ но, Васан эксэйлэсь Оглэсь музъемзэ но киултӥзы.23Соослэсь пиоссэс инмысь кизилиос мында карид, соослэн атайёссылы ”лыктыса ас киулады басьтоды” шуэм музъемад соосты пыртӥд.24Соослэн пиоссы пыризы но музъемез ас киулазы басьтӥзы. Та музъемын улӥсьёсты, хананейёсты, Тон соос киулэ сётӥд, тэрытскись карид, эксэйёссэс но, та музъемын улӥсь калыкъёсты но, мар каремзы потэ соосын, мед карозы ас тодэмзыя.25Юнматэм каръёсты, удалтӥсь музъемез киулазы басьтӥзы, трос ваньбурен пачылмем коркаосты, из пушкы гудӟем ву возён интыосты, виноград бакчаосты, вӧйпу садъёсты, сиыны ярамон емышо трос писпуосты киултӥзы. Тынад туж бадӟым ӟечлыкеныд соос сиизы, кӧтсэс тыризы, куайизы, майбыр улӥзы,26вог сямоесь луизы, Тыныд пумит кариськизы: Тынэсьтыд законъёстэ кулэтэм каризы, пророкъёстэ виылӥзы, кинъёс косо вал соосты Тон пала берытскыны, туж трос сантэман ужъёс лэсьтӥзы.27Соку Тон соосты тушмонъёссылэн киулазы сётӥд, соос соосты ӝикатыса возизы. Ӝикаса улон дыръязы соос Тыныд вазиськылӥзы, Инмысен Тон соосты кылзылӥд, Аслад туж бадӟым гажан-жалянэд ванен соослы утисьёс сётылӥд, соос тушмонъёссылэн киулысьтызы соосты утьылӥзы.28Нош буйгатскем беразы Тынад азяд нош ик лек ужъёс лэсьтылыны кутскизы, соку Тон соосты тушмонъёссылэн киулазы сётылӥд, соосын соос кузёяськыса улӥзы. Соос нош Тыныд тэльмырыса вазиськылӥзы, нош Тон Инмысен куриськемзэс кабыл басьтылӥд, Аслад бадӟым гажан-жалянэныд трос пол Тон соосты шугадӟонъёслэсь мозмытылӥд.29Тон соослы тодазы вайытылӥд, законэд пала мед берытскозы шуыса, нош соос вогъяськизы, Тынэсьтыд курон-косонъёстэ санэ ӧз понэ, пуктон-косонъёсыдлэсь палэнскылӥзы, – соосты быдэсъясал ке, адями соин улыны быгатысал; сюрлызэс чурытомытӥзы, чыртызэс чурыт возизы, ӧз кылзӥське.30Ас палад берытскемзэс возьмаса, трос аръёс ӵоже соосты вӧсь карыны ӧд дырты, пророкъёсыд пыр Аслад Духеныд соослы тодазы вайытылӥд, нош соос ӧз кылзӥськылэ. Соку Тон соосты мурт калыкъёслэн киулазы сётӥд.
31Но Аслад туж бадӟым гажан-жалянэд ванен пумозяз соосты ӧд быдты, кулэтэм ӧд карылы, уго Тон ӟечлыко, гажась-жалясь Инмар.32Али но, Инмармы, быдӟым Инмармы, кужмо но кышкыт, сӥзён-косонэз но гажан-жалянэз утись! Ассириялэн эксэйёсыз дорысен кутскыса туннэ нуналозь ми доры, эксэйёсмы доры, кивалтӥсьёсмы, священникъёсмы, пророкъёсмы, атайёсмы, вань калыкед доры вуэм курадӟонъёс Тон азьын пичиесь медаз адӟиське вал.33Ми доры вуэм вань шугадӟонъёс понна Тон шонерлыко, уго Тон ваньзэ шонер лэсьтӥд, нош ми – янгышоос.34Милям эксэйёсмы, кивалтӥсьёсмы, священникъёсмы, атайёсмы законъёстэ ӧз быдэсъялэ, соослы тодазы вайытылэм курон-косонъёстэ но, тодэ вайытонъёстэ но санэ ӧз понэ.35Асьсэлэн эксэйлыказы Тынад сётэм туж трос ваньбурен улыкузы, соослы люкыса сётэм паськыт, удалтӥсь музъемын улыкузы, соос Тыныд ужаса-тыршыса ӧз улэ, урод ужъёссылэсь ӧз палэнскылэ.36Но тани, ми али – ляльчиос; атайёсмылы сётэм музъемад, солэн емышеныз, ӟечлыкеныз кӧтмес тырыса улэм интые, ляльчи радын улӥськомы.37Аслэсьтыз будэтэм емышъёссэ со троссэ эксэйёслы вае, сьӧлыкъёсмы понна соослэн киулазы Тон милемыз сётӥд. Милям мугорынымы, пудо-животэнымы соос кызьы мылзы потэ, озьы кузёясько, милемыз туж ёртыса-ӝикатыса возё.38Со понна ик ми ӧрекчаськытэк юн-юн кылмес сётӥськомы но гожтӥськиськомы, гожтӥськем выламы кивалтӥсьёсмылэн, священникъёслэн, левитъёслэн печатьсы нюртэмын».
Глава 9
