Bible Stories
Выбрать язык
Choose Old Testament Story
Choose New Testament Story
ИУДЕЙЁСЛЭН ПЛЕНЫСЬ БЕРЫТСКОНЗЫ
Вавилон, кужмо кун луэм бераз, бускель музъемъёслэсь ваньбурзэс таласа улыны кутскиз. Талам музъемъёс пӧлын ик вал Лымшор Иуда кун но. Отысь калыкез Вавилонэ пленэ нуылӥзы.
Но кужмо Вавилон кунлэн бырон дырыз вуиз. Сое Персияын, Мидияын улӥсьёс киултӥзы. Ӝоген Персиялэн Кир эксэез иудейёслы вордскем шаеразы бертыны лэзиз. Быдэс эксэйлыказ со тазьы ялӥз: «Тазьы шуэ Персиялэн Кир эксэез: Инмысь Инмар, Кузё-Инмар вань эксэйлыкъёсты мынам ки улам сётӥз. Со монэ косӥз Иудаысь Иерусалим каре Аслыз корка пуктыны. Солэн калыкез пӧлысь потэмъёс Иудаысь Иерусалиме мед мынозы но Израильлэн Инмарезлы Кузё-Инмарлы корка мед пуктозы». Вордскем шаеразы ог ньыльдон сюрс еврейёс берытскизы, тросэз соос Иуда выжыысь потэм еврейёс вал. Малпало, соосын ӵош берытскизы Израильлэн мукет дас одӥг выжыосысьтыз но куд-ог адямиос. Но тросэз еврейёс Персиялэн ёросъёсаз улыны кылизы.
Ас музъемазы вуэмзы бере, мукетаз аре израиль калык Иерусалиме люкаськиз, выль храм пуктыны инъет тыриз. Тросэз мӧйы священникъёс, левитъёс, выжыослэн йыръёссы, кинъёс азьвылзэ храмез тодо на вал, выль храмлы кызьы инъет тыриськемез адӟыса, куараен бӧрдӥзы, нош мукетъёсыз, шумпотэменызы, куараен кесяськизы. Шумпотэм куараос бӧрдэм куараосын огазе луыса, кыдёке шуккиськизы.
Выль храмез ӝутонэн кивалтӥз Зоровавель – Иехония эксэйлэн пиезлэн пиез. Нош израиль калыклэн улэм бервылаз интыяськем калыкъёс соосты адӟемпотостэм каризы, храмез пуктонлы люкетӥзы, олокызьы но кышкатъязы, Персиялэн Артаксеркс эксэезлы урттылӥськизы. Дас вить арлы храм пуктонэз ӝегатӥзы.
Кирлэсь храм пуктыны косонзэ Дарий юнматӥз. Эксэйын куатетӥ арзэ пукыкуз, выль храм пуктонэз йылпумъязы.
Ездра, 1-тӥ – 6-тӥ люкетъёс
240 
