Выбрать язык
Choose Old Testament Story
Choose New Testament Story
«Юмо Гавриил Суксым Галилейысе Назарет манме олашке колтен. Тудо Давид тукым гыч Иосиф лӱман пӧръеҥлан сӧрымӧ ӱдыр деке колтымо улмаш. Ӱдырын лӱмжӧ Мария лийын. Суксо Тудын деке пурен да каласен: ”Поро пӱрымашан, йывырте!*а Тый денет Юмо. Ӱдырамашвлак коклаште Тый благословитлыме улат!” А Мария, тудым ужмеке, тыгай мутлан аптыранен да саламлымаш мом ончыкта манын шонкален. Суксо Тудлан каласен: ”Мария, ит лӱд. Тый Юмын порылыкшым налынат. Тый нелемат да Эргым ыштет. Тудлан Иисус лӱмым пуэт. Тудо пеш кугу лиеш да Кӱшнысӧ Юмын Эрге манын лӱмдалтеш. Юмо Тудлан Давид ачажын престолжым пуа. Тудо курымеш Иаков тукымын Кугыжаже лиеш, Тудын кугыжа улмыжлан мучашок лий”.
Суксылан Мария каласен: ”Кузе тиде лийын кертеш? Мый пӧръеҥым ом пале”. Суксо Тудлан вашештен: ”Ӱмбакет Юмын Шӱлыш вола, Кӱшнысӧ Юмын куатше Тыйым леведеш. Санденак шочшаш Аза святой лиеш, Тудым Юмын Эрге манын лӱмдат. Юмын ик мутшат ышталт кертдыме ок лий”. Мария каласен: ”Мый Юмын тарзыже улам. Тек Мыланем ойлымет семынак лиеш”. Суксо Тудын дечкораҥын.»
«Мариян Юмын Шӱлыш деч нелеммыже пале лийын. Мариям марлан налшаш Иосиф, поро да чын ыштыше еҥ лийынат, ӱдырым намысыш пурташ огыл манын, шыпак шӧрлынеже улмаш. Но кунам тидын нерген шонкален, Юмын Суксыжо омешыже кончен да каласен: ”Иосиф, Давид тукым эрге, тыланет сӧрымӧ Мариям шке декет налаш ит лӱд. Тудын кӧргыштӧ илышым налшыже Юмын Шӱлыш деч улеш. Мария Эргым ышта, да тый Тудым Иисус манын лӱмдет, вет Тудо язык деч шке калыкшым утара”».
Иисус лӱм «Юмо утара» манме лиеш.
Лука 1:26-35, 37-38; Матфей 1:18-21
*а «Йывырте» – Библийыште тиде – саламлыме мут.
64 
