Выбрать язык
Choose Old Testament Story
Choose New Testament Story
Икана Иона лӱман аймемылан Юмо тыге каласен: «Кынел да кугу Ниневий олашке кай, тушто тыгай уверым шаре: нунын осал пашашт Мый декем шуын, да Мый нуным мут кучаш шогалтем». Но Иона Юмын кӱштымыжым шукташ кумылзо лийын огыл. Сандене тудо Юмо деч шылын куржаш шонен пыштен. Теҥыз воктенсе олашке шумеке, Фарсисышке кайыше корабльым муын. Оксам тӱленат, тушко шинчын.
Юмо кугу мардежым колтен. Теҥызыште тӱтан нӧлталтын. Корабль изиш гына шаланен огыл. Лӱдмышт дене корабльыште ыштыше-влак чыланат шке юмыштым ӱжыныт, корабльым куштылемдаш шонен, теҥызышке ӱзгарым кышкеныт. Тиде жапыште Иона мален. Вашке корабльыште улшо-влак Ионан шке Господь Юмыжо дечын куржмыжым пален налыныт. Иона нунылан ойлен: «Мыйым корабль гыч теҥызыш кудалтыза, тунам вигак тӱтан лыплана. Мый палем, те тыгай туткарыш мыланем верч логалын улыда». Ионам теҥызыш кудалтеныт, теҥыз тунамак лыпланен. Корабльыште улшо-влак Ионан Юмыжо деч моткоч чот лӱдыныт. Тудыжо кугу китлан Ионам нелаш кӱштен. Кол мӱшкырыштӧ Иона кум кече да кум йӱд чарныде Юмыжлан кумалын. Вара Юмо кугу китлан Ионам серышке пӱргал лукташ кӱштен.
Юмо Ионалан кокымшо гана каласен: «Кынел да кугу Ниневий олашке кай. Тушто мо кӱштымемым увертаре». Тиде ганалан Иона Юмын мутшым колыштын. Ола уремлаште тудо тыге увертарен: «Нылле кече гычын Ниневий ола шалана!» Тидым колын, Ниневийын кугыжаже полатшым коден, кугыжа чиемжым кудашын да ӱмбакыже ойго вургемым чиен. Вара чыла еҥланат, эсогыл вольыкланат тугак чияш, пӱтым кучаш, осал шонымаш да чыла моло языкышт деч утаралташ Юмым сӧрвален кумалаш кӱштен. Оласе чумыр калык Ионам колтышо ик чын Юмылан ӱшанен.
Ниневий калыкын осал паша деч кораҥмыжым Юмо ужын, нуным серлаген да ӱмбакышт шонымо эҥгекшым колтен огыл.
Иона (Книга Пророка Ионы)
60 
