Выбрать язык
Choose Old Testament Story
Choose New Testament Story
Вавилонышто Дарий кугыжа озаланыме годым тушто Даниил лӱман Израиль тукым еҥ илен. Тудо кугыжан полышкалышыже-влак кокла гыч иктыже лийын. Пӱсӧ ушакылан да яндар шӱм-чонан улмыжлан кӧра кугыжа тудым поснак йӧратен да аклен. Господьлан, Израильын Юмыжлан, ӱшанымыжлан кӧра Данииллан шуко нелылыкым чыташыже логалын. Осалым шонышо еҥ-влаклан кӧра тудын илыме элыштыже Юмылан кумалмым икмыняр жаплан чылт чареныт. Туге гынат Даниил умбакыжат Юмылан кумалын. Даниил ӱмбаке вуйым шийыныт. Дарий чот ойганен да Даниилым утараш шонен, но кугыжа семын шке мутшым шукташыже логалын.
Дарий кугыжа Даниилым лев вынемышке кудалташ кӱштен. Тудо пален: Даниилын Юмыжо кугу. Садлан тудо каласен: «Чарныде кумалме Юмет тек тыйым утара!» Вара полатышкыже пӧртылын, кас кочкышым ыштыдеак малаш возын, йӱдвошт мален колтен кертын огыл. Волгалташ тӱҥалме годымак кугыжа лев вынем деке миен да ойган йӱк дене ӱжын: «Даниил, илыше Юмын еҥже! Чарныде кумалме Юмет тыйым лев деч утарен кертын мо?» Даниил вашештен: «Мыйын Юмем Суксыжым колтен. Тудыжо лев-влакын умшаштым петырен. Мый Юмын ончылно титакан омыл, садлан лев-влак мыйым нимат ыштен огытыл».
Даниилын илыше улмыжлан Дарий моткоч куанен да тудым вынем гыч лукташ кӱштен. Даниилын капыштыже, чынже денак, лев тӱкымӧ нимогай палат лийын огыл. Вара Даниилым титаклыше еҥ-влакым вынемышке кудалтеныт. Вынем пундашышке шудеак, лев-влак нуным лулегыштге кӱрыштын пытареныт.
Тидын деч вара кугыжанышын чыла кундемышкыже Дарий серышым колтен. Серышыштыже тудо чыла калыкланат Даниилын Юмыжым шотлаш да пагалаш кӱштен возен.
Даниил (Книга Пророка Даниила) 6:1-28
58 
