Bible Stories
Choose language
Choose Old Testament Story
Choose New Testament Story
ЕН МЫЖДÖ ЕГИПЕТÖС ИЗРАИЛЬ ВÖСНА
Кор Ен петкöдчис Мöисейлы да тшöктiс мунны Египетö фараон дiнö, Мöисей вочавидзис: «Господьöй! Ме сьöкыда сёрнита и шушкыль кывъя. Ысты кодöскö мöдöс!» Сэки Ен шуис Мöисейлы: «Тэнад эм Аарон вок, сiйö Левий котырысь. Сiйö кужö бура сёрнитны. Ме лоа тiянкöд, кор кутанныд сёрнитны, и велöда тiянöс, мый вöчнысö. Аарон кутас сёрнитны йöзыскöд тэ пыдди».
Мöисей да Аарон мунiсны фараон дiнö и шуисны: «Тадзи висьталö Господь, Израильлöн Ен: ”Лэдз Менсьым войтырöс овтöминö пасйыны Менсьым вежа лунöс”». Но фараон шуис: «Кодi сiйö Господьыс, медым ме кывзыси Сылысь да лэдзи Израильöс? Ме ог тöд Сiйöс и Израильöс ог лэдз. Тi, Мöисей да Аарон, сöмын падмöданныд войтырсö уджалöмсьыс. Мунöй да уджалöй». Фараон нöшта на ёнджыка кутiс топöдны Израиль войтырöс и тшöктiс, медым уджöдысьяс содтасны налы уджсö. Уна шензьöданатор Ен вöчис Мöисей пыр фараонлöн син водзын. Но фараонлöн сьöлöмыс вöлi чорыд, и сiйö эз кöсйы лэдзны Израиль войтырöс.
Енмыс чорыда да уна ногöн мыждiс египетса войтырöс: Нил юын ваыс лои вирöн, Египет муын быд керка тыри жабаясöн, мувывса бусысь артмисны гебъяс и найö сапкысисны йöз да пемöсъяс вылö, став Египет му пасьтала петісны курччасьысь лöдзьяс, пöрöс висьöмöн висьмисны пемöсъяс да унаöн кулiсны, йöзыслöн да пемöсъяслöн кучикыс вевттьысис орзьöм мыльясöн, енэжсянь киссис ыджыд шер, уськöдчис саранча да бырöдiс став быдмöгсö, куим лун чöж вöлi сап пемыд Египет му пасьтала.
Фараонлы тшöтш вöлi сьöкыд тайö мыждöмъяссьыс, но сылöн ёнджыка на чорзис сьöлöмыс, и сiйö эз лэдз Израиль войтырöс.
Петöм 4-10
88 
