Bible Stories
Choose language
Choose Old Testament Story
Choose New Testament Story
ТШЫКÖДЧЫСЬЯС СОТÖНЫ АССЬЫНЫС НЕБÖГЪЯСНЫСÖ
Миян кадö уна йöз тунасьöны, тшыкöдчöны, кимöститчöны, нимкывъяс лыддьöны да мукöдтор на вöчöны. Тайö ыджыд мыж, и Ен öлöдö миянöс татшöмторсö вöчöмысь. Важ Кöсйысьöмысь ми лыддям: «Энö тунасьöй да энö тшыкöдчöй» (Мöисейлöн коймöд небöг, Левит 19:26). «Тiян пöвстын некодлы оз позь би пыр нуöдны ассьыс ныв-писö, тшыкöдчыны, тунасьны, кимöститчыны, нимкывъяс лыддьыны, ловъясöс корны да кулöмаяслысь мыйкö юасьны. Господьлы зывöк быдöн, кодi татшöмторсö вöчö» (Мöд Индöд 18:10-12).
Ефес карын апостол Павеллöн буръюöртiгöн Енмыс вöчис уна шензьöданатор. Весиг Павеллысь юр чышъянсö да мукöд паськöмсö пуктывлiсны висьысьяс вылö, и найö дзик пыр бурдлiсны да пеж ловъяс петалiсны на пытшкысь. Тунасьысь юдейяс пиысь кодсюрö тшöтш пондiсны вöтлавны пеж ловъясöс Господь Исус нимöн. Шуалiсны: «Пет! Тшöктам Исус нимöн, кодöс висьталö Павел». Тадзи тшöтш вöчисны Скева аркирейлöн сизимнан пиыс. Но пеж лов воча шуис: «Исусöс бура тöда, Павелöс тшöтш тöда, а тi кодъяс?» Сэсся пеж лолöн кутöм морт уськöдчис на вылö ыджыд вынöн да вирöдз чашйис найöс. Дзик пасьтöгныс налы ковмис пышйыны сiйö керкасьыс.
Та йылысь тöдмалiсны Ефесын ставныс. Ыджыд полöм босьтiс йöзсö, найö пондiсны ошкыны Господь Исуслысь нимсö. Унаöн эскöм бöраныс волiсны да висьтасисны асланыс лёк уджъясысь. Тшыкöдчысьяс пиысь унаöн вайисны небöгъяснысö да став йöз водзас сотiсны. Небöгъяслöн доныс, артыштiсны да, ветымын сюрс эзысь лои. Тадзи Ефес карын ыджыд вынöн паськалiс да зумыда вужъясис Господьлöн кывйыс.
Апостолъяслöн уджъяс 19:11-20
478 
