Bible Stories
Choose language
Choose Old Testament Story
Choose New Testament Story
РААВ ДЗЕБÖ ИЗРАИЛЬСА КЫЙÖДЧЫСЬЯСÖС
Мöисейлöн кулöм бöрын Ен шуис Навин Исуслы: «Менам Мöисей кесъялысьöй кулiс. Вудж Йöрдан ю вомöн да нуöд Израиль войтырöс сiйö муас, кодöс Ме сета налы. Став мусö, кытчö тувччасны тiян кокъясныд, Ме сета тiянлы, кыдзи Ме кöсйыси Мöисейлы. Некод оз вермы сувтны тэныд паныд став олöм чöжыд. Кыдзи ме вöлi Мöисейкöд, сiдзи лоа и тэкöд. Ме ог эновт и ог коль тэнö. Ло зумыд да повтöм! Ставсö вöч Индöдыс*а серти, кодöс тэныд сетiс Мöисей, Менам кесъялысь. Эн кеж сыысь веськыдвылö ни шуйгавылö, сэки ставыс тэнад лоö бур».
Израильсаяс матöджык и матöджык матыстчисны Ханаан мулань. Ылысянь тыдалiс джуджыд стенöн кытшалöм Ерикон кар. Карсö тöдмалöм могысь Навин Исус мöдöдiс сэтчö кык мортöс. Рытнас найö пырисны Раав нима нывбаба ордö. Сiйö сибöдiс найöс, öд кывлiс шензьöданаторъяс йылысь, кутшöмъясöс Ен вöчис израильсаяслы. Раав шуис: «Ме тöда, мый Господь сетас тiянлы тайö мусö».
Сэтчöс öксылы висьталiсны, карö пö локтöмаöсь израильса кыйöдчысьяс да узьмöдчöмаöсь Раав ордö. Сэки öксы тшöктiс аслас шыпуртаяслы*б кутны найöс. Кор шыпуртаяс локтiсны Раав ордö, сiйö висьталiс, израильсаяс пö мунiсны нин. Сэки шыпуртаяс уськöдчисны вöтöдны найöс.
Ерикон карсö вöлi кытшалöма кык пöвста стенöн. Тайö стенъяс костын вöлi Раавлöн оланiныс. Войнас ортсыса стен öшинь пыр Раав гезйöн лэдзис израильса кыйöдчысьясöс. Сiйö тшöктiс мунны налы керöсö да дзебсьывны сэтчö куим лун кежлö, медым оз паныдасьны на бöрся вöтчысьяскöд.
Навин Исус 1:1-7, 2:1-16
*а Индöд – Божий закон
*б шыпурта – солдат
128 
