Choose Language
Old Testament Books
New Testament Books
1Ортчем дыр Завулон музъемез, Неффалим музъемез покчи кариз;
нош вуоноез дыр вылӥ кароз Зарезь дур сюресэз,
Иордан сьӧр шаерез, язычникъёслэсь Галилея музъемзэс.
2Пеймыт азьтӥ ветлӥсь калык быдӟым югытэз адӟоз;
кулон вужерлэн шаераз улӥсьёс вылэ югыт пиштыны кутскоз.
3Тон калыкез йылэтод, солэсь шумпотонзэ будэтод.
Со Тон азьын шулдыръяськоз,
кызьы аран дыръя шулдыръясько,
кызьы, ваньбур люкыку, шумпото.
4Уго сое ӝикатӥсь сиесэз, сое погыртӥсь корт бодыез,
сое ёртыса возисьлэсь бодызэ –
Тон куашкатод Мадианлэн нуналаз кадь ик.
5Ожгарчилэсь нуллэм пыдкутчанзэ, вирен наштаськем
дӥськутсэ но сутыны сётозы, – тылэз сюдыны.
6Уго асьмелы Нуны вордскиз – асьмелы Пи сётэмын;
Солэн пельпум вылаз – кужымлык;
Сое нималозы: Паймымон, Визь-нод Сётӥсь, Кужмо Инмар,
Пумтэм вапумъёслэн Атайзы, Тупаса улонлэн Эксэез.
7Давидлэн престол вылаз, солэн эксэйлыказ Пилэн кужымлыкез,
тупаса улонэз пумтэм вапумъёсы улоз,
Со эксэйлыксэ шонерлыкен, зэмлыкен юнматоз, кужмоятоз
туннэ но, пумтэм вапумъёслы но.
Саваоф Кузё-Инмарлэн сюлмаськон-тыршонэз тае лэсьтоз.
8Кузё-Инмар Иаковлы вераны кыл ыстӥз,
со кыл Израиль вылын адӟиськоз.
9Вань калык – Ефремын, Самарияын улӥсьёс –
сое тодозы но вылӥ мылкыдын, лек сюлмынызы шуозы:
10«Кирпичъёс пырдӥзы ке, вӧлэм излэсь пуктомы;
сикоморпуосты коразы ке, кедырпуосты мерттомы».
11Соку Кузё-Инмар соос вылэ Рецинлэсь тушмонъёссэ ӝутоз,
тушмонъёсыз кие ожмаськон тӥрлык сётоз:
12шундыӝужанысен – сири калыкез,
шундыпуксёнысен – филистим пиосты ӝутоз;
соос, ымзэс бадӟым усьтыса, Израилез сиёзы.
Со виын Солэн вожпотонэз уз на быры,
Солэн киыз ӝутӥськыса улоз на.
13Нош калык Жугись пала уг берыктӥськы,
Саваоф Кузё-Инмар доры уг лыкты.
14Кузё-Инмар одӥг нуналэ ик
Израильлэсь йырзэ но, быжзэ но уретоз,
пальмаез но, камыш бодыез но ӵогыса куштоз:
15пересь визьнодчи но нимо-дано мурт – со йыр,
нош ӧрекчи дышетӥсь-пророк – со быж.
16Та калыклэн азьветлӥсьёсыз ас калыксэс йыромытозы,
соослэн кивалтэм улсазы ветлӥсьёс бырозы.
17Соин ик Кузё-Инмар Израильлэн егит пиосыз пумысен
шум уз поты,
солэсь анайтэк-атайтэк кылем нылпиоссэ но,
палкышнооссэ но уз жаля;
уго ваньзы соос – чеберъяськисьёс, лек муртъёс,
ваньзылэн ымъёссы урод кылъёс верало.
Та вакытэ Солэн вожпотонэз уз на быры,
Солэн киыз ӝутӥськыса улоз на.
18Законлы пумит улон тыл кадь кенжиз,
со тёрнпуэз но, бышкись куакез но ньылэ,
нюлэслэн ӵем интыяз гомаса ӝуа, – ӵын юбоос вылӥе ӝутско.
19Саваоф Кузё-Инмарлэн бадӟым йыркурез музъемез ӵушкалоз,
калык тыл сиёнлы пӧрмоз;
адями аслэсьтыз агай-вынзэ уз жаля.
20Бурпалтӥз вандылозы – но сютэм кылёзы;
паллян палзэ сиыны кутскозы – но кӧтсы уз тыры;
котькудӥз ас суйбыгытэзлэсь сӥльзэ сиыны кутскоз:
21Манассия – Ефрем выжыез, нош Ефрем Манассия выжыез сиёз,
кыксы но, огазе кариськыса, Иудаез сиёзы.
Со виын Кузё-Инмарлэн вожпотонэз уз на быры,
Солэн киыз ӝутӥськыса улоз на.
Глава 9
