Choose Language
Old Testament Books
New Testament Books
1Кузё-Инмар мыным шуиз: «Аслыд бадӟым тӧдьы пул басьты но со вылэ адямиослы валамон пусъёсын гожты: Магер-шелал-хаш-баз*а».2Мон ас бордам оскиськымон адӟисьёсты басьтӥ: Урия священникез но Варахиялэсь Захария пизэ.
3Кышноелы, азьпал тодытӥсьлы, матаз кариськи но, со секытэн луиз, пи нуны вайиз. Кузё-Инмар мыным шуиз: «Солы ним сёт: Магер-шелал-хаш-баз;4уго пичи нуны ”атае”, ”анае” шуыны быгатэмлэсь азьло Дамасклэсь узырлыксэ, Самарияысь талам ваньбурез Ассирияысь эксэйлэн азьпалтӥз нуозы».
5Веранзэ азинтыса, Кузё-Инмар мыным шуиз на:
6«Та калык Сӥлоамлэсь каллен бызись вузэ кулэтэм каремез понна,
Рецинлы но Ремалиялэн пиезлы синмаськемез понна
7Кузё-Инмар со вылэ куашетӥсь бадӟым шуръёслэсь вузэс лэзёз –
Ассириялэсь эксэйзэ данлыкеныз валче –
вань ӧръёсысьтыз со ӝутскоз но яр йылъёсаз пальккаськоз.
8Иудеяетӥ бызёз, сое вуэныз шобыртоз,
вылэ ӝутскоз – чырты кемозь вуоз;
Тынэсьтыд музъемдэ, Еммануил,
пумысеныз пумозяз со бурдыныз шобыртоз».
9Тушмонъяськиськоды ке, калыкъёс, куалекъялэ!
Валатске-кылзӥське, вань кыдёкысь музъемъёс!
Ожмаськон тӥрлыктэс басьтэлэ, но куалекъялэ!
Ожмаськон тӥрлыктэс басьтэлэ, но куалекъялэ!
10Малпанъёстэс малпалэ, но соос куашкалозы;
куспады кенеше, но со уз быдэсмы,
уго Инмар – милемын!
11Мон вылын кужмо кизэ кутыса, та калыклэн сюрестӥз медам ветлы шуыса оскытыса, Кузё-Инмар мыным шуиз:
12«Мае та калык нима ”пумитъяськыны дасяськон” шуыса,
ваньзэ тае эн нималэ, ”пумитъяськыны дасяськон” шуыса;
малэсь со кышка, тӥ солэсь эн кышкалэ, эн но куалекъялэ.
13Саваоф Кузё-Инмарез гинэ, дун-сьӧлыктэм шуыса, сӥлы каре,
Солэсь гинэ курдалэ, Со азьын куалекъялэ!
14Со – Дун-Чылкыт карись,
Со ик Израильлэн кыкезлы но юртэзлы-выжыезлы
канжаськон из но визь сынаськон изгурезь,
Иерусалимын улӥсьёс понна Со – кыӵес но сьӧлтаськон.
15Соос пӧлысь тросэз канжаськыса усёзы но пазьгиськозы,
сьӧлтэтъёсы дэмӟылозы но, соосты кутылозы».
16«Тодытонме-ивортонме биньыса дум,
дышетскисьёсы азьын та Усьтӥськонэз печатен нюрты но ворса».
17Кузё-Инмар вылэ мон оскиськисько, –
Иаковлэн юртэзлэсь-выжыезлэсь Аслэсьтыз ымнырзэ Ватӥсьлы, –
мон Солы оскиськыса улӥсько.
18Тани мон но, мыным Кузё-Инмарен сётэм нылпиосы но,
Сӥон гурезьын улӥсь Саваоф Кузё-Инмарлэн
Израильлы паймымон тодметъёсыз но
азьпаллы тодытонъёсыз ми луиськомы.
19Тӥледлы шуизы ке: «Кулэм муртлэсь лулзэ ӧтисьёслы вазиське, туноослы, ведӥнъёслы, пелляськисьёслы вазиське», – соку тӥ шуэлэ: «Калык аслаз Инмарезлы вазиськыны кулэ ӧвӧл-а? Кулэмъёслэсь улэпъёс сярысь юало-а?20Законлы, Инмарлэн курон-косонъёсызлы вазиське». Соос тазьы уг ке шуо, соку соос бордын югытлык ӧвӧл.
21Соос музъем вылтӥ калгыса ветлозы, мылкыдзы усемын, сютэмесь соос луозы; сютэм дыръязы йыркурен улозы, асьсэлэсь эксэйзэс но Инмарзэс урод кылъёсын куаретозы.22Вылӥе но учкозы, музъем вылэ но учкозы; но адӟозы: котькытын куректон-кайгу, пеймытлык, тём-тём пеймыт; пеймыт азе куштэмын луозы. Но пырак ӵоже отын пеймыт уз луы, кытын али пеймыт луэмын.
*а 8:1 Магер-шелал-хаш-баз – «талан дыртэ, шедьтон-поттон дыртытэ» шуэм луэ
Глава 8
