Choose Language
Old Testament Books
New Testament Books
1Куректон-кайгу шонертэм законъёс поттӥсьёслы,
чурытэсь куронъёс малпасьёслы, –
2соос куанеръёсты шонер судить уг каро,
калыке пӧлысь кужымтэм муртъёслэсь правооссэс талало,
палкышноослэсь басьтоно люкетсэс асьсэлы каро,
анайтэм-атайтэм нылпиосты люкеттэк кельто.
3Кыдёкысь кулон-бырон лыктон нуналэ мар-о кароды?
Юрттэт курыса, кинлы вазиськоды?
Асьтэлэсь узырлыктэс кытчы кельтоды?
4Пытсэтын пукисьёс, виылэмъёс пӧлы тӥ погралоды.
Но со виын Солэн вожпотонэз уз на быры,
Солэн киыз ӝутӥськыса улоз на.
5«Э, Ассур, вожпотонэлэн бодыез!
Солэн киысьтыз сюло – со Мынам йыркуръяськонэ!
6Сьӧлыклэсь кышкамтэ калык вылэ,
вожпотон калыкелы пумит сое ысто,
таланы-тарканы косо, ваньбурзэ мед киултозы,
ульчаысь дэриез кадь сое мед лёгалозы.
7Но со озьы уз малпа, солэн сюлмыз но озьы уз эсэпла:
солэн сюлмаз таӵе малпан луоз – таркано,
троссэ калыкъёсты выжытэк быдтоно.
8Со уго шуоз: ”Ваньмыз эксэйёс мынам кивалтӥсьёсы ӧвӧл-а?
9Халне Кархемис кадь ик ӧвӧл-а? Емаф Арпад кадь ик ӧвӧл-а?
Самария Дамаск кадь ик ӧвӧл-а?
10Сульдэръёслы йыбыртъясь эксэйлыкъёсты мон ас киулам басьтӥ,
кудъёсаз сульдэръёсыз тросгес
Иерусалимын но Самарияын сярысь, –
11соку Самарияен но солэн сульдэръёсыныз-идолъёсыныз кадь ик
Иерусалимен но, солэн вӧлыса лэсьтэм сульдэръёсыныз но
озьы ик уг лэсьты-а?”»
12Тазьы луоз: Кузё-Инмар Сӥон гурезьын но Иерусалимын Аслэсьтыз вань ужзэ быдэстэм бераз шуоз: «Ассириялэн эксэезлэсь вылтӥяськись сюлмызлэн азинлыкез шоры учко, йылэ ӝутэм синъёсызлэн вылтӥяськонзы шоры учко.
13Со шуэ: ”Аслам киылэн кужыменыз,
аслам визьлыкеным мон тае лэсьтӥ,
малы ке шуоно мон визьмо:
калыкъёслэсь улон интызэс вошто, ваньбурзэс талало,
батыр мурт кадь престолъёссы вылысь эксэйёссэс сэрпалто.
14Тылобурдо каръёсты кадь калыкъёслэсь узырлыксэс
мынам киы асэстӥз;
кызьы отчы кельтэм пузъёсты окто,
озьы мон вань музъемез киултӥ,
нокин но бурдыныз ӧз вырты, ымзэ ӧз усьты,
куаразэ ӧз потты”».
15Тӥр быгатэ-а кораськись азьын вылӥе кариськыны?
Бычкы вылтӥяське-а сое кыскась азьын?
Корт боды сое ӝуткасьлы пумит султэ-а?!
Кин писпу ӧвӧл, солы пумит боды ӝутске кадь!
16Со понна Кузё-Инмар, Саваоф Кузё-Инмар куаемъёсыз начармытоз,
нимо-даноосыз куспы тыл аратоз, гомась тыл ӝуатоз.
17Израильлэн Югытэз тыл луоз,
солэн Дун-Сьӧлыктэмез – гомась тыл,
со одӥг нунал куспын солэсь бышкись будосъёссэ,
жаг турынзэ сутоз,
18солэсь данлыко нюлэссэ но садзэ лулысеныз мугорозяз быдтоз.
Со куасьмоз-бызырмоз, кулӥсь мурт кадь луоз.
19Нюлэсказы писпуоссы сокем ӧжыт кылёзы –
пичи мурт но сое лыдъяны-ӵотаны быгатоз.
20Со нуналэ тазьы луоз:
Израильлэн кылем люкетэз, Иаковлэн выжыысьтыз утиськемъёс,
соосты погыртӥсь вылэ азьланяз уз ни оскиське.
Соос чылкыт сюлмынызы оскиськыны кутскозы Кузё-Инмар вылэ,
Израильлэн Дун-Сьӧлыктэмез вылэ.
21Израильлэн кылем люкетэз берытскоз,
Иаковлэн кылемез кужмо Инмар пала берытскоз.
22Израиль, тынад калыкед зарезьысь луо мында ке но луиз,
оглюкетэз гинэ Инмар пала берытскоз;
берытскымтэосты быдтон пуктэмын-дасямын,
тае пачылмем шонерлык дасяз.
23Быдтон дасямын, сое Кузё-Инмар, Саваоф Кузё-Инмар,
быдэс музъем вылын быдэстоз.
24Соин ик тазьы шуэ Кузё-Инмар, Саваоф Кузё-Инмар:
«Сӥонын улӥсь калыке! Ассурлэсь эн кышка.
Со тонэ корт бодыен погыртоз, тон вылэ Египет кадь бодызэ ӝутоз.
25Эшшо ӧжытак, туж ӧжытак гинэ дыр ортчоз,
соку быроз Мынам вожпотонэ,
Мынам йыркуре соосты быдтыны берытскоз».
26Саваоф Кузё-Инмар со вылэ сюлозэ ӝутоз,
Орив изгурезь дорысь Мадианэз быдтон дыръя кадь,
яке кызьы зарезь вылэ кивалтэт бодызэ вӧлъяз но
сое Египет вылэ кадь ӝутоз.
27Со нуналэ тазьы луоз: пельпум вылысьтыд зӥбетэз,
чыртыысьтыд сиесэз басьтэмын луоз;
куаемлы чидатэк, сиесэд куашкалоз.
28Со Аиафе мынэ, Мигронэз ортче,
Михмасэ запас сион-юонзэ кельтэ.
29Ёркыт интыостӥ ортчо; Геваын кӧлон интызы;
Рама куалекъя; Сауллэн Гиваысьтыз пегӟылӥзы.
30Галимлэн нылыз, куараен вуз:
тонэ Лаис мед кылоз, куанер Анафоф!
31Мадменаысь пегӟизы, Гевимын улӥсьёс кошкыны дырто.
32Эшшо одӥг нунал со Новын сылоз на;
Сӥон гурезьлы, Иерусалим вырйыллы киыныз кышкатыса сэзъя.
33Тани, Кузё-Инмар, Саваоф Кузё-Инмар,
туж шимес кужымен писпуос бордысь вайёссэс тӥялоз, –
ӝуждалаенызы вылтӥяськисьёс ӵогыса куштэмын луозы,
ӝужытъёсыз музъем вылэ погыртэмын луозы.
34Нюлэслэсь ӵем интызэ кортэн коралоз;
Ваньмызлэсь Кужмо азьын Ливан погралоз.
Глава 10
