Choose Language
Old Testament Books
New Testament Books
1Озия эксэй кулон арын мон Кузё-Инмарез адӟи; Со ӝужыт, ӝутэм престол вылын пуке вал, Солэн риза дӥсянэзлэн сӧзыосыз быдэс храмез тырмытӥзы.2Солэн котыраз Серафимъёс сылӥзы; соослэн куать бурдзы вал: кыкеныз соос ымнырзэс ворсаллязы, кыкеныз – пыдзэс шобыртылӥзы, кыкеныз – лобазы.3Соос ог-огзылы вазиськылӥзы:
«Дун-Сьӧлыктэм, Дун-Сьӧлыктэм,
Дун-Сьӧлыктэм Саваоф Кузё-Инмар!
Быдэс музъем Солэн данэныз пачылмемын!»
4Вазиськылӥсьёслэн куараоссылэсь капкаослэн йылъёссы зуркаллязы, корка пуш ӵынэн пачылмиз.5Соку мон шуи:
«Куректон-кайгу мыным! Быри мон!
Мон уго кырсь-сьӧлыко ымо мурт,
сыӵе ик кырсь-сьӧлыко ымо калык пӧлын улӥсько, –
мынам синъёсы адӟизы Эксэез, Саваоф Кузё-Инмарез».
6Соку мон доры Серафимъёс пӧлысь одӥгез лобыса вуиз, солэн кияз ӝуась эгыр вал, сое со кискачен курбон тыронысь басьтӥз,7мынам ым бордам йӧтӥськиз но шуиз:
«Тани та тынад ым бордад йӧтӥськиз,
тынад законлы пумит улэмед табере куштэмын, сьӧлыкед ӵушемын».
8Соку мон Кузё-Инмарлэсь верам куаразэ кылӥ: «Кинэ Мыным ыстоно? Кин Асьме понна мыноз?»
Соку мон шуи: «Тани мон, монэ ысты».
9Со шуиз: «Мын, та калыклы вера:
пельыныды кылоды но – уд валалэ;
синмыныды учкоды но – уд адӟе.
10Чурытомемын уго та калыклэн сюлэмыз,
пельынызы но мырдэм кыло,
синъёссэс но кыниллям;
синъёсынызы уз адӟе,
пельёсынызы уз кылэ,
сюлмынызы уз валалэ,
Мон мед бурмытом шуыса,
Мон пала уз но берытске».
11Соку мон шуи: «Кемалы-а, Кузё-Инмаре?» Со шуиз:
«Улон интыоссы тырттэм кыльытозь,
улӥсьёсыз бырытозь, коркаоссы адямиостэк,
музъем чылкак тырттэм кыльытозь.
12Кузё-Инмар адямиосты палэнтоз но,
та музъем чылкак тырттэм кылёз.
13Дасэтӥ люкетэз отчы кылиз ке,
со нош ик куашкатэмын-таркамын луоз;
корам тыпы яке теревинфпу быре,
но выжыез кыле;
святой кидыс выжы лэзьыса кылёз та музъеме».
Глава 6
