Choose Language
Old Testament Books
New Testament Books
1Гажано Эшелы Гажано Эшелэсь Солэн виноград садэз сярысь
кырӟанзэ кырӟаны кутскисько.
Мынам Гажанэлэн виноград садэз удалтӥсь гурезь йылэ мерттэмын.
2Сое Со кенерен котыртӥз, изъёслэсь сузяз,
быръем виноградпудъёс отчы мерттӥз, шораз каланча пуктӥз,
вина виятон гу гудӟиз но солэсь ӟеч емыш сётэмзэ
возьмаса улыны кутскиз,
нош со кӧш мульыос сётӥз.
3Табере, Иерусалимын улӥсьёс но Иудалэн пиосмуртъёсыз,
Мынам виноград садэ пумысен, Мон пумысен
асьтэлэсь чакламдэс-эскеремдэс вералэ.
4Виноград садэлы лэсьтонозэ мае эшшо ӧй на лэсьты?
Мон возьмай солэсь ӟеч пурыос ваемзэ,
нош со кӧш мульыос сётӥз? Малы озьы луиз?
5Озьыен, Мон тӥледлы верало, мар карыны кулэ виноград садэным:
кенерзэ октӥ ке, сое таркалозы;
борддоръёссэ куашкатӥ ке, сое лёгаса куштозы.
6Утялтытэк сое возё: кӧс вайёссэ уз вандылэ,
котырзэ уз гудӟе-небӟытэ, –
жаг турынъёс, бышкись будосъёс сое ӝокатозы,
пилемъёслы со вылэ зор вузэс кисьтыны уг лэзьы.
7Саваоф Кузё-Инмарлэн виноград садэз – со Израиль выжы,
Иудалэн пиосмуртъёсыз – Солэн яратоно мерттосъёсыз.
Шонер суд луоз шуыса, Со витиз, но тани вир кисьтӥськон кутскиз;
шонерлыкез витиз, но тани викышъяса бӧрдон вуиз.
8Куректон-кайгу тӥледлы, корка вӧзы корка пуктӥсьёслы,
бусы вӧзы бусы ватсасьёслы; озьы, мукетъёслы инты уг кыльы,
музъем вылын тӥледлы одӥгнадылы гинэ улыны инты кулэ кадь.
9Мынам пелям вераз Саваоф Кузё-Инмар:
«Та пумтэм-йылтэм трос коркаос тырттэм кылёзы,
бадӟымесь, чебересь коркаос улӥсьёстэк кылёзы.
10Виноград садысь дас анаос одӥг бат гинэ вина сётозы;
хомер кизем ю но одӥг ефа сяна уз сёты, дыр».
11Куректон-кайгу вазь ӵукна ик вина утчаса ветлӥсьёслы,
бер ӝытозь соос асьсэзыз винаен пӧсекъято;
12цитра, крезь, тимпан, чипчирган куараос
вина юон пӧлазы чузъясько;
нош Кузё-Инмарлэн ужъёсыз шоры соос уг учко,
Солэн киосызлэн ужъёсыз сярысь уг малпасько.
13Со понна мынам калыке малпамтэ шорысь пленэ сюроз,
солэн кузёйыръёсыз сютэм улозы,
узыръёсыз сюзы куасьмыса, пашмыса улозы.
14Со понна дунне пыдэс паськытаз, ад ымзэ туж паськыт усьтӥз:
соос асьсэлэн данэнызы, узырлыкенызы валче отчы усёзы,
куашетыса-шулдыръяськыса улӥсьёс, –
но ваньмыз, мар соосты шулдыртэ, адэ пырозы.
15Йырзэ ошоз адями, зӥбыт-востэм луоз воргорон;
вылӥ мылкыдоослэн синъёссы лапкалозы.
16Нош Саваоф Кузё-Инмар судын вылӥе ӝутскоз;
Святой Инмар Аслэсьтыз Дун-Сьӧлыктэм луонзэ
шонерлыко суд пыр возьматоз.
17Ыж уллёос эркын ветлозы,
узыръёслэн кельтэм буй-буй турыно возьвылъёсазы
соос кӧтсэс тырозы.
18Куректон-кайгу алекъяськыса улон пыр
вылазы сьӧлык басьтӥсьёслы,
уробо бордысь еэз кадь соос вылазы законлы пумит улонэз кыско.
19Соос шуо: «Со мед дыртоз, Аслэсьтыз ужзэ мед ӝогомытоз, –
тае ми мед адӟомы;
Израильлэн Дун-Сьӧлыктэмезлэн малпанэз матэ мед лыктоз,
быдэсмыны мед кутскоз, – тае ми мед тодомы!»
20Куректон-кайгу соослы, кинъёс уродлыкез ӟечлык шуо,
ӟечлыкез уродлык шуо,
пеймытэз югыт шуыса нимало, югытэз пеймыт шуыса лыдъяло,
кузялэз – ческыт, ческытэз кузял шуо!
21Асьсэлэн син азязы асьсэлы визьнодоесь потӥсьёслы
куректон-кайгу,
асьсэды визьмоесь шуыса лыдъясьёслы.
22Куректон-кайгу вина юонын батыръёслы,
кудӟытӥсь юонъёс дасяны быгатӥсьёслы.
23Соос кузьым понна янгыш муртэ шонере потто,
нош шонер улӥсьёсты янгыше уськыто!
24Со понна, кызьы тыл куроез сие, ӝуась тыл турынэз быдтэ,
озьы ик соослэн выжызы сисьмоз но сяськазы тузон кадь пазяськоз;
малы ке шуоно Саваоф Кузё-Инмарлэсь законзэ палэнтӥзы,
Израильлэн Дун-Сьӧлыктэмезлэсь кылзэ кулэтэм каризы.
25Со понна Кузё-Инмарлэн вожпотонэз Ас калыкез вылэ ӝуатскоз,
со вылэ Со кизэ ӝутоз но сое куашкатоз – соку гурезьёс ик зуркалозы,
пудо сӥть кадь ульчаосын шӧйёс лошъяськозы.
Ваньмыз та луыку, Солэн вожпотонэз уз быры,
Солэн киыз ӝутӥськыса улоз на.
26Кыдёкын улӥсь калыкъёслы знамя ӝутоз,
музъем пумын улӥсь калыклы тодмет сётоз,
соку со капчиен, ӝог лыктоз.
27Солэн жадем муртэз но, катьтэммемез но уз луы;
одӥгез но уз нырулы, умме уз усьы,
кускысьтыз еэз но басьтэмын уз луы,
пыдкутчанысьтыз еэз но уз чигиськы;
28ньӧлъёсыз лэчытэсь каремын, вань пукыӵъёсыз золтэмын;
валъёсызлэн пыдтышъёссы чурыт излы укшало,
солэн поглянъёсыз – сильтӧл кадесь,
29солэн бурсэмез – мумы левлэн бурсэмез кадь;
левпилэн вузэмез кадь вузыны кутскоз,
мылессэ кутоз но нуоз, нокин но сое уз тала.
30Куашетӥсь зарезьлэн шаугетэмез кадь со нуналэ со вылэ бурсоз;
музъем шоры учкоз но, отын – пеймыт, куректон-кайгу,
пилем югытэз кысӥз.
Глава 5
