Choose Language
Old Testament Books
New Testament Books
1Тани Кузё-Инмар, Саваоф Кузё-Инмар,
Иерусалимез, Иудаез пыкъяськон бодытэк, утиськонтэк кельтоз,
вань люкам ю-няньзэс, вузэс талалоз;
2кышкасьтэм азьветлӥсез но ожгарчиез, судьяез но пророкез,
азьпалзэ адӟисез но пересь визьнодчиез,
3витьтон ожгарчиен кивалтӥсез но кузёйырез,
визь-кенеш сётӥсез но визьлыко лэсьтӥськисез,
кыллы усто муртэ сэрпалтоз.
4Пинал пиосты соослы кузёйыр карыса пукто,
пичи пиос соосын кузёяськозы.
5Калык пушкын одӥгез адями мукетызлы пумит султоз,
огзэс огзы сантэмалозы;
быдэ вуымтэ пи пересь мурт азьын ассэ вылӥе пуктоз,
огшоры адями кивалтӥсьёслы уз тэрытскы.
6Атай юртысь выныз агаез борды ӝабырскоз но шуоз:
«Тынад дӥськутэд вань, милемлы азьветлӥсь лу,
та куашкам-ёмрам улонэз ас киулад басьты».
7Нош со чурыт кылзэ вералоз:
«Калыклэсь висёнзэ бурмытыны уг быгатӥськы;
мынам дорам няне но, дӥськутэ но ӧвӧл;
калыклы азьветлӥсь монэ эн каре».
8Тазьы куашказ Иерусалим, усиз Иуда,
малы ке шуоно соослэн кылзы но, соослэн ужзы но
Кузё-Инмарлы пумит мынӥзы,
Солэн быдӟым данлыкез азьын соос адӟемпотостэмесь вал.
9Ымнырзылэн выросъёсыз соосты шарае поттэ, –
Содомын улӥсьёс кадь ик асьсэлэн сьӧлыксы сярысь соос
возьдаськытэк верало:
куректон-кайгу та лулъёслы!
Уго асьсэлы асьсэос уродлыкез-лекез бичало.
10Шонер улӥсь шудо,
уго со ас ужам ужезлэсь емышъёссэ сиыса улоз;
11нош законлы пумит улӥсь доры куректон-кайгу вуоз,
ас киыныз лэсьтэм ужъёсыз понна солы пунэмез берыктӥськоз.
12Пичи пиналъёс Мынэсьтым калыкме ӝикатыса возё,
кышномуртъёс соин кузёясько.
Калыке Мынам! Тынад азьветлӥсьёсыд тонэ йыромыто,
тынэсьтыд ветлон сюрестэ мыдлане кожытӥзы.
13Кузё-Инмар судэ султӥз, калыкъёсты судить карыны ӝутскиз.
14Ас калыкезлэн тӧроосызлы, кивалтӥсьёсызлы пумит
Кузё-Инмар судэ султэ:
«Виноград садме тӥ таркады;
куанер муртлэсь талам ваньбур тӥляд коркаосады пыртэмын.
15Малы тӥ Мынэсьтым калыкме ёртыса возиськоды,
куанеръёсты ултӥяськоды?» –
Кузё-Инмар, Саваоф Кузё-Инмар, шуэ.
16Кузё-Инмар шуиз:
«Сӥонлэн нылъёсыз укыр вылтӥяськисесь,
соос йырзэс, чыртызэс урдыса ветло,
синъёсынызы кырмышъяса пиослэсь мылкыдзэс лӧпкытъяло,
моторъяськыса вамышъяло,
пыдъёсысьтызы чингылиосын жингыртыса ветло, –
17Сӥонлэн нылызлэсь йыртышсэ Кузё-Инмар гольык кельтоз,
возьдаськон интызэс Кузё-Инмар кыре поттоз».
18Со нуналэ Кузё-Инмар талалоз пыдысьтызы чебересь жильыоссэс, кизилилы но толэзьлы укшась чеберъянъёссэс,19пельугыоссэс но весьёссэс, шонан-сэзъянъёссэс, йыр керттэтъёссэс, пыдысьтызы чингылиоссэс, духи тыронъёссэс, син усёнлэсь утись ошылэтъёссэс,20зундэсъёссэс но нырысьтызы кульчооссэс,21кильтрес дӥськутсэс – улысьсэ но, вылысьсэ но; кышетъёссэс но янчикъёссэс,22тӧдьы буртчин дэремзэс, пӧртэм керттэтъёссэс но шобретъёссэс-сюлыкъёссэс.23Ческыт зын интые кӧш зын потоз, кускерттон интые гозы луоз, бабыльтэм-кудьыртэм йырси интые гольык инты кылёз, паськыт буртчин дэрем интые сюбег бышкись чурыт ӟустари дӥськут дӥсяно луозы, чеберъян интые пус пуктэмын луоз.
24Воргоронъёсыд тӥр-пурт улэ погралозы,
кышкасьтэм ожгарчиосыд ожын бырозы.
25Карлэн капкаосыз ӝуштылозы,
бӧрдылозы;
со тырттэм сылоз музъем вылын.
Глава 3
