Choose Language
Old Testament Books
New Testament Books
1Иудея но Иерусалим сярысь Амослэн Исаия пиезлы адӟон дыръя верамын вал:
2Берпуметӥ аръёсы Кузё-Инмарлэн коркаезлэн гурезез
вань гурезьёслы йыр каремын луоз,
вань вырйылъёслэсь вылӥе ӝутскоз,
но вань калыкъёс со доры вистэм-вожтэм трос кузя лыктозы.
3Трос калыкъёс лыктыса шуозы:
«Ойдолэ, Кузё-Инмарлэн гурезяз тубоме,
Иаковлэн Инмарезлэн корказ пыроме,
Аслаз сюресъёсызлы Со асьмеды дышетоз,
соку асьмеос Солэн сюрестӥз ветломы;
Сӥонысь закон потоз,
Иерусалимысь Кузё-Инмарлэн кылыз вӧлмоз».
4Со калыкъёслэсь кусыпъёссэс тупатоз,
трос выжыослэсь шекъёссэс-уродлыкъёссэс шарае поттоз.
Мечъёссэс усы-геры лэсьтыны ӵыжатозы,
шибодыоссылэсь сюрло лэсьтозы:
калык калыклы пумит мечсэ уз ни ӝуты,
азьланяз ожмаськыны уз ни дышетске.
5Эй, Иаковлэн юртэз! Ваелэ, Кузё-Инмарлэн югытаз уломе.
6Но Тон Аслэсьтыд калыктэ, Иаковлэсь юртсэ, палэнтӥд,
малы ке шуоно со шундыӝужанпал калыкъёслэсь
адӟем карыса улыны кутскиз;
филистим калыклэн кадь ик солэн но туно-пеллёосыз вань,
мурт калык пиосын кусып возьыса, со улыны кутскиз.
7Солэн музъемез зарниен но азвесен тырмиз,
ваньбурез солэн лыдъяса быдтонтэм луиз;
туж трос валъёсыз йылӥзы,
ожмаськон уробоосыз лыдъяса быдтонтэм луизы.
8Солэн музъемез сульдэръёсын пачылмиз –
соос йыбыртъяло асьсэ киын, асьсэ чиньыосын
лэсьтэм арбериослы.
9Адями возьытэ вуоз, сӥтэм-сантэме кылёз воргорон, –
Тон соослы простить уд кары.
10Изгурезе мыныса, ватӥське Кузё-Инмарлэн кышкыт
вожпотонэзлэсь,
Солэн пиштыса улӥсь быдӟым данлыкезлэсь.
11Адямилэн вылӥ мылкыдын утчаськись синъёсыз лапкалозы,
вылтӥяськыса улонэз сӥтэм-сантэм луонэ кылёз;
со нуналэ одӥг Кузё-Инмар гинэ вылӥ луоз.
12Уго Саваоф Кузё-Инмарлэн нуналэз вуоз но,
вань вылӥ мылкыдоос, вылтӥяськисьёс, адямиослэн вылӥе ӝутэм
муртъёссы сӥтэм-сантэм улонэ усёзы,
13Ливанысь вань ӝужытэсь, вылэ ӝутскись кедырпуос вылэ но,
Васанысь вань тыпыос вылэ но,
14вань ӝужытэсь гурезьёс вылэ но,
вылӥе ӝутскись мувыръёс вылэ но,
15котькыӵе ӝужыт каланча вылэ но,
котькыӵе юнлыко борддор вылэ но,
16Фарсисысь вань корабльёс вылэ,
соослэн вань кельышлы чеберъянъёссы вылэ со нунал вуоз.
17Адямилэн быдӟымлыкез куашкалоз,
адямилэн вылӥлыкез сӥтэм-сантэме кылёз;
со нуналэ одӥг Кузё-Инмар гинэ вылӥ луоз,
18сульдэръёс но чылкак ышозы-бырозы.
19Кузё-Инмар музъемез куашкатыны султэм бере,
Солэсь, Солэн пиштыса улӥсь быдӟым данлыкезлэсь кышкаса,
адямиос гурезьысь изъёслэн висъёсазы,
музъемлэн пыдэстэм гуосаз ватӥськылозы.
20Йыбыртъян понна лэсьтэм аслэсьтыз азвесь сульдэръёссэ,
зарни сульдэръёссэ со нуналэ адями
мудӥсь шыръёс, урткыӵъёс азе куштоз.
21Кузё-Инмар музъемез куашкатыны султэм бере,
Солэсь, Солэн пиштыса улӥсь быдӟым данлыкезлэсь кышкаса,
адямиос гурезьысь изъёс вискы, гурезьысь пасё интыосы
ватӥськылозы.
22Дугдэлэ тӥ адями вылэ оскиськемысь, –
со улэ шоканэз бырытозь гинэ. Кин со адями?
Глава 2
