Choose Language
Old Testament Books
New Testament Books
1Та – Амослэн Исаия пиезлэн Иудеяен Иерусалим сярысь адӟонэз. Со вал Иудей эксэйёслэн Озиялэн, Иоафамлэн, Ахазлэн, Езекиялэн кивалтон нуналъёсазы.
2Инъёс, кылзэ! Музъем, кылзӥськы!
Кузё-Инмар шуэ: «Мон вордӥ, быдэ вуттӥ пиосме,
нош соос мыным пумит бугырскизы.
3Ош аслэсьтыз кузёзэ тодэ, ишак кузёезлэсь турын тыронзэ тодма,
нош Израиль [Монэ] уг тоды, Мынам калыке уг вала».
4Э, сьӧлыко калык, законлы пумит улонэн азэм калык,
сьӧсь муртъёслэн выжызы, быроно нылпи!
Кузё-Инмарез кельтӥзы,
Израильлэсь Дун-Сьӧлыктэмзэ кулэтэм каризы, – мыдлане кошкизы.
5Вогъяськыса улӥсьёс, кытчыяды тӥледыз тышкано на?
Йырды быдэсак гижлоӟемын, сюлэмды быдэсак катьтэммемын.
6Пыдтышкысеныз кутскыса йыртышкозяз висисьтэм интыез ӧвӧл:
гижлоос, шуккиськем бервылъёс, урӟектэм яраос –
соос сузямтэ, биньылымтэ, вӧйын небӟытылымтэ.
7Музъемды тырттэм кельтэмын, городъёсты тылын сутэмын,
син азяды бусыостэс муртъёс сиё;
тушмон ортчем бервыл кадь ваньмыз тырттэм кылемын.
8Сӥон ныл виноград садысь тылыс кадь, бакчаысь балаган кадь,
тушмонэн котыртэм город кадь огназ кылемын.
9Саваоф Кузё-Инмар асьме пӧлы пичи ке но люкет ӧй ке кельтысал,
соку асьмеос Содом кадь ик луысалмы, Гоморралы укшасалмы.
10Содомысь кивалтӥсьёс, Кузё-Инмарлэсь верамзэ кылзӥське!
Гоморраысь калык, асьмелэн Инмармылэсь законзэ санэ понэ!
11Тӥляд трос курбонъёсты Мыным кулэ кожаськоды-а?! –
шуэ Кузё-Инмар. –
Мон тыр луэмын ни ыжъёсты виро сётонэныды,
куайытэм пудодылэн кӧйыныз;
кунянъёслэн но, ыжпиослэн но, кечъёслэн но вирзы
Мыным кулэ ӧвӧл.
12Мынам син азям возьматскыны лыктыкуды,
кин тӥледыз куре Мынэсьтым азбаръёсме лёганы?
13Саламъёстэс-кузьымъёстэс эн ни нуллэ.
Ӵын поттонды Мыным синазькыль потэ;
выль толэзь праздникъёстэс, субботаез сӥлы карыса улэмдэс,
шулдыръяськонлы люкаськемъёстэс адӟеме уг поты:
праздник лэсьтӥськоды, нош асьтэос законлы пумит улӥськоды.
14Выль толэзез сӥлы каронъёстэс но, праздникъёстэс но
Мынам лулы синазькыль каре:
соос Мон понна секыт ныпъет луо, секыт Мыным соосты нуыны.
15Тӥ киостэс ӝутыса улыку, Мон синъёсме тӥ азьысь ворсасько;
нош тӥ котькӧня вӧсяськиды ке но, Мон уг кылы,
уго тӥляд киосты вирен пачылмемын.
16Мисьтӥське, чылкытатӥське.
Мынам син азям урод ужъёс лэсьтэмысь дугдэ,
уродэз-лекез бордысьтыды палэнтэ.
17Ӟеч уж лэсьтыны дышетске, шонер улыны тырше;
ултӥям-сантэмам муртлы дурбасьтэ,
анайтэм-атайтэм нылпилы юрттэ,
палкышнолэн палаз пыре.
18Чале, дорам лыктэлэ, учкоме-эскероме, – шуэ Кузё-Инмар. –
Сьӧлыкъёсын нап-горд ке но луиды, тӥледыз лымы кадь тӧдьы каро;
горд басма кадь ке но луиды, тӥледыз тӧдьы ыжгон кадь югыт каро.
19Мылыныды-кыдыныды Мынэсьтым кылзӥськыса улӥды ке,
музъемлэсь ӟеч емышъёссэ сиёды;
20нош куштӥськиды но вогъяськыса улӥды ке,
лэчыт пурт тӥледыз сиёз,
уго та Кузё-Инмарлэн верам кылъёсыз.
21Шонерлыкен тырмем, оскиськымон шоркар*а
кызьы пӧрмиз азыса-калгыса улӥсь кышномуртлы!?
Шонерлык отын улэ вал, нош табере – адями виылӥсьёс.
22Тынад азвесед ӝуам кортлы пӧрмиз, винаед ву пырыса сӧриськиз.
23Тынад кивалтӥсьёсыд законлы пумит йыруж лэсьтыса уло,
адями таласьёслы соос эшъёс луо;
ваньзы соос мед-кузьым октыны ярато,
ваньбур люкет сьӧры уйылӥсько;
анайтэк-атайтэк кылем нылпилы дур уг басьто,
палкышнолэсь шуге-леке сюремзэ но тодэмзы уг поты.
24Соин ик Кузё-Инмар, Израильлэн Кужымез,
Саваоф Кузё-Инмар шуэ:
«О, Мыным пумит улӥсьёс пыр Мон буйгатско –
со тушмонъёсылы пунэмзэ берыктӥ ке!
25Тон вылэ нош ик киме поно,
пень вуын кадь сураськем-пожаськем пырыостэ вылысьтыд сузяло,
бордысьтыд вань узвесьёстэ люко-висъяло.
26Азьло кадесь ик судьяосты тон доры пуктыло,
кутсконаз кадесь ик визь-кенеш сётӥсьёсты ваё;
соку тон сярысь вералозы:
”Шонер улонлэн городэз, оскиськымон шоркар”».
27Сӥон шонер судэн мозмытэмын луоз,
оскон пала берытскем нылпиосыз шонер улонэн утемын луозы.
28Нош вань куштӥськем-палэнскемъёс, сьӧлыкоос доры
бырон лыктоз,
Кузё-Инмарлэсь куштӥськыса кошкемъёс быдтэмын луозы.
29Тыпы сурдъёсты сӥлы карыса улэмды понна
возьытэ вуттэмын луоды,
асьтэлы (йыбыртъяны) быръем садъёсты-куакъёсты понна
сӥтэм-сантэм каремын луоды.
30Уго тӥ куартэк кылем тыпы кадесь луоды,
вулы ёрмыса улӥсь сад кадь луоды.
31Кужмо мурт кужлы пӧрмоз, ужзэ тыл басьтоз –
огазьын ӝуалозы, но нокин но уз кысы.
*а 1:21 шоркар – столица; татын: Иерусалим
Глава 1
