Choose Language
Old Testament Books
New Testament Books
1«О, тон анайме нонӥсь выны луысалыд ке,
соку мон тонэ, ульчаысен пумитакум, чупаллясал,
со понна монэ ӧй пыкылысалзы.
2Соку мон тонэ нуысал, анаелэн корказ вайысал.
Тон монэ дышетысалыд, нош мон тонэ ческыт зыно винаен сектасал,
гранатпуэлэн емышезлэн сокеныз сектасал.
3Паллян киыз йыр улам, нош бурыз – монэ ӟыгыртэ».
4«Иерусалим нылъёс, мон тӥледыз тэльмырыса курисько:
эн сайкатэ, эн ёртэ гажанме, уммез тырытозь, со мед кӧлоз»
5Кин со сыӵе, яратонэз вылэ пыкиськыса,
луоё кыр дунне палась тубе?
«Улмопу улысен мон тонэ сайкатӥ: отын тонэ анаед вайиз,
вордэм анаед тонэ отысен вайиз.
6Сюлэм вылад монэ печатез кадь пон, зундэсэз кадь чиньыяд пон,
уго яратон кулон кадь кужмо; вожан ад пыдэс кадь лек;
солэн ньӧлъёсыз – ӝуась ньӧлъёс;
со – кужмо ӝуась гомась тыл.
7Бадӟым вуос уг быгато яратонэз кысыны,
шуръёс но сое вуосынызы уз ӝокатэ.
Кин ке но яратон понна юртысьтыз вань узырлыксэ сётысал ке,
соку со кулэтэм карыса палэнтэмын луысал».
8«Вань милям сузэрмы, но со пинал на, ноныосыз но будымтэ на;
сузэрме кураны лыктӥзы ке, мар меда соин кароно луоз?
9Со борддор луысал ке,
соку ми со вылэ азвесь палатаос лэсьтысалмы;
со ӧс луысал ке,
соку ми сое котыр ласянь кедырпу пулъёсын шуккысалмы».
10«Мон – борддор, мынам ноныосы каланча кадесь;
соин ик мон солэн син азяз быдэ вуэм мурт кадь адӟисько».
11«Соломонлэн виноград бакчаез Ваал-Гамонын вал;
та виноград бакчазэ со возьмаськисьёс кие сётӥз;
котькудӥз возьмаськись емышъёс понна
сюрс азвесь коньдон вайыны кулэ.
12Нош мынам виноград бакчае бордам.
Сюрс манетэз тыныд мед луоз, Соломон,
нош кык сюэз солэсь емышъёссэ возьмасьёслы мед луоз».
13«Сад бакчаын улӥсь! Тынэсьтыд куарадэ эшъёсы кылзо,
лэзь монэ но кылзыны».
14«Бызьыса лыкты, мынам яратонэ!
Бальзамо гурезьёсын кыркечлы яке пинал пужейлы укшась лу».
Глава 8
