Choose Language
Old Testament Books
New Testament Books
1«Пинал дыръяд тодад вай аслэсьтыд Кылдытӥсьтэ,
секыт нуналъёс, секыт аръёс вуэмлэсь азьло,
”улонысьтым шумпотон быриз!” шуоно аръёс
матэ лыктэмлэсь азьло,
2шунды но, югыт но, толэзь но, кизилиос но кысэмлэсь азьло,
зор бере выль пилемъёс вуэмлэсь азьло.
3Со нуналэ корка возьмасьёс куалекъялозы,
кужмо воргоронъёс куасалскозы;
изӥсьёс изэмысь дугдозы, малы ке шуоно соос
ӧжыт кузя кылёзы;
укноетӥ учкисьёс номыр но уз ни адӟе;
4ульча пала потӥсь ӧсъёс тунгонаськозы;
кӧлэн куараез чалмоз,
атаслэн чоръям куараезъя адями султоз но,
кырӟась нылъёс чус кариськозы;
5ӝужыт гурезь йылъёслэсь кышкатскозы;
сюрес вылын но туж кышкытэсь учыръёс луозы;
соку миндальпу сяськаяськоз, ӟоз секытомоз,
каперс*а кисьтӥськоз,
малы ке шуоно адями кошке
аслаз пумтэм вапумъёс ӵоже улоно корказ;
кулэм мурт дорын кылбураса бӧрдӥсьёс
ульчаысен сое котыртозы; –
6азвесь гайтанлэн кесиськемезлэсь азьло,
зарни елэн чигиськемезлэсь азьло,
ошмес дурын кувшинлэн пилиськемезлэсь азьло,
гудӟем йылысь поглянлэн куашкамезлэсь азьло
Аслэсьтыд Кылдытӥсьтэ тодад вай.
7Сюйысь потэм мугор сюе берытскоз,
нош лул Инмар доры – сое сётӥсез доры, берытскоз.
8Алекъяськон – юнме дыр быдтон,
алекъяськон – юнме кужым быдтон, – шуиз Екклесиаст, –
ваньмыз юнме алекъяськон гинэ!»
9Визьлыко луэм сяна, Екклесиаст калыкез тодон-валанлы но дышетӥз на. Со ваньзэ чаклаз, эскериз но трос веранъёс-мадёнъёс кылдытӥз.
10Екклесиаст чебересь кылан-буранъёс утчаса шедьтыны тыршиз, зэмлыклэсь кылъёссэ со шонер гожтӥз.
11Визьлыкоослэн кылъёссы – вень кадесь,
шуккем кортӵог кадесь,
соосты кылдытӥсьёс одӥг уллё возьмась дорысь потэмын.
12Нош мар талэсь мултэсэз, пие мынам, солэсь утиськы: трос книгаосты кылдытъянлэн пумыз уз луы, трос ке лыдӟоно – мугор катьтэмме.
13Вань веранлэсь йылпумъянзэ-пуштроссэ кылзомы: Инмарлэсь кышка но Солэн курон-косонъёсызъя ул, – та бордын адямилэн вань улонэз возиське;14уго вань ужъёс понна Инмар адямиез судить кароз, вань ватӥськем ужъёслы но суд луоз: ӟечез понна одӥг суд, уродэз понна мукет суд луоз.
*а 12:5 каперс – будос ним
Глава 12
