Choose Language
Old Testament Books
New Testament Books
1«Со монэ мед чупалоз, ымдурыныз мед чупалоз!
Ӟыгыръянэд-чупанэд виналэсь ӟечгес уго.
2Ческыт зын поттӥсь зыраськон вӧй кадь тынад нимыд,
кисьтэм миро вӧй кадь со, со понна ик нылъёс тонэ ярато.
3Кыскы монэ, ми тон сьӧры бызёмы;
эксэй монэ аслаз четлыказ-юртаз пыртӥз,
тон шоры синмаськыса, шумпотыса учкыса уломы,
вина сярысь но вылӥгес каромы тынэсьтыд ненег чупаськемъёстэ;
кызьы кулэ яратыны, озьы тонэ ярато!
4Иерусалим нылъёс! Сьӧдкысъем мон,
Кидарысь балаганъёс кадь,
Соломонлэн катанчиосыз кадь чебер мон.
5Сьӧдкысъем шуыса, мон шоры эн учке, уго шунды монэ ӵушказ,
анаелэн пиосыз мон вылэ йыркуръяськыны кутскизы,
виноград бакчаез возьманы монэ пуктӥзы,
нош аслэсьтымзэ виноград бакчаме ӧй возьма.
6Вера тон мыным, кинэ мынам лулы яратэ:
”Кытын тон пудодэ возьмаськод?
Лымшоре кытын тон шутэтскиськод?
Тынад эшъёсыдлэн пудо уллёоссы вӧзтӥ
малы мон пыдйылчи мурт кадь тонэ утчаса ветлыны кулэ?”»
7«Кышноос пӧлысь чеберлэсь но чеберезгес, тае уд ке тодӥськы,
соку тон ыжъёслэн пытьы кузязы мын но пудо возьмасьёслэн
балаганъёссы вӧзын аслэсьтыд кечпиостэ возьма».
8«Яратонэ мынам,
фараонлэн ожмаськон уробояз кыткем валэлы мон тонэ укшатӥ.
9Макем чебересь тынад бамъёсыд ошылэм чеберъянъёс улын,
чыртыяд весьёс ошылэмын;
10азвесен шобыртэм зарни чеберъянъёс тыныд лэсьтомы».
11«Эксэй ӝӧк сьӧраз пукыку, мынам нардэ ческыт зын поттыса улӥз.
12Миррапулэн огазе думем вайёсыз – мынам яратонэ,
гадьёсы вӧзын кылле.
13Ен-Гедиысь виноград бакчаысьтым
киперпулэн пурыез кадь мынам яратонэ».
14«О, макем тон чебер, мынам яратон нылы, макем тон чебер!
Синъёсыд дыдыклэн кадесь».
15«О, макем тон чебер, мынам яратон пие, ӟеч мылкыдо тон!
Асьмелэн валесмы – вож турын;
16коркаосмылэн липетсы кедырпулэсь,
вӧлдэтъёсмы кипариспулэсь лэсьтэмын».
Глава 1
