Choose Language
Old Testament Books
New Testament Books
1Кулэм кутъёс зынмыто зыраны дасям ческыт зыно вӧез,
озьы ик гажано муртлэн пичияк шузияськемез сӧре
солэсь визьлыко, сӥё-сано луэмзэ.
2Визьлыколэн сюлэмыз бурпала нуэ,
нош шузилэн сюлэмыз паллянэ нуэ.
3Кыӵе гинэ сюрестӥ шузи мурт медаз мыны,
солэн ноку но визьмыз уг тырмы,
ваньмызлы со возьматэ аслэсьтыз шузи луэмзэ.
4Кузёйырлэн вожпотонэз тон вылэ пурӟиз ке,
аслэсьтыд интыдэ куштыса эн кельты,
малы ке шуоно зӥбыт-востэм улон
бадӟымесь янгышъёсты-сьӧлыкъёсты но ворме.
5Шунды улысь уродлыкез адӟи,
со кузёяськисьлэн лэсьтылэм янгышъёсызлы укша вал.
6Укылтэм улон бадӟым ӝуждалае ӝутэмын,
нош узыръёс улӥын пуко.
7Адӟи мон вал вылын мынӥсь ляльчиосты,
нош кивалтӥсьёс ляльчиос музэн пыдын мыно.
8Кин гу гудэ, со отчы усёз, кин кенерез куашкатъя, сое кый лексёз.
9Изъёсты интыысьтызы вырӟытъясьлэн гогыез вырӟыны быгатэ,
пу пильылӥсьлэн писэз кымесэ пезьдыны быгатэ.
10Тӥред ныжомиз ке, тӥред шеремын ке ӧз луы,
соку пычкиськыса кужымдэ поттоно луод;
визьлык быгатоз тае радъяны.
11Пелляськон кылъёс верамлэсь азьло кый куртчиз ке,
соку пелляськисьлэн ужезлэн нокыӵе но пайдаез уз луы.
12Визьлыколэн ымысьтыз потэм кылъёс – ӟечлык,
нош шузилэн ымыз сое ассэ ик быдтэ:
13солэн ымысьтыз кылъёс потыны кутскыкузы ик
соос визьмоесь ӧвӧл,
нош пумаз ини ымысьтыз потэм кылъёс –
визьтэмлэсь но визьтэмесь.
14Шузи мурт трос вераськыны яратэ, адями уг ке но тоды, мар азьпалан луоз, кин солы вералоз, мар луоз со кулэм бере?
15Уж шузи муртэ жадьытэ, городэ сюресэз но со уг тоды уго.
16Куректон-кайгу тыныд, музъем, пинал пи ке тынад эксэед,
кивалтӥсьёсыд ӵукна вазь ик сиськыса-юыса уло ке!
17Шудо тон, музъем, тынад эксэед йӧно выжыысь потэмын ке,
кивалтӥсьёсыд ас дыраз сисько-юо ке, –
куаён понна ӧвӧл, тазалыксэс юнматон понна сиё-юо ке!
18Азьтэмлэн коркаезлэн вӧлдэтэз лэзиськоз,
киосын уг ке ужало – корка ву виялоз.
19Шулдыръяськон понна юондыр ортчыто, вина улонэз шулдыртэ;
нош ваньмыз понна азвесь кыл кутэ.
20Эксэез аслад малпанад гинэ но урод кылъёсын эн куареты,
узыр муртэ кӧлан бӧльмыяд урод кылъёсын эн тышкаськы;
малы ке шуоно ин тылобурдо тынэсьтыд кылдэ вуттыны быгатоз,
бурдо улэп маке но тынэсьтыд верамъёстэ вераны быгатоз!
Глава 10
