Choose Language
Old Testament Books
New Testament Books
1Ваньзэ тае мон ас сюлмыным эскери-чаклай но таӵе валанэ вуи: шонер улӥсьёс но, визьлыкоос но, соослэн ужъёссы но – ваньмыз Инмарлэн кияз; азьпалан адямиез котьмар мед возьмалоз – яратон-а, синазькыль карон-а, адями сое уг тоды.
2Котьмарлэн но, ваньмызлэн но – одӥг адӟонэз: одӥг адӟон шонер улӥсьлы но, сьӧлыклэсь кышкасьтэмлы но, лякыт муртлы но [уродлы но], чылкыт улӥсьлы но, кырсь муртлы но, курбон сётӥсьлы но, курбон сётӥсьтэмлы но; кызьы ке ӟеч уж лэсьтӥсьлы, озьы ик сьӧлыко муртлы но; кызьы ке кыл сётӥсьлы, озьы ик кыл сётонлэсь кышкасьлы но.
3Шунды улын улонын мар лэсьтӥське, та уродэз: ваньмызлэн одӥг кадь адӟонэз, – адями пиослэн сюлэмзы уродэн-лекен пачылмыса, быдэс улон даурзэс соос визьтэмъяськыса уло, нош собере соос кулэмъёс доры кошко.
4Та дуннеын улӥсьлэн вань на оскиськонэз: улэп айы пунылы но умойгес кулэм левлы сярысь.
5Улэпъёс тодо, кулозы шуыса, нош кулэмъёс номыр но уг тодо; соослы пунэм но уг ни берыктӥськы, соосты буре вайыны но вунэто уго;
6соослэн яратонзы но, соослэн синазькыль каронзы но, соослэн вожанзы но ышизы-быризы ни, пумтэм вапумъёс ӵоже шунды улын лэсьтӥськись улонын номыр бордын но ӧвӧл ни соослэн люкетсы.
7Озьыен, Инмар ужъёстэ быдэсъяны ӟеч эриксэ сётыку, мын, шулдыръяськыса няньдэ си, сюлмыныд шумпотыса винадэ ю.
8Котькыӵе дыре-вакытэ но чылкыт-тӧдьы дӥськутэн дӥсяськы, йыр вылысьтыд вӧй медаз бырылы.
9Шунды улын алекъяськыса – юнме дыр быдтыса – вань улон нуналъёсад яратоно кышноеныд майбыр ул, вань алекъяськыса – юнме дыр быдтыса – улон нуналъёсыдлы сое тыныд Инмар сётӥз, уго та тынад улонад, шунды улын ужакуд-тыршыкуд басьтэм адӟон люкетэд.
10Ваньзэ, мае тынад киыд лэсьтыны быгатэ, кынарыдъя лэсьты; малы ке шуоно шайгуын, кытчы тон мынод, уж но ӧвӧл, малпаськон но, тодон-валан но, визьлык но ӧвӧл.
11Мон берытскыса учки но адӟи:
улын кужмоослы бызьылонын азинлык уг сюры,
шунды вормонэз кышкасьтэмъёс уг басьто,
нянь визьнодоослы уг сюры,
узырлык но валась-тодӥсьёс киын ӧвӧл,
ӟеч каронэз но усточиос уг адӟо,
котькудӥзлэн аслаз адӟонэз, котьмарлэн аслаз дырыз-вакытэз.
12Адями аслэсьтыз улон-вылон даурзэ уг тоды уго.
Кызьы чорыгъёс бырон вайись калтонэ сюро,
кызьы тылобурдоос си гердъёс пӧлы ёрмо,
озьы ик адями пиос но соос доры малпамтэ шорысь вуись
секыт вакытъёсы сьӧлтэтъёсы сюрыло.
13Тани, шунды улысь эшшо кыӵе визьлыкез мон адӟи на, со мыным туж кулэлыко кадь потӥз:14пичигес город, калыкез но отын трос ӧвӧл; со доры вуиз быдӟым эксэй но сое котыртӥз, сое киултон вылысь солы пумит бадӟым ужъёс лэсьтӥз: ӝужытэсь сюй мудэтъёс ӝутӥз;15нош отын визьлыко куанер улӥсь сюриз, со аслаз визьлыкеныз городэз утиз; нош бӧрысь та куанер адями сярысь нокин но тодаз ӧз вайы.
16Но мон шуи: визьлык кужымлэсь ӟечгес, но, жаляса верано луэ, куанер улӥсьлэн визьлыкез кулэтэм кариське, солэсь верамзэ но уг кылзӥсько.
17Визьлыкоослэсь лякытэн верам кылъёссэс ӟечгес кылзӥсько
кузёяськисьлэсь укылтэмъёс шоры кесяськыса верам кылъёссылэсь.
18Визьлык ожмаськон тӥрлыкъёслэсь ӟечгес;
но одӥг сьӧлыкась мурт трос ӟечлыкез быдтыны быгатэ.
Глава 9
