Choose Language
Old Testament Books
New Testament Books
1Кин визьлыкез тодэ, кин арбериослэсь пуштроссэс вала?
Визьлык адямилэсь ымнырзэ югыт каре,
ымнырызлэсь леклыксэ воштэ.
2Мон шуисько: Инмар азьын кыл сётӥд бере, эксэйлэсь верам кылзэ уть.
3Со дорысь кошкыны эн дырты, урод ужын вогъяськыса эн улы, малы ке шуоно эксэйлэн мар каремез потӥз, ваньзэ лэсьтэмез луоз.
4Кытын эксэй кыл, отын – кужым; нош кин солы шуоз: «Мар тон лэсьтӥськод?»
5Курон-косонэз быдэсъяса улӥсь мурт
нокыӵе уродлыкез чидано уз луы:
визьлыколэн сюлмыз ужлэсь дырзэ но, пуктон-косонзэ но тодэ.
6Малы ке шуоно котькуд ужез быдэстонлы
дыр но, пуктон-косон но сётэмын;
нош адямилэн туж секыт адӟонэз татысь потэ:
7со уг тоды, мар сое азьпалан вите;
кызьы со ортчоз, – кин солы та сярысь вералоз?
8Адями духлы-луллы кузё луыны,
духез-лулэз кутыса возьыны уг быгаты,
кулон нуналэныз но со кузёяськыны уг быгаты,
та ожмаськонын утиськон-мозмытскон ӧвӧл,
сьӧлыклэсь кышкасьтэмез сьӧлыклэсь кышкатэк улон уз утьы.
9Ваньзэ тае мон адӟи но шунды улын лэсьтӥськись котькыӵе ужез валан пала аслэсьтым сюлэмме берыктылӥ. Луыло сыӵе дыръёс но: адями адямиен кузёяське но солы изъян вайыса кельтэ.
10Мон соку адӟи, кызьы сьӧлыклэсь кышкасьтэмъёсты кулэм беразы ватылӥзы, святой интые адямиос лыкто, лыкто но кошко, урод ужъёс лэсьтылыса улэм городъёсазы соослэсь нимзэс буре вайисьёс ӧй вал ни. Та но – алекъяськон – юнме дыр быдтон!
11Лэсянтэм ужъёс понна соку ик суд уг ортчы;
соин ик адями пиослэн сюлэмзы
урод-лек ужез лэсьтонлэсь кышканы уг вала.
12Сьӧлыко мурт, сю пол урод уж лэсьтыса,
озьы улыны дыше ке но, мон тодӥсько:
Инмарлэсь кышкаса, Солы вӧсяськыса улӥсьёслы ӟечлык луоз;
13нош сьӧлыклэсь кышкасьтэмлы ӟечлык уз луы,
Инмар азьын кышкасьтэм мурт вужер кадь – со кема уз возиськы.
14Вань на музъем вылын таӵе но алекъяськон – юнме дыр быдтон:
шонер улӥсьёс доры вуэ со,
кудӥз вуыны кулэ вал сьӧлыклэсь кышкасьтэмъёс доры,
нош сьӧлыклэсь кышкасьтэмъёс доры вуэ со,
кудӥз вуыны кулэ вал шонер улӥсьёс доры.
Соку мон шуи: та но – алекъяськон – юнме дыр быдтон!
15Но мон шулдыръяськыса улонэз ушъяса верай, малы ке шуоно шунды улын адямилы сиён, юон но шулдыръяськон кадь номыр но ӟечез ӧвӧл; Инмарлэн солы шунды улын улыны сётэм нуналъёсыз ӵоже пӧртэм ужрадъёссэ ортчытыку, соос солэн сьӧраз ветло.
16Аслэсьтым сюлэмме визьлыкез тодон, музъем вылын лэсьтӥськись ужъёсты адӟон пала берыктӥ, адӟеме потӥз, кызьы таӵе ужъёс пӧлын адями нуназе но, уйин но изёнэз тодытэк улэ, –
17соку мон Инмарлэсь вань ужъёссэ адӟыса валай: шунды улын лэсьтӥськись ужъёсты адями тодыны-валаны уг быгаты. Адями котькӧня эскерыны-тодыны мед тыршоз, со озьы но талэн йылаз-пумаз уз вуы; кыӵе ке но визьлыко мурт «Мон тае тодӥсько» шуысал ке но, – со но талэсь йылзэ-пумзэ тодыны-валаны уг быгаты.
Глава 8
