Choose Language
Old Testament Books
New Testament Books
1Сӥё-дано ним ӟечгес дуно ческыт зыно мазьлэсь,
кулон нунал ӟечгес вордскон нуналлэсь.
2Юон корка ветлытозь,
ӟечгес кулэмъёс понна бӧрдон корка ветлыны;
уго котькудӥзлэн адямилэн таӵе пумыз,
улэп мурт тае сюлэмаз поныса тодаз мед возёз.
3Куректон-чигиськон ӟечгес серекъян-горонлэсь;
малы ке шуоно ымнырын куректон улыку,
сюлэм лякытгес кариське.
4Визьлыкоослэн сюлэмзы – бӧрдон коркан,
нош укылтэмъёслэн сюлэмзы –
шулдыръяськон коркан.
5Укылтэмъёслэсь кырӟанзэс кылзӥськытозь,
ӟечгес визьлыколэсь шекъёсты шараямзэ кылзӥськыны;
6уго укылтэмъёслэн серекъямзы –
тёрнпу улвайлэн пурты улын шатыртыса ӝуаменыз огкадь.
Та но – алекъяськон – юнме дыр быдтон!
7Мукетъёссэ ӝикатыса улэ ке, визьлыко мурт визьзэ ыштэ,
кузьымъёс лулпушез сӧро.
8Ужлэн пумыз кутсконэзлэсь ӟечгес;
чидась мурт ӟечгес вылӥ мылкыдо адямилэсь.
9Вождэ поттыны эн дырты,
малы ке шуоно вожпотон укылтэмъёслэн сюлмазы каръяське.
10Эн шуы: «Малы меда азьвыл нуналъёс
туала нуналъёслэсь ӟечгес вал?»
Визьнодо луэмысьтыд тон тае уд юаськы уго.
11Визьлыкен ӵош люкет басьтыны умой,
уката ик шундыез адӟыса улӥсьёс понна,
12малы ке шуоно визьлыклэн утись шобрет улаз улон
азвесьлэн утись шобрет улаз улонлы укша;
нош тодон-валанлэн вылӥлыкез со бордын:
визьлык кузёезлэсь улонзэ уте.
13Инмарлэн ужез шоры учкы: кин быгатоз шонертыны сое,
мае Со Ачиз кырыж кариз ке?
14Ӟечлыко нуналъёсы ӟечен ул, нош шугадӟон нуналъёсы – малпаськы: созэ но, тазэ но Инмар лэсьтӥз, Солы пумит адями номыр но вераны медаз быгаты шуыса.
15Аслам алекъяськыса улон нуналъёсам мон ваньзэ адӟи: шонер улӥсь но шонер улон вакытаз ик кулэ, нош сьӧлыклэсь кышкасьтэм лек уж лэсьтыса вылысь но кема аръёс улэ.
16Укыр шонер улӥсь шуыса но, укыр визьлыко карыса но астэ эн возьматы: малы тыныд астэ быдтонэз?
17Сьӧлыкаса улыны эн кутскы, визьтэмъяськыса но эн улы: дырыд вуытэк малы тон кулыны кулэ?
18Ӟеч луоз одӥгез бордын возиськыса улӥд ке, мукетыз бордысь но кидэ ӧд ке басьты, малы ке шуоно кин Инмарлэсь кышканэн улэ, со вань та уродлэсь палэнскыны быгатоз.
19Визьлык визьлыко муртэз городэн кивалтӥсь дас кузёйыръёслэсь кужмогес каре.
20Музъем вылын ӧвӧл чик сьӧлыкатэк, ӟечлык лэсьтыса гинэ шонер улӥсь адями.
21Соин ик котькуд верам кылэз пеляд эн пон – аслад ляльчиедлэсь тон сярысь урод верамзэ медад кылы шуыса;
22уго тынад сюлмыд тодэ, кызьы трос пол тон ачид но мукетъёс сярысь урод кылъёс вералляд.
23Ваньзэ тае мон визьлык пыр чаклай-эскери; мон шуи: «Мон визьлыко луо»; нош визьлык мынэсьтым кыдёкын улэ.
24Кыдёкын со, мар ортчемын ни, мурез – мур, мар мур – кин со доры вуыны быгатоз?
25Мон сюлмыным визьлыкез, нодлыкез валан, тодон, эскерон пала берытски, тодэме потӥз, кытысь пото сьӧлыклэсь кышкатэк, йӧнтэм, укылтэм, визьтэмъяськыса улонъёс.
26Соку мон тодыны быгатӥ:
кулонлэсь но курытэз – со кышномурт,
малы ке шуоно со – калтон,
сюлмыз солэн нальык, киосыз солэн – сьӧлтэт;
Инмар азьын ӟеч улӥсь мурт солэсь утиське,
нош сьӧлыко муртэз со капыртоз.
27Екклесиаст шуиз: «Огзэ бере огзэ ужъёсты чаклай-эскери но, тани, мон таослы валэктон шедьтӥ.
28Мае бен мынам лулы утчаз на, но мон сое ӧй шедьты? – Сюрс мурт пӧлысь одӥг пиосмуртэз шедьтӥ, нош кышномуртэз вань калык пӧлысь ӧй шедьты.
29Тае гинэ мон тодыны быгатӥ: Инмар адямиез шонер улӥсь карыса кылдытӥз, нош адямиослэн сюлмазы олокыӵе но малпанъёс уло».
Глава 7
