Choose Language
Old Testament Books
New Testament Books
1Шунды улысь уродлыкез мон адӟи, со ӵем пумиське адямиос пӧлын:2адямилы Инмар узырлык, ваньбур, данлык сётэ, солэн лулыз номырлы но, мар солы кулэ, ӟудыса-ёрмыса уг улы; нош таосын ваньмыныз кузёяськыса улыны Инмар солы эрик уг сёты, мурт адями соин кузёяське: та но – алекъяськон – юнме дыр быдтон, секыт висён-шугадӟон!3Кыӵе ке но адямилэн сю нылпиез вордӥськысал ке но, со трос аръёс улысал ке, улон нуналъёсыз эшшо но йылысалзы ке, нош солэн лулыз ӟечлыкез валатэк куаныса ӧй ке улысал, кулэм бераз сое нокин но келяны но ӧй ке лыктысал, соку мон шуысал: лултэм вордӥськем нуны солэсь шудогес,4малы ке шуоно со юнме та дуннее лыктӥз но пеймыт азе кошкиз, солэн нимыз пеймытлык пушкы ышиз-быриз.
5Лултэм вордскем нуны ӧз но адӟы, ӧз но тоды шундыез: таизлы каньылгес, соизлы сярысь.
6Нош соиз, кык сюрс ар ке но улысал, нош ӟечлыко, майбыр улонэз ӧй адӟысал. Ваньзы одӥг интые уз-а мынэ?
7Адямилэн вань ужъёсыз – ымыз понна быдэсъясько, нош лулыз солэн тыр уг луы.
8Визьлыко адями мар ласянь укылтэм муртлэсь вылӥгес, куанер муртлы мар пайдаез, улэпъёс азьын кызьы кулэ, озьы улыны быгатӥз ке?
9Лулын солань-талань шонаськыса ветлытозь, ӟечгес синмын адӟыны. Озьы ик та но – алекъяськон – юнме дыр быдтон, духлэн-луллэн курадӟонэз-куректонэз.
10Кин улэ-вылэ, солы ним сётэмын ни, тодмо, кин со – адями, озьы ик тодмо, со аслэсьтыз кужмозэгес муртэ вормыны уг быгаты шуыса.
11Вань алекъяськонэз – юнме дыр быдтонэз – йылэтӥсь трос кылъёс: мар бен адями понна ӟечгес?
12Уго кин тодэ, улонысь мар ӟечсэ адӟе адями, вужер кадь алекъяськыса – юнме дырзэ быдтыса – ортчись улонэзлэн нуналъёсаз? Кин вералоз адямилы, мар луоз шунды улын со бере?
Глава 6
