Choose Language
Old Testament Books
New Testament Books
1Кылдэ вераны эн дырты, сюлмыд но Инмар азьын кыл вераны медаз дырты; малы ке шуоно Инмар инмын, нош тон – музъем вылын; соин ик тон трос кыло вераськись эн луы.2Уйвӧтъёс трос сюлмаськонъёс дыръя лыкто, укылтэм муртэз трос вераськемезъя тодманы луэ.
3Инмар азьын сӥзиськиськод ке, сое ӝегатэк быдэсты,
Инмар укылтэмъёслы ӟеч эриксэ уг возьматы уго;
мар сӥзид, сое быдэсты.
4Сӥзиськыны но сое быдэстытэк кельтыны сярысь,
умойгес тыныд сӥзиськытэк улыны.
5Лулмугордэ сьӧлыке пыртыны ымдэ эн усья,
[Инмар] Кылчин азьын тазьы эн шу:
«Тае янгышен лэсьтӥ!»
Малы тон Инмарлэсь вожзэ поттӥсь кылэз вераны кулэ,
кудӥз понна Со тынад киыныд лэсьтэм ужез быдтыны кулэ?
6Уго трос кылъёс бордын кадь ик тросаз уйвӧтъёсын –
трос алекъяськонэз – юнме дыр быдтонэз; но тон Инмарлэсь кышка.
7Кыӵе ке шаерысь-ёросысь начар-куанер муртэ ёртыса воземез, шонертэм судэз, зэмлык сӧронэз адӟид ке, солы эн паймы, малы ке шуоно вылӥ луись муртэ эшшо но вылӥ луисез чакласа-эскерыса возе, нош соос вылын эшшо но вылӥ луисез вань на,8нош та музъемлэн котыр ласянь вылӥлыко луонэз со сярысь сюлмаськись эксэйлэн киулаз возиське.
9Кин азвесез яратэ, солэн азвесен кӧтыз уз тыры,
кин узырлыкез яратэ, со бордысь со пайда уз басьты.
Та но – алекъяськон – юнме дыр быдтон!
10Ваньбур йылэ ке, сое кулэ карисьёс но трос луо,
нош солэн кузёез мар ӟечсэ адӟе?
Ас синмыныз со шоры учкыса улыны быгатэмез ке шат?
11Ужась мурт ческыт уммен кӧлэ, – ӧжыт-а, трос-а со сие,
нош узыр мурт кӧтыз шуг луытозь сиське но
умме усемез уг луы.
12Шунды улысь курадӟытӥсь висёнэз-шугадӟонэз мон адӟи:
кузёлэн утьыса возиськись узырлыкез солы изъян вае.
13Та узырлык шудтэм учыръёс дыръя быре: солэн пи нуныез вордскиз, номыриз но солэн кияз ӧвӧл.
14Кызьы со анаезлэн пушкысьтыз гольык куен потӥз, гольык куен ик кошке но, таӵе куен со лыктӥз вал уго; ужам ужез бордысь номырзэ но сьӧраз уз басьты, кияз кутыса, номыр но нуыны уз быгаты.
15Та но секыт висён-шугадӟон: кыӵе куен со лыктӥз, со куен ик кошке но. Тӧллы ужамез-тыршемез кыӵе пайда солы ваёз?
16Нош солэн вань нуналъёсыз пеймыт азьын сиськыса, бадӟым йыркурен, кӧтӝожен, вожпотонэн улыса ортчизы.
17Тани эшшо мар ӟечсэ, ярамонзэ мон тодӥ: шунды улын Инмарлэн тыныд сётэм вань улоно нуналъёсыд ӵоже ужаса майбыр ул – си, ю, маид вань, соин тыр лу, уго та – тынад та дуннеын басьтоно улон люкетэд.
18Кудӥзлы ке адямилы Инмар узырлык, ваньбур сётэ соосты уже кутон понна, аслаз ужам ужез бордысь люкетсэ басьтыны но соин майбыр улыны, та – Инмарлэн сётэм кузьымез-медэз луэ.
19Адями улоно нуналъёссэ туж ик кема тодаз уз возьы, соин ик Инмар солэн сюлмызлы шумпотон кузьма.
Глава 5
