Choose Language
Old Testament Books
New Testament Books
1Иерусалимысь эксэйлэн, Давидлэн пиезлэн, Екклесиастлэн*а, верам кылъёсыз.
2Алекъяськон*б – юнме дыр быдтон,
алекъяськон – юнме кужым быдтон, – шуиз Екклесиаст, –
алекъяськонэн алекъяськон, –
ваньмыз юнме алекъяськон гинэ!
3Адямилы быдэс даурзэ шунды улын вань ужам ужъёсызлэсь
мар пайдаез?
4Одӥгез выжы ортче-кошке но, мукетыз выжы лыктэ,
нош музъем пумтэм вапумъёс улэ.
5Шунды ӝужа, шунды пуксе но аслаз потон-ӝужан интыяз дыртэ.
6Лымшор пала тӧл пельтэ, собере уйпала выже,
мынон сяменыз берга-берга но нош ик аслаз интыяз ик берытске.
7Вань шуръёс зарезе бызё, нош зарезь таки уг пачылмы:
шур вуос бызё но нош ик асьсэлэн потон интыязы берытско
выльысен бызьыны кутскон вылысь.
8Вань ужъёс жадьыто: адями ваньзэ вераса но уз быдты;
синлэн учкыса кӧтыз уз тыры, пель кылзӥськыса тыр уг луы.9Мар вал, со ик луоз; мар азьвыл лэсьтӥськиз, со ик лэсьтӥськоз, –
номыр но вылез ӧвӧл шунды улын.
10Луэ сыӵеез но, кудӥз сярысь шуо: «Учкы, тани таиз выль»;
нош со асьмелэсь азьвыл улэм дауръёсын вал ини.
11Ортчемез-кошкемез сярысь тодэ уг ваё ни;
соос бере лыктоноос сярысь но соос бере улоно адямиос тодазы уз вае ни.
12Мон, Екклесиаст, Иерусалимын Израильлэн эксэез луыса пуки;13инбам улын мар лэсьтӥське – ваньзэ сое визьлыкен эскеронлы, чакланлы мон аслэсьтым сюлэмме сётӥ. Та секыт ужез Инмар адями пиослы сётӥз, соос соин мед вырозы шуыса.14Шунды улын кыӵе ужъёс лэсьтӥсько, мон соосты ваньзэ адӟи, но ваньмыз со – алекъяськон – юнме дыр быдтон, духлэн-луллэн курадӟон-куректонэз!
15Кырыжлэн шонер кариськемез уг луы, нош мар ӧвӧл, – сое лыдъяны уг луы.
16Ас сюлмыным мон тазьы вераськи: «Иерусалимын мынэсьтым азьвыл кузёяськисьёслэсь мон ваньмызлэсь вылӥегес ӝутски, уногес визьлык люкай, мынам сюлэмы трос визьлык, тодон-валан шедьтӥз».17Мон аслам сюлмыным визьлыкез утчаны-тодыны тырши, визьтэмъяськонэз, укылтэм луонэз адӟыны-тодыны малпай; тодӥ: та но духлэн-луллэн юнме курадӟон-куректонэз гинэ луэ вылэм;18малы ке шуоно
трос тодон-валан бордысь
трос куректон-кайгу потэ,
кин тодон-валанзэ йылэтэ – со куректон-кайгузэ будэтэ.
*а 1:1 Екклесиаст – «тодытӥсь» шуэм луэ
*б 1:2 алекъяськон – суета
Глава 1
