Choose Language
Old Testament Books
New Testament Books
1Лемуил эксэйлэн кылъёсыз.
Анаезлэн сое визьноданъёсыз:
2«Мар-о, пие? Мынам пушкылэн пиез, мар-о?
Сӥзиськонъёсылэн пиез, мар-о?
3Кужымдэ кышномуртъёсын эн быдты,
улон сюресъёстэ но эксэйёсты быдтӥсь кышномуртъёслэн
киулазы эн сёты.
4Эксэйёслы ӧвӧл, Лемуил, эксэйёслы вина юоно ӧвӧл,
кивалтӥсьёслы но сӥкера юоно ӧвӧл,
5юыса законэз вунэтоно медаз луэ,
ултӥямъёслэсь суд ужъёссэс медаз мыдланьтэ.
6Сӥкераез шудтэм, бырон калэ вуэм муртлы сётэ,
винаез ӝоже усьыса курадӟись муртлы сётэ.
7Со мед юоз но аслэсьтыз куанер улонзэ мед вунэтоз,
аслэсьтыз курадӟемзэ тодаз медаз ни вайы.
8Куаразэ поттыны дӥсьтӥсьтэм мурт понна,
анайтэм-атайтэм нылпиослы дурбасьтон понна но ымдэ усьты.
9Шонер суд ортчытыны, куанерлэсь, кураськисьлэсь ужзэ
шонерлыко быдэстон понна ымдэ усьты».
10Кин меда ӟеч ужъёс лэсьтыса улӥсь кышно шедьтоз?
Солэн дуныз марӟан изъёслэсь но вылын;
11кузпалызлэн сюлмыз солы оске, со пайда басьтытэк уз кыльы;
12кышноез солы ваньзэ ӟечен берыктоз, уродэн уз,
вань улоно нуналъёсыз ӵоже озьы луоз.
13Ыжгон поттэ, етӥн будэтэ, ас киосыныз шумпотыса ужа.
14Та кышно, вузчиослэн корабльёссы кадь, кыдёкысь няньзэ вае.
15Уйин вазь ик со султэ но корказ улӥсьёслы сиён дася,
медо нылъёсызлы уж сётэ.
16Бусы сярысь со малпа но сое басьтэ;
ас киыныз виноград сад мерттэ.
17Кужымен куссэ думе но суйбыгытсэ юнматэ.
18Кышномурт шӧдэ, ужез умой пӧрме шуыса,
лампаез солэн уйин но уг кысы.
19Кубо пала кизэ ӝутэ,
чиньыосыныз черс борды кутӥське.
20Кырымзэ куанер мурт азьын усьтэ,
ёрмыса улӥсьлы кизэ сётэ.
21Ӟар кезьыт луыкулы семьяез понна уг кышка,
уго солэн быдэс семьяез кык полэс дӥськутэн дӥсяськемын.
22Со аслыз шобретъёс куэ,
солэн дӥськутэз векчи етӥн дэралэсь, горд даралилэсь вуремын.
23Солэн кузпалыз тодмо,
та музъемысь тӧроосын ӵош со кар капка дорын пуке.
24Кышноез, шобретъёс вурыса, соосты вуза,
Финикияысь вузчиослы кускерттонъёс вуттэ.
25Юнлык, чеберлык – солэн дӥськутэз,
со шумпотыса учке азьпал улон шоры.
26Визьлыкен со ымзэ усьтэ,
лякыт кылъёсын визь-кенеш сётэ.
27Юртсэ-ерзэ чакласа возе, ужатэк поттэм нянь уг сиы.
28Нылпиосыз султо но сое данъяло, картэз но султыса сое ушъя:
29«Трос вал ӟеч сямо кышномуртъёс,
нош тон соослэсь ваньзылэсь ӟечгес».
30Чебер тусбуй – алдаськон, чеберлык но – синпӧет гинэ;
нош Кузё-Инмарлэсь кышканэн улӥсь кышно ушъяны ярамон.
31Ас киыныз лэсьтэм ӟеч ужъёсыз понна
солы ӟечен пунэмзэ берыктэ,
солэн ужъёсыз кар капка дорын сое мед данъялозы!
Глава 31
