Choose Language
Old Testament Books
New Testament Books
1Ас сюлмам мон шуи: «Вай мон тонэ шулдыръяськон пыр чаклало-эскеро, ӟечлык пӧлын эзылыса мед улод»; но та но – алекъяськон – юнме дыр быдтон!
2Серекъянлы мон шуи: «Шузияськон!»; нош шулдыръяськонлы: «Мар со сётэ?!»
3Сюлмыным мон малпай мугорме винаен лӥятыны, нош со виын ик, мынам сюлмы визьлык вылэ пыкиськыса улон дыръя, шузияськыса улонлэсь ӧй куштӥськы со дырозь: адями пиослы лыдъяса гинэ сётэм инбам улын улон нуналъёсазы шудо луон понна мар лэсьтыны кулэ вал, сое адӟытозям.
4Мон бадӟым ужъёс лэсьтыны ӧдъяй: аслым коркаос пуктылӥ, виноград садъёс мерттылӥ,5аслым садъёс, арамаос пуктӥ, олокыӵе но емыш сётӥсь писпуос отчы мерттӥ;6арамаысь будӥсь писпуосты вуэн киськан понна ву тыметъёс лэсьтылӥ;7аслым медоосты, медо кышноосты басьтӥ, ляльчиосылэн нылпиоссы но мон дорын ужаса улӥзы; мынам скалъёсы, ошъёсы, ыжъёсы, кечъёсы мынэсьтым азьло Иерусалимын вань улӥсьёслэсь тросгес луизы,8эксэйёслэсь, ёросъёслэсь аслым азвесь, зарни, дуно арбериос бичай; ас дорам кырӟась пиосты, нылъёсты улыны вайи; адями пиослэсь сюлэмзэс лӥятӥсь пӧртэм пумо крезьгур шудон макеосты люкай.9Иерусалимын мынэсьтым азьвыл вань улэмъёслэсь мон вылӥегес ӝутски, узыргес луи; визьлыке но бордысьтым ӧз кошкылы.10Мынам синъёсы мае кулэ каро вал, соослы мон пумит ӧй кариськылы, нокыӵе шулдыръяськонлэсь но сюлмыным ӧй палэнскылы, малы ке шуоно, вань ужъёсме быдэсъякум, сюлмы шумпотыса улӥз, вань ужам ужъёсы понна та мынам ӟеч адӟонэ-люкетэ вал.11Ас киосыным лэсьтэм вань ужъёсы шоры мон учки, аслам тыршем, лэсьтэм уже шоры учки но тани, валай: ваньмыз – алекъяськон – юнме дыр быдтон, духлэн-луллэн курадӟон-куректонэз, шунды улын улӥсьёс понна та ужъёс бордысьнокыӵе но пайда уг поты!
12Соку мон визьлык шоры, визьтэмъяськон, укылтэмъяськон шоры учкыны берытски, уго эксэй бере адями мар ке но выльзэ быгатэ на-а лэсьтыны?13Но мон адӟи: визьлык укылтэм луонлэсь сыӵе ик вылӥын, кызьы югыт пеймытлыклэсь вылӥын:14визьмо муртлэн синъёсыз йыр бордаз уло, нош укылтэм мурт пеймыт азьтӥ ветлэ; но мон тодӥ: соослэн ваньзылэн одӥг адӟон люкетсы.15Соку мон аслам сюлмам шуи: «Укылтэмлэн адӟон люкетэз мон доры но вуоз: соку нош мар понна мон туж визьлыко луи?» Соку мон аслам сюлмам шуи: «Та но – алекъяськон – юнме дыр быдтон»;16малы ке шуоно визьлыко муртэз но, укылтэм муртэз кадь ик, пумтэм вапумъёс ӵоже тодазы уз возе; азьланяз созэ но, тазэ но вунэтозы; э-э, тани, визьлыко но, шузи но огкадь куло.17Мон улонэз адӟонтэм карыны кутски, малы ке шуоно шунды улын лэсьтӥськись ужъёс мыным синазькылесь потыны кутскизы; уго ваньмыз – алекъяськон – юнме дыр быдтон, духлэн-луллэн курадӟонэз-куректонэз!
18Шунды улын вань ужам ужме синазькыль карыны кутски, малы ке шуоно мон бере лыктоно адямилы сое мон кельтыны кулэ.19Но кин тодэ: визьлыко-а, шузи-а со луоз? Нош со мынам вань ужаса поттэм ваньбуреным кузёяськоз, кудзэ мон шунды улын улытозям ужаса-тыршыса, визьлыкен улыса люкай. Та но – алекъяськон – юнме дыр быдтон!20Соку мон ас сюлэмме оскытыны тырши – шунды улын улытозям вань ужъёсылэсь мед куштӥськоз шуыса.21Малы ке шуоно куд-огез адями визьмо, тодыса-валаса но азинлыко ужа, но со ваньзэ сётыны кулэ со бордын тыршымтэ адямилы, солэн со люкетэз шуэм кадь. Та но – алекъяськон – юнме дыр быдтон но туж бадӟым уродлык!22Шунды улын тыршыса вань ужам ужезлэсь, ас сюлмызлэн сюлмаськыса улэмезлэсь мар басьтоз адями?23Малы ке шуоно солэн вань нуналъёсыз куректон-кайгу пӧлын ортчо, ужъёсыз солы сюлэмшугъяськон ваё; уйин гинэ но солэн сюлэмыз каньыл улон уг шедьты. Та но – алекъяськон – юнме дыр быдтон!
24Сиыса, юыса улонлэн шумпотонэз но, аслэсьтыд лулдэ уженыд лӥятыса возён но адямилэн киулаз уг возиськы. Мон адӟи, та но Инмар киулысь потэ шуыса;25малы ке шуоно Сотэк кин быгатэ сиыны но эзылыса улыны?26Уго Аслаз азяз ӟеч сюлмын улӥсь адямилы Со визьлык, тодон-валан, шумпотон сётэ; нош сьӧлыко муртлы сюлмаськон сётэ – мед бичалоз, мед люкалоз – Инмар азьын ӟеч муртлы сётыны мед яралоз. Та но – алекъяськон – юнме дыр быдтон, духлэн-луллэн юнме курадӟонэз-куректонэз!
Глава 2
