Choose Language
Old Testament Books
New Testament Books
1Иакейлэн Агур пиезлэн верам кылъёсыз.
Инмар дорысь сётэм кылъёсыз,
та адями соосты Ифииллы, Ифииллы но Укаллы вераз:
2Зэм ик, вань адямиос пӧлысь мон тужгес но укылтэмез-йӧнтэмез,
адямилы сётӥськись визьмы ӧвӧл мынам,
3визьлыклы мон ӧй дышы, святойёс сярысь тодонэ но ӧвӧл.
4Кин инме тубаз но васьказ ни? Кин кырымаз тӧлэз люказ ни?
Кин вуэз дӥськут пушкы думылӥз ни?
Кин музъемлэсь вань пумъёссэ пуктылӥз?
Кызьы солэн нимыз? Кызьы солэн пиезлэн нимыз? Тодӥськод-а?
5Инмарлэн котькудӥз кылыз чылкыт;
Со вылэ оскиськыса улӥсьёс понна Со – щит.
6Со тынэсьтыд шекъёстэ шарае медаз потты шуиськод ке,
ӧрекчаськисьёс радэ кылемед уг ке поты,
Солэн кылъёсыз борды номыр но эн ватса.
7Мон Тынэсьтыд кык макеосты курисько,
кулэмелэсь азьло соосты сётыны пумит эн луы:
8алекъяськонэз но ӧрекчаськонэз мон бордысь палэнты,
куанер улонэз но, узырлыкез но мыным эн сёты, –
сиыны тырмымон нянен монэ тыр кар,
9ортчыт кӧты тырыса, Тынэсьтыд куштӥськоно медам луы,
тазьы шуоно медам луы: «Кин Кузё-Инмар?»,
нош куанерми ке, лушкаськыса медам ветлы,
Инмарелэсь нимзэ юнме верано медам луы.
10Кузёез азьын ляльчи сярысь урод кылъёс эн вера,
со тонэ каргано медаз луы, тон янгыше кылёно медад луы.
11Атайзэ каргась выжы вань, со анайзэ но бакель уг кары.
12Ассэ чылкыт шуись выжы вань,
нош ачиз кырсьёсызлэсь сузяськемын ӧвӧл.
13Вань выжы, кудӥзлэн – э! макем вылтӥяськисесь синъёсыз,
синкаӵъёсыз но макем вылэ ӝутэмын!
14Вань выжы, кудӥзлэн пиньёсыз – мечъёс, анлыосыз – пуртъёс,
музъем вылысь куанеръёсты ньылыны,
адямиос пӧлысь кураськисьёсты сыскыны дасесь соос.
15Кӧттырмостэмлэн кык нылъёсыз: «Вай, вай!»
Тани куинь кӧттырмостэмъёс,
«Тырмоз!» шуисьтэм ньыль макеос:
16дунне пыдэс, емыш вайисьтэм пуш,
вулы ӟудыса улӥсь пашмем музъем,
«Тырмоз!» шуисьтэм тыл.
17Атайзэ серем карись, анайлы тэрытсконэз кулэтэм карись
адямилэсь синъёссэ
нёжалысь вуэм кырныжъёс кокчалозы, ӧрӟилэн пиосыз сиёзы!
18Куинь макеос мон понна валаны луонтэмесь,
ньыльзэ но мон уг валаськы:
19ӧрӟилэсь инметӥ лобан сюрессэ,
кыйлэсь изгурезь бамалтӥ сюрессэ,
зарезь пыжлэсь зарезь шортӥ сюрессэ,
пиосмуртлэсь нылмурт доры сюрессэ.
20Таӵе ик калгись кышномуртлэн но сюресэз:
сиськиз, ымдурзэ ӵушиз но шуэ:
«Мон номыр но уродзэ ӧй лэсьты».
21Куинезлэсь музъем зурка,
ньыльзэ со вылаз нуллыны уг быгаты:
22эксэй луэм ляльчиез;
кӧтыз тырытозь нянь сиись укылтэм муртэ;
23картлы бызись возьыттэм кышномуртэ,
кузё кышноезлэсь интызэ басьтӥсь медо нылэз.
24Тани музъем вылысь ньыль покчиос,
но соос визьлыкоослэсь но визьлыкоесьгес:
25кузьылиос – кужмо калык ӧвӧл,
но гужем соос асьсэлэсь сиёнзэс дасяло;
26гурезь шыръёс – ляб калык,
но коркаоссэс изгурезь вылэ пуктыло;
27саранчалэн эксэез ӧвӧл,
но соос оградэн-огкылысь вырӟо;
28чонари кукъёсыныз шедьытӥське,
но эксэй юртъёсы но вуттӥське.
29Тани куинь йӧно вамышъясьёс,
ньыль веськрес вамыштӥсьёс:
30лев – пӧйшуръёс пӧлысь кужмоез,
нокинлэн азьысьтыз но уз кожытскы;
31эрвал, кечтака, [уллёлэн азьвалтӥсез,]
ас калыкез пӧлысь эксэй.
32Вылтӥяськись сямыныд укылтэм уж лэсьтӥд ке,
урод уж лэсьтыны малпад ке,
соку кидэ ым вылад пон;
33малы ке шуоно кызьы йӧлэз шуккыса вӧй поттӥськод,
ныре донгыса вир поттӥськод,
озьы ик, йыркурез ӝуатыса, даллашон поттӥськод.
Глава 30
