Choose Language
Old Testament Books
New Testament Books
1Сьӧлыкъёсыз-шекъёсыз понна шара пыкылыку,
адями сюлэмзэ чурытомытэ ке,
шӧдтэк шорысь со погралоз но уз ни бурмы.
2Шонер улӥсьёс трос луыку, калык шулдыръяське,
нош сьӧлыклэсь кышкасьтэм кузёяськыны кутске ке,
калык викышъя-лулӟылӥське.
3Визьлыкез яратӥсь адями атайзэ шумпоттэ,
нош кин калгись нылъёсын кусып возе, со ваньбурзэ тус-тас каре.
4Эксэй шонер суд пыр музъемез юнматэ,
нош кузьымъёсты яратӥсь – сое тарка.
5Эшез азьын чеберъяськись адями
эшезлэн азяз сьӧлтэтъёс пуктылэ.
6Лек муртлэн сьӧлыкез – аслыз сьӧлтэт,
нош шонер улӥсь шумпотэ, шулдыръяське.
7Шонер улӥсь пыр-поч эскере куанеръёслэсь судэ вуттэм ужзэс,
нош сьӧлыклэсь кышкасьтэм ужпумез уг эскеры.
8Азэм-сӧриськем адямиос городын улӥсьёсты бугыръяло,
нош визьлыкоос бугыръяськонэз чусомыто.
9Визьмо адями укылтэм муртэн судэ пыре ке, –
вожзэ поттэ-а, серекъя-а, – пушказ каньыллыкез ӧвӧл.
10Вир кисьтӥсьёс дун-шектэм муртэ синазькыль каро,
нош шонер улӥсьёс сюлмасько солэн улонэз пумысен.
11Укылтэм мурт вань йыркурзэ кисьтэ,
нош визьлыко мурт йыркурзэ кутыса возе.
12Кивалтӥсь йыр ӧрекчаськыса вераськонъёсты кылзэ ке,
соку солэн вань ужасьёсыз-медоосыз
сьӧлыклэсь кышкасьтэмесь луо.
13Куанер но ваньбурез капыръясь мурт ог-огенызы пумисько,
нош соизлэн но, таизлэн но син азяз югыт сётэ Кузё-Инмар.
14Эксэй куанеръёслэсь ужъёссэс шонерлыко радъя ке,
соку солэн престолэз пырак ӵожелы юнматскоз.
15Ньӧр но сьӧлыкъёсты-шекъёсты шарае поттон визьлык сёто;
нош пинал пи ас тодэмъяз кельтэмын ке,
аслаз анаезлы возьдаськон вае.
16Сьӧлыклэсь кышкасьтэмъёс трос луо ке,
законлы пумит улон йылэ,
нош шонер улӥсьёс соослэсь погранзэс адӟозы.
17Пидэ, кылзэ юаса, вӧсь кар, соку со тыныд каньыллык ваёз,
лулад-сюлмад шумпотон вуттоз.
18Вылысь усьтӥськон вуытэк, калык ашкынэ,
нош законэз чакласа-утьыса улӥсь – шудо адями.
19Кыл вераса, ляльчиез уд дышеты,
малы ке шуоно со соосты вала ке но, пеляз уг поны.
20Малпаськытэк вераськись муртэ адӟид-а?
Со вылэ сярысь, укылтэм мурт вылэ тросгес оскиськыны луэ.
21Ляльчиез пичи дырысеныз ик эркияса будэтӥд ке,
бӧрысь солэн кузё пи луэмез потоз.
22Йыркуръяськись адями керетон ӝутэ,
керӟегъяськись мурт трос сьӧлыка.
23Вылтӥяськон адямиез ултӥя,
нош зӥбыт-востэм мурт сӥ-дан басьтэ.
24Лушкаськисен огкыло кариськись
аслэсьтыз лулзэ синазькыль каре,
карган кылъёсыз кылэ, нош лушкаськон уж сярысь тодэмзэ уг вера.
25Адямиослэсь кышкаса улон сьӧлтэт пуктэ,
нош Кузё-Инмар вылэ оскиськыса улӥсь каньылэн, кышкатэк улоз.
26Тросэз кивалтӥсьлэсь ӟеч мылкыдо тусбуйзэ утчало,
нош адямилэн азьпал улонэз – Кузё-Инмар киын.
27Шонер улӥсьёс понна шонертэм ужъёс лэсьтӥсь мурт – юрӟым,
нош сьӧлыклэсь кышкасьтэмъёс понна юрӟым потэ
шонер сюрес кузя мынӥсь мурт.
Глава 29
