Choose Language
Old Testament Books
New Testament Books
1Сьӧлыклэсь кышкасьтэм пегӟе
нокин но со сьӧры уйиськымтэ дыръя,
нош шонер улӥсь лев кадь кышкасьтэм.
2Кун-страна законлэн сьӧраз потэ ке,
соку отын трос кивалтӥсь йыръёс,
нош визьмо, тодӥсь-валась кивалтӥсь дыръя
со трос-трос аръёс улэ.
3Ляб муртъёсыз ӝикатыса возись куанер адями –
ю-нянез гылтыса нуись дугдылытэк кисьтӥськись зор вулы укша.
4Законлэсь куштӥськемъёс сьӧлыклэсь кышкасьтэмъёсты ушъяло,
нош законэз утисьёс соос вылэ вожзэс потто.
5Лек адямиос шонерлыкез уг валало,
нош Кузё-Инмарез утчасьёс ваньзэ валало.
6Эсьмаса, куанер улӥсь мед луод, но дун-шектэм мед улод,
аслэсьтыз сюрессэ саптаса ветлӥсь луытозь, –
со узыр улӥсь мурт ке но.
7Законэз утись – визьмо пи,
нош ваньбурез пазясьёсын кусып возись аслэсьтыз
атайзэ возьытэ вуттыса ветлэ.
8Барыш поттон вылысь пунэмен уксё сётыса,
аслэсьтыз ваньбурзэ йылэтӥсь, мултэсмытӥсь
сое куанеръёслы юрттӥськисьлы бичалоз.
9Кин законэз кылзӥськонтэм понна пельзэ ӵокса,
солэн вӧсяськонэз но – юрӟымлык.
10Шонер улӥсьёсты лек улонлэн сюрес вылазы кожытӥсь
ачиз ик аслаз гуаз усёз,
нош дун-шектэм улӥсьёс ӟечлык басьтозы.
11Узыр адями ассэ ачиз визьнодчи шуыса малпа,
нош визьнодо куанер мурт солэсь шекъёссэ шара вералоз.
12Шонер улӥсьёс вормон басьтыку,
быдӟым данлык адямиос доры вуэ,
нош куке сьӧлыклэсь кышкасьтэмъёс вылэ ӝутско –
адямиос ватӥсько.
13Йыружъёссэ ватӥсь муртлэн азинлыкъёсыз уз луэ,
нош кин йыруж лэсьтэмзэ ватытэк вера,
йыружъёс лэсьтэмысь дугдэ,
солэн сьӧлыкъёсыз ӵушемын луозы.
14Шудо адями, кудӥз ялан Инмарлэсь кышканэн улэ,
нош сюлэмзэ лекомытӥсь мурт шугадӟон пӧлы сюроз.
15Бурсӥсь лев кадь, сютэм гондыр кадь ассэ возе
куанер калыкен кивалтӥсь, сьӧлыклэсь кышкасьтэм кузёйыр.
16Визьнодтэм кивалтӥсь троссэ ёртыса-ӝикатыса возе,
нош ӧрекчаськыса, ёртыса-ӝикатыса ваньбур люканэз
синазькыль карись трос аръёс улоз.
17Адями вирез кисьтыса янгыш луэм мурт,
кин ке но сое медаз куты шуыса,
шайгуэ пырытозяз пегаса ветлоз.
18Дун-шектэм улӥсь мурт вӧсь каремын уз луы,
нош кырыж сюресъёс кузя ветлӥсь мурт
одӥгаз сюрес вылаз погралоз.
19Музъемзэ утялтыса возись мурт нянен тыр улоз,
нош кин шулдыръяськыса улӥсьёслэсь адӟем каре,
со куанер улонэн кӧтсэ тыроз.
20Оскиськымон мурт ялан бакель каремын луоз,
нош кин узырмыны дыртэ, со вӧсь карытэк кельтэмын уз луы.
21Ымныр шоры учкыса улон – умой ӧвӧл:
сыӵе адями шорем нянь понна но шонертэм уж лэсьтоз.
22Вожъяськись мурт узырлык люканы дыртэ,
уг но малпа, куанер улон со доры вуоз шуыса.
23Адямилы тырмымтэоссэ азяз ик шара верась муртэ
бӧрысь золгес яратозы,
кылыныз чеберъяськыса вераськись муртэ сярысь.
24Кин анаезлэсь, атаезлэсь лушка но шуэ ке: «Та сьӧлык ӧвӧл»,
сыӵе мурт – таласькисьёслэн эшсы.
25Вылтӥяськись мурт керетон-даллашонэз аратэ,
нош Кузё-Инмар вылэ оскиськыса улӥсь мурт ӟечлык пӧлын улоз.
26Ас вылаз оскиськыса улӥсь мурт – укылтэм,
нош кин визьлыкен улэ, со быдэс кылёз.
27Кураськисьлы сётӥсь мурт уз куанермы,
нош кин кураськисез адӟе но синъёссэ пытса ке,
со доры трос карган вуэ.
28Сьӧлыклэсь кышкасьтэмъёс вылӥе ӝутско ке, адямиос ватӥсько,
нош соос пограло ке, соку шонер улӥсьёс йыло.
Глава 28
