Choose Language
Old Testament Books
New Testament Books
1Гужем шорын лымылэн усемез кадь ик,
аран вакытэ зор кисьтӥськем кадь ик
сӥ-дан уг тупа укылтэм муртлы.
2Кызьы ӟольгыри ӝогак лобӟыса кошке,
кызьы ваёбыж лобӟыса кошке,
озьы ик чик мугтэк вылад лэзем карган но куашка-быре.
3Сюло – валлы, сермет – ишаклы,
ньӧр – укылтэмлэн тыбыр вылызлы.
4Укылтэмен, ачид но солы укшась медад луы шуыса,
укылтэм кылын эн вераськы;
5укылтэмен укылтэм кылын вераськы,
ассэ ачиз визьлыко шуыса малпано медаз луы.
6Аслэсьтыз пыдзэ вандылэ, вӧсь луонэз чидано луэ со,
кин укылтэм муртлы кылын вераса косон сётэ ке.
7Чутӥсьлэн пыдъёсыз огкадь шонер уг вамышъяло,
озьы ик укылтэм муртлэн но кылысьтыз-ымысьтыз
шонер мадён уг поты.
8Из зӥръян пуньые дуно изэз понӥсьлы укша
укылтэм муртлы сӥ-дан кылъёс верась мурт.
9Укылтэм муртлэн кылысьтыз-ымысьтыз потӥсь мадён
кудӟем муртлэн киысьтыз бышкиськись жаг турынлы укша.
10Кужмо мурт ваньзэ ас тодэмезъя лэсьтэ:
укылтэм муртлы но мед-кузьым сётъя,
вань мынӥсь-ветлӥсьёслы но мед-кузьым сётъя.
11Кызьы пуны аслаз ӧскем дораз берытске,
озьы ик укылтэм мурт но укылтэм ужъёссэ
нош ик но нош ик лэсьтэ.
12Адӟид-а ни тон ассэ визьмо шуыса малпась адямиез?
Сыӵе муртлы оскиськытозь, укылтэм вылэ тросгес оскиськон.
13Азьтэм мурт шуэ: «Сьӧсь пӧйшур сюрес вылын!
Сьӧсь пӧйшур падвожъёсын сылэ!»
14Ӧс ӟирыез вылын берга,
нош азьтэм мурт валес вылаз погылляське.
15Азьтэм мурт кизэ тусьтые донге,
солы кизэ ым дураз вуттыны секыт потэ.
16Азьтэм мурт ассэ визьмын вераськись сизьым муртлэсь
визьмогес шуыса малпа.
17Вӧзтӥз ортчыкуз, мукетъёслэн керетон пушказы
нырзэ чуртнась мурт
айы пуныез пельтӥз кырмисьлы укша.
18Ассэ визьмыз сураськем мурт шуыса возьматӥсь адями
кызьы пазя тылэз, пукыӵ ньӧлъёсты но кулонэз,
19озьы ик лэсьтэ кескич амалэн эшезлы изъян вайись адями,
кин ачиз ик берло шуэ: «Мон серекъяса гинэ озьы кари ук!»
20Пу быре ке, тыл кысэ;
кыл нуллӥсь мурт ӧвӧл ни ке, отын керетон но уг ни луы.
21Эгыр – ӟырдытлы, пу – тыллы,
нош ӟургетӥсь адями керетонэз аратонлы кулэ луэ.
22Кыл нуллӥсьлэн кылъёсыз ческыт сиён кадесь,
соос мугор пушкы пыро.
23Ӟырдытэсь кылъёсын вераськись лек сюлэмо адямиос
чылкытатымтэ азвесен шобыртэм горшок кадесь.
24Тушмон кылыныз-ымыныз чеберъяське,
нош сюлмыныз кескич уж лэсьтыны малпаса улэ.
25Со ненег куараен ке но вераське, солы эн оскы,
малы ке шуоно солэн сюлмаз сизьым юрӟым макеос уло.
26Огназ улыку синазькыль каронзэ со ватыса возе ке,
уродэз-лекез калык ӧтчамын усьтӥськоз.
27Кин гу гудэ, со ачиз отчы усёз,
кин изэз бекмылляса вылэ тубытоз, со из ас дораз ик берытскоз.
28Ӧрекчаськись кыло-ымо адями
аслэсьтыз вӧсь карем муртъёссэ адӟемпотостэм каре,
ӧрекчаськись кыло-ымо адями аслыз усён-погран инты дася.
Глава 26
