Choose Language
Old Testament Books
New Testament Books
1Таос но Соломонлэн мадёнъёсыз,
соосты люказы Иудеялэн Езекия эксэезлэн адямиосыз.
2Инмарлэн данлыкез – ужез лушкемлыкен шобыртон,
нош эксэйёслэн данлыксы – ужез эскерон-чаклан.
3Кызьы инбамлэн ӝуждалаосыз, музъемлэн мурдалаосыз,
озьы ик эксэйёслэн сюлэмзы – эскерыны луонтэм.
4Сураськем-пожаськем люкетэз азвесьлэсь висъя,
соку азвесь тӥрлыкъёс лэсьтӥсьлэн сосудэз пӧрмоз;
5шонертэм улӥсез эксэй бордысь палэнты,
соку солэн престолэз шонерлыкен юнмалоз.
6Эксэй азьын астэ вылӥе эн пукты,
быдӟымъёслэн интыязы но эн султы;
7тыныд умойгес луоз, тазьы шуизы ке: «Лыкты, вылӥегес ӝутскы»,
ас синмыныд адӟем сӥё-дано адямиос азьын тонэ улӥе каремлэсь.
8Дыртыса, малпаськытэк ченгешыны-кыстаськыны эн кутскы,
уго мар тон лэсьтод пумаз, ченгешоно муртэд
тонэ возьытэ вуттыса куштӥз ке?
9Вожвылъяськись муртэныд ченгешон-кыстаськон уждэ ну,
нош мукет муртлэсь ватӥськыса улӥсь ужъёссэ-малпанъёссэ
шарае эн потты,
10та сярысь верамдэ кылӥсь мурт тонэ пыкылоно медаз луы,
соку сӥдэ-дандэ ыштод, сӥед-данэд соку тон дорысь кошкоз.
[Яратонэн эшъяськон судын кыстаськонлэсь мозмыто;
сантэмаськон киулэ медад сюры шуыса,
соосты аслыд карыны тыршы;
улон сюресъёсыд вылын ӟеч лэсьтыны тыршы.]
11Азвесьлэсь лэсьтэм пыр адӟиськись сосудъёсын возиськись
зарни улмоос – со ӟечен верам ӟеч кыл.
12Сак пель понна визьлыко пыкылон –
со зарни угы но чылкыт зарнилэсь лэсьтэм чеберъян.
13Ыстэм мурт оскиськымон ке,
со аран дыръя лымылэсь кылдэм сайкыт омыр кадь луэ
сое ыстӥсь мурт понна:
кузёезлэн лулызлы-сюлмызлы со шумпотон вае.
14Зор вайисьтэм пилемъёслы, тӧлъёслы укша
ӧвӧлтэм салам-кузьымъёсын ушъяськись адями.
15Зӥбыт-востэм улон пыр
кузёйырез гажан-жалян пала берыктыны луэ,
небыт кыл но быгатэ лыэз пыргытыны.
16Чечы шедьтӥд ке, си – кӧня тыныд кулэ,
медад гинэ голька но ӧскыса сое берен поттоно медад луы.
17Эшед доры укыр ӵем эн ветлы,
тонэн со акыляк потоно медаз луы,
тонэ синазькыль кароно медаз луы.
18Матысь муртэз вылэ ӧрекчаськыса ӧвӧлтэмзэ верась мурт
чекычлы, мечлы, лэчыт ньӧллы укша.
19Шугадӟон нуналэ оскиськыны ярантэм [мурт] вылэ
оскиськыса улон
тӥяськем пиньлы, ветлӥсьтэм-кынартэм пыдлы укша.
20Кезьыт нуналэ вылысьтыз дӥськутсэ кылем кадь,
яра вылэ уксус кисьтэм кадь луэ
ӝожомем сюлэмлы кырӟасьлэн кырӟамез.
[Кейлэн дӥськутэз куртчылэмез кадь,
писпуэз пычейлэн йыръемез кадь
ӝожомон адямилэсь сюлэмзэ вӧсь каре.]
21Тушмонэд сютэм ке, сое нянен сюд;
сюэз куасьме ке, вуэн секта,
22уго, [тазьы лэсьтыса], тон солэн йыр вылаз кисьтыны
ӝуась эгыръёс дасяськод,
Кузё-Инмар тыныд ӟечен берыктоз.
23Уйпал тӧл зор поттэ,
нош лушкемен кыл нуллон йыркурез пуромытэ.
24Эсьмаса, корка сиглэн сэрегаз улод,
ӟургетӥсь-гудӟиськись кышноен эркын корка пушкын улытозь.
25Пӧсяса жадем луллы макем ӟеч потэ салкым ву,
сокем дуно кыдёкысь шаерысь вуэм ӟеч ивор.
26Пожаськем ошмес кадь, сӧриськем колодча кадь
сьӧлыклэсь кышкасьтэмлэн азяз шонер улӥсьлэн усёнэз.
27Макем умойтэм трос чечы сиыны,
сыӵе ик умойтэм аслыд кужмысь данлык поттон, –
озьы поттэм данлык – со данлык ӧвӧл.
28Борддортэк кылем, куашкатэм город кадь
ассэ кутыны быгатӥсьтэм адями.
Глава 25
