Choose Language
Old Testament Books
New Testament Books
1Кузёйырен артэ сиськыны пуксид ке,
сак учкы, мар тынад азяд пуктылэмын,
2ньылондэ кут, туж ке но сиемед потэ.
3Солэн ческыт сиён-юонъёсыныз визь сынаськонэ эн сюры:
со – ӧрекчаськон сиён.
4Узырлык люкан сярысь эн сюлмаськы,
сыӵе малпанъёсыдлэсь куштӥськы.
5Со шоры тон синмыныд мыльккиськод, нош со ӧвӧл ини,
малы ке шуоно со аслыз бурдъёс лэсьтоз но
ӧрӟи кадь инме лобӟыса кошкоз.
6Вожъяськись муртлэсь сиёнзэ эн сиы,
солэн ческытэсь сиёнъёсыныз визь тугаськонэ эн сюры;
7малы ке шуоно лулаз-сюлмаз кыӵеесь солэн малпанъёсыз,
со ачиз но сыӵе ик;
«си, ю» – шуэ со тыныд, нош сюлмыныз со тонэн огазьын ӧвӧл.
8Сием нянь шоремдэ ӧскыса поттод,
ӟечесь кылъёстэ юнме гинэ арам карод.
9Укылтэм муртлэн пеляз мед кылоз шуыса эн вера,
малы ке шуоно со тынэсьтыд визьмоесь кылъёстэ кабыл уз басьты.
10Вашкала йыранэз-межаез интыысьтыз эн вырӟытъя,
анайтэм-атайтэм нылпиослэсь бусыоссэс аслыд таласа эн басьты,
11малы ке шуоно соослэн Дурбасьтӥсьсы кужмо:
Со соослэн тонэн кыстаськон ужазы пыриськоз.
12Сюлэмдэ дышетскон борды пон,
пельёстэ – визьмо кылъёс пала берыкты.
13Егит пиез вӧсь карытэк эн кельты:
ньӧраса вӧсь карид ке, со уз кулы;
14ньӧрын сое вӧсь карод но солэсь лулзэ ад пыдэсэ усёнлэсь утёд.
15Пие! Сюлмыд визьлыко луиз ке,
соку мынам но сюлмы шумпотоз.
16Кылыд-ымыд шонерзэ вераз ке, мынам но пушкы-еры шумпотоз.
17Сюлмыд сьӧлыкоослы медаз вожъяськы,
вань улоно нуналъёсыз ӵоже Кузё-Инмарлэсь кышканэн мед улоз,
18уго азьпалан улон вань, оскиськонэд ышемын-быремын ӧвӧл на.
19Кылзы, пие, визьлыко лу, сюлэмдэ шонер сюрес вылэ потты.
20Винаен усыкмемъёс пӧлын, сӥль сиыса куаемъёс пӧлын эн улы:
21уго юись мурт но, куаем мурт но куанермозы,
нырулыса улон соос вылэ ӟустари дӥсь дӥсялоз.
22Атаедлэсь верамзэ кылзы: со тонэ вордскытӥз;
анайдэ, пересьмиз ке, кулэтэм эн кары.
23Зэмлыкез дунэн басьты,
визьлыкез, дышетсконэз, визь-нодэз дунэн эн вуза.
24Шонер улӥсьлэн атаез шумпотэ-шулдыръяське,
визьлыко муртэ вордскытӥсь шумпотэ со понна.
25Атаед мед шумпотоз,
вордэм анаед шумпотоно-шулдыръяськоно мед луоз.
26Пие! Сюлэмдэ мон пала берыкты,
синъёсыд сюресъёсы шоры учкыса мед улозы,
27азӥсь-калгись кышномурт – пыдэстэм гу,
муртлэн кышноез – ёркыт гудӟем (колодча);
28со кышномурт, йырвандӥсь кадь, ватӥськыса пуке но
адямиос пӧлын законэз сӧрисьёслэсь лыдзэс йылэтэ.
29Кин дорын вузон? Кин дорын ӝуштон?
Кин дорын керетон? Кин дорын куректон-кайгу?
Кинлэн мугтэк яраосыз кылдэмын?
Кинлэн синъёсыз гордэктэмын? –
30Соослэн, кинъёс кема пуко вина дурын,
кинъёс сурам вина утчаса ветло.
31Вина шоры эн учкы, кызьы со гордэктэ,
кызьы со сюмыкын шукыяське,
кызьы со кӧт пушкы небытэн ваське,
32нош бӧрысь кый музэн со куртчоз, сьӧдкый кадь лексёз;
33синъёсыд мурт кышноос шоры учкыны кутскозы,
сюлмыд азон-калгон сярысь вераськыны кутскоз,
34соку тон зарезь шорын тулкымъёс вылын изись кадь луод,
тӧлполэн йылаз кӧлӥсь кадь луод.
35[Шуод:] «Жугизы монэ, мыным вӧсь ӧй вал;
монэ донгазы, мон ӧй шӧды.
Сайкай ке, нош ик вина утчало».
Глава 23
