Choose Language
Old Testament Books
New Testament Books
1Сӥё-сано ним бадӟым узырлыклэсь вылынгес,
ӟеч данлык азвесьлэсь, зарнилэсь дуногес.
2Узыр но, куанер но ог-огенызы пумисько:
созэ но, тазэ Кузё-Инмар кылдытӥз.
3Визьнодо мурт шугадӟонэз адӟе но ватӥське;
нош улонэз ляб тодӥсьёс азьлане мыно но вӧсь карон улэ сюро.
4Зӥбыт-востэм улон бордысь Кузё-Инмарлэсь кышкан,
узырлык, данлык пото,
озьы улон азинске.
5Бышкись будосъёс, сьӧлтэтъёс – кескич муртлэн сюрес вылаз:
кин лулзэ утьыны малпа, палэнскы соослэсь.
6Улон сюресэзлэн кутсконаз ик пинал пиез визьма-нодъя:
пересьмиз ке но уго, со вылысь со уз кожы.
7Узыр мурт куанерен кузёяське,
пунэм тыроно мурт пунэмен сётӥсьлэн ляльчиез луэ.
8Урод-лек улонэз кизись шугадӟонэз аралоз,
солэн вожпотонэзлэн бодыез чигиськоз.
[Капчи мылкыдын сётӥсез Инмар яратэ,
ужъёсаз маиз уг тырмы, ватсалоз.]
9Гажась-жалясь мурт бакель каремын луоз,
малы ке шуоно со куанер муртлы нянь люкетсэ сётэ.
[Кузьымъёс сётӥсь мурт вормон, сӥ-дан басьтэ,
таосты басьтӥсьёслэн лулзылы ик со кузё луэ.]
10Мыскылляськисез улляса лэзь – тупатэк улон кошкоз,
керетыса, даллашыса улон дугдоз.
11Сюлэмлэсь чылкытлыксэ яратӥсь мурт
визьмо, лякыт кылын вераське, эксэй – солы эш.
12Кузё-Инмарлэн синъёсыз тодон-валанэз утё,
нош законэз сӧрыса улӥсьлэсь кылъёссэ Со сэрпалтыса лэзе.
13Азьтэм мурт шуэ: «Ульчаетӥ сьӧсь пӧйшур ветлэ!
Падвожлэн шораз монэ виёзы!»
14Пыдэстэм мур гоп – азыса-калгыса ветлӥсь нылъёслэн ымзы:
Кузё-Инмар кинлы вожзэ поттоз, со мурт отчы усёз.
15Укылтэмъяськон егит пилэн сюлэм бордаз думиськиз,
но визьмась урыс сое со бордысь палэнтоз.
16Аслэсьтыз узырлыксэ йылэтон понна
адями куанер муртэ ултӥя ке,
узырлы кузьым сётъясь мурт но – куанермоз.
17Пельдэ мыкырты но визьлыкоослэсь верам кылзэс кылзы,
сюлэмдэ мынам тодон-валанъёсы пала берыкты,
18соосты тон сюлмад возид ке, шумпотыса улод,
соос тынад кыл-ым вылад улозы.
19Тынад оскиськонэд Кузё-Инмар вылын мед улоз шуыса,
мон тонэ туннэ но дышетӥсько, тае тодад возь.
20Мон тыныд куинь пол ӧй гожъя-а,
визь-кенешъёс сётъяса, визьмаса-нодъяса,
21зэмлыклэн шонер кылъёсызлы тонэ дышетыны малпаса,
тонэ ыстӥсьёслы зэмлыклэсь кылъёссэ тон вераны
мед быгатод шуыса ӧй гожъя-а?
22Куанер муртэ качась-талась эн луы, малы ке шуоно со куанер,
шудтэм муртэ кар капка вӧзысен эн ӝикаты, –
23Кузё-Инмар соослэн ужазы пыриськоз но
соосты таласьёслэсь лулзэс басьтоз уго.
24Йыркуръяськись муртэн эн эшъяськы,
лекез пурӟись муртэн кусып эн возь,
25солэн сюресъёсызлы медад дышетскы,
лулыд кыӵесэ медаз сюры шуыса.
26Кизэс мычыса пунэм тырон пумысен
кыл сётӥсь муртъёс кадь эн луы:
27тырыны коньдонэд ӧвӧл ке, улысьтыд валестэ басьтон дорозь
тон астэ со калэ вуттыны кулэ-а?
28Атайёсыдлэсь вашкала аръёсы тупатэм йыранзэс-межазэс
интыысьтыз эн вырӟытъя.
29Адӟид-а тон ас удысаз кужмо ужась муртэ?
Со мурт эксэйёс азьын сылоз, огшоры адямиос азьын со уз сылы.
Глава 22
