Choose Language
Old Testament Books
New Testament Books
1Эксэйлэн сюлмыз – Кузё-Инмарлэн кияз визыл кошкись ву кадь:
кытчы берыктэмез потэ, сое Со отчы берыктэ.
2Адямилэн син азяз вань сюресъёсыз шонересь адӟисько,
нош Кузё-Инмар солэсь сюлэмзэ эскере-чакла.
3Курбон сётон сярысь, зэмлыкез утён, шонер судить карон
Кузё-Инмарлы ярамонгес.
4Вылтӥяськись синъёс, йӧнъяськись сюлэмъёс –
сьӧлыклэсь кышкасьтэмъёслэн тодметсы, со – сьӧлык.
5Тыршись муртлэн малпанъёсыз ваньлык пала кыстӥсько,
нош котькудӥз дыртӥсь адями ыштонъёс адӟоно луэ.
6Ӧрекчаськыса поттэм бадӟым узырлык асьсэлы кулон утчасьёслэн
ӝог ортчись-кошкись шоканзылы укша.
7Сьӧлыклэсь кышкасьтэмъёслэн лек ужъёссы асьсэ вылэ вуоз,
малы ке шуоно шонерлыко улонлэсь соос куштӥськизы.
8Сӧриськем-саптаськем адямилэн сюресэз мыдлане мынэ,
нош чылкыт муртлэн ужез шонер улон пала мынэ.
9Ӟургетӥсь кышноен бадӟым коркан улытозь,
эсьмаса корка сиглэн сэрегаз улод.
10Сьӧлыклэсь кышкасьтэмлэн лулыз уродэз-лекез утча,
солэн эшез но солэсь гажан-жалянзэ уг адӟы.
11Возьытлыкез тодӥсьтэм муртэ вӧсь карыку,
огшоры муртлы визьлык пыре;
визьлыко муртлы визь-нод сётӥськыку, со тодон-валан басьтэ.
12Шонер улӥсь сьӧлыклэсь кышкасьтэмлэсь юртсэ чакла:
адӟе, кызьы сьӧлыклэсь кышкасьтэмъёс шугадӟон пӧлы сюро.
13Куанер мурт викышъяса бӧрдыку, кин пельёссэ ӵокса,
со ачиз викышъяса бӧрдыны кылёз – сое нокин но уз кылы.
14Лушкем сётэм кузьым йыркурез кысэ,
пие-ӟепе понэмез кужмо вожпотонэз дугдытэ.
15Шонер судить карон – шонер улӥсь понна шумпотон,
нош урод лэсьтӥсьёсты со кышкатэ.
16Визьнодо улонлэн сюрес вылысьтыз кожем мурт
кулэмъёслэн люкаськоназы улыны сюроз.
17Шулдыръяськыса улонэз яратӥсь куанермоз;
винаез, кӧй-вӧез яратӥсь уз узырмы.
18Шонер улӥсез утён понна сьӧлыклэсь кышкасьтэмез сётозы,
нош оскиськымон адямиез утён понна кескич адямиез сётозы.
19Ӟургетӥсь, лек кышноен улытозь,
эсьмаса, кыр музъемын улод.
20Синмаськымон ваньбур но кӧй-вӧй –
визьлыко муртлэн юртаз возисько,
нош укылтэм мурт соосты тус-тас каре.
21Шонер улонэз, гажан-жалянэз тодӥсь мурт
шонерлыко, данлыко улонэз шедьтоз.
22Визьлыко адями кужмоослэн городазы пыре но
соослэсь оскиськыса улоно изкарзэс куашкатэ.
23Ымзэ но, кылзэ но кутыны быгатӥсь мурт
лулзэ шугадӟонлэсь уте.
24Возьытэз тодӥсьтэм лек мурт – «мыскылляськись» солэн нимыз –
вылтӥяськонэз ӝуатскыку, ужзэ лэсьтэ.
25Азьтэм муртэ ас мылкыд каронъёсызъя улэмез виёз,
уго солэн ас киосыныз уж борды кутскемез уг поты;
26ялан солэн оломар но аслыз басьтэмез потэ,
нош шонер улӥсь жалятэк сётъя.
27Сьӧлыклэсь кышкасьтэмъёслэн курбонзы юрӟым,
уката ик кескич мылкыдын сое ваё ке.
28Судын ӧрекчаськыса ӧвӧлтэмез вань карыса верась кулоз-быроз,
нош тодэмзэ ӧрекчатэк верась кема улоз.
29Сьӧлыклэсь кышкасьтэм адямилэн ымнырыз ик возьыттэм,
нош шонер улӥсь шонер сюрес кузя вамышъя.
30Кузё-Инмарлы пумитъяськыны визьлык но, визь-нод но,
визь-кенеш но уз юрттэ.
31Валэз ожмаськон нуналлы дасяло,
нош вормон – Кузё-Инмар дорысь потэ.
Глава 21
