Choose Language
Old Testament Books
New Testament Books
1Вина адямиез ченгешись каре, сикера – жугиськись каре;
таосты яратӥсь мурт – со визьзэ ыштэм мурт.
2Эксэйлэн вожпотонэз сьӧсь пӧйшурлэн бурсэмезлы укша:
кин солэсь вожзэ поттэ, со аслыз ачиз пумит сьӧлыка.
3Адями керетонлэсь палэнске ке, солы сӥ но дан,
нош вань укылтэмъёс керетыны задоресь луо.
4Азьтэм мурт кулэ дыръя уг гыры:
аран дыр вуэ ке, со утчаны кутске,
нош солэн номыриз но ӧвӧл.
5Адямилэн сюлмаз малпанъёсыз – мур азьысь вуос,
соосты визьнодо адями гинэ омыръяса поттоз.
6Гажась-жалясь луэмез понна тросэз адямиез ушъяло,
нош шонер улӥсь адямиез кин утчаса шедьтэ?
7Шонер улӥсь дун-шектэм куеныз ветлэ:
со бере кылем нылпиосыз шудоесь луо!
8Судлэн престол вылаз пукись эксэй
синмыныз вань уродэз-лекез котырысьтыз улля.
9Кин тазьы шуыны быгатоз «мон сюлэмме сузяй, чылкытатӥ,
мон сьӧлыкъёсылэсь мозмытски»?
10Кык пумо гираос, кык пумо мертэтъёс, –
соосыз но, таосыз но Кузё-Инмарлы юрӟымесь пото.
11Пинал пиез но ужъёсызъя тодманы луоз:
чылкыт-а со, шонерлыко-а со ассэ возёз?
12Кылӥсь пелез, адӟись синмез –
созэ но, тазэ но Кузё-Инмар кылдытӥз.
13Куанермемед уг ке поты, изёнэз эн яраты;
синъёстэ кыньытэк ул, соку кӧтыд тырымон нянь сиёд.
14«Урод, урод» – шуэ басьяськись,
нош палэнске ке, ушъяське.
15Зарни но вань, марӟан но трос,
нош ваньмызлэсь дуно тӥрлык – визьмо кылын вераськись ым.
16Басьты солэсь дэремзэ, уго со мурт адями понна
кыл сётыса дурбасьтӥз;
палэнысь мурт понна солэсь залог басьты.
17Шонертэм амалэн поттэм нянь адямилы нырысь ческыт потэ,
нош бӧрысь солэн ым пушказ потнянь кадь кӧш потоз.
18Малпам ужрадъёс юнмало, соосты кенешыса лэсьтӥськод ке,
кенешем берад гинэ ожмаськыны кутскы.
19Кин кыл нуллыса ветлэ, со вераны лэзьымтэ кылэз шарае поттэ,
ымзэ паськыт усьясь муртэн кусып эн возь.
20Кин аслэсьтыз атайзэ, аслэсьтыз анайзэ лек кылъёсын куаретэ,
солэн югыт сётӥсез тём-тём пеймыт дыръя кысоз.
21Нырысь ик дыртыса киултэм ваньбур бӧрысь бакель уз кариськы.
22Эн шуы: «Урод уж понна мон пунэмзэ берыкто»;
та ужез Кузё-Инмар кие сёт, Со тонэ утёз.
23Кузё-Инмар азьын юрӟым адӟиське
пӧртэм кыскись гираосты уже кутон,
шонертэм мертась весъёс – ӟечлы ӧвӧл.
24Кузё-Инмар адямиез азьлане вамышъятэ;
адями нош кызьы меда тодоз аслэсьтыз сюрессэ?
25Адямиез дыртыса сӥзиськон сьӧлтэтэ пыртэ,
сӥзиськем бераз гинэ со малпаське ке.
26Визьлыко эксэй сьӧлыклэсь кышкасьтэмъёсты тӧлоз,
соос вылэ кутсаськон поглянэз берыктоз.
27Кузё-Инмарлэн лампадаез –
сюлэмлэсь вань пыдлось интыоссэ эскерись-чаклась
адямилэн духез.
28Гажан-жалян но зэмлык утё эксэез,
гажан-жалянэн со юнматэ аслэсьтыз престолзэ.
29Егит пиослэн данлыксы – соослэн кужымзы,
нош пересьёслэн чебер адсконзы – пурысьтам йырси.
30Жугем бервылысь яраос уродлыклэсь эмъяло,
мугор пушкы пырем тышкамъёс
сюлэмлэсь пыдлось интыоссэ чылкытато.
Глава 20
