Choose Language
Old Testament Books
New Testament Books
1Эсьмаса, куанер улӥсь мед луоз, но дун-шектэм со мед улоз,
[узыр], ӧрекчаськись, эшшо ке, укылтэмъяськыса улӥсь луытозь.
2Тодон-валантэк адямилы умой ӧвӧл улыны,
пыдыныз дыртӥсь мурт но ӵемтэ уго.
3Адямилэн укылтэм улэмез солэсь сюрессэ сапта,
нош сюлмыз Кузё-Инмарлы вожзэ поттэ.
4Узырлык трос эшъёс вае,
нош куанер мурт бордысь одӥг эшез – со но солэсь палэнске.
5Судын ӧрекчаськыса ӧвӧлтэмзэ верась
вӧсь карытэк кельтэмын уз луы,
ӧрекчаськыса вераськись мурт уз утиськы.
6Нимо-дано адямиос азьын тросэз чеберъяськыса верасько,
кузьым сётъясь адямилы – котькин эш.
7Куанер муртэ вань агай-вынъёсыз синазькыль каро,
уката ик эшъёсыз – бордысьтыз ик палэнско:
соосын вераськон вылысь со соослэн сьӧразы уйиськыса мынэ,
но со но уг пӧрмы.
8Визь-нод басьтӥсь мурт аслэсьтыз лулзэ яратэ;
ӟеч визьмын улӥсь мурт ӟечлык шедьтэ.
9Судын ӧрекчаськыса ӧвӧлтэмзэ верась
вӧсь карытэк кельтэмын уз луы,
ӧрекчаськыса вераськись мурт кулоз-быроз.
10Укылтэм муртлы узырлык пӧлын майбыр улон уг тупа,
уката ик уг тупа ляльчилы кивалтӥсь йыръёсын кузёяськон уж.
11Визьмын улон адямиез йыркуръяськыны дыг каре,
солэн данэз – янгыш ужъёсты лэсьтыку чидась луон.
12Эксэйлэн йыркурез сьӧсь пӧйшурлэн вузэмезлы укша,
нош солэн ӟеч эрикез – турын вылэ усись лысву кадь.
13Укылтэм пи – атаезлэн чигиськонэз,
ӟургетӥсь кышно – дугдылытэк шапыкен виясь ву.
14Коркаен ваньбур – анай-атай киысь сюрем люкет,
нош визьмо-нодо кышно – Кузё-Инмарлэн сётэм ӟечлыкез.
15Азьтэмъяськон мур умме уськытэ,
сюлмаськисьтэм-тыршисьтэм мурт сютэм улонэз адӟоно луоз.
16Курон-косонэз утись – лулзэ уте,
нош улон сюресэз сярысь сюлмаськисьтэм мурт кулоз-быроз.
17Куанерлы ӟеч лэсьтӥсь мурт Кузё-Инмарлы пунэмен сётэ,
нош Со солэн ӟеч ужез понна пунэмзэ берыктоз.
18Оскиськон вань на дыръя пиедлэсь кылзэ юа,
со кесяськиз ке, вождэ эн потты.
19Йыркуръяськись мурт вӧсь каронэз мед чидалоз,
малы ке шуоно жаляд ке, эшшо золгес сое вӧсь кароно луод.
20Визь-кенешез кабыл басьты,
сьӧлыктэ-шектэ шарае поттэмез санэ пон
азьланяз визьлыкогес луон понна.
21Адямилэн сюлмаз трос малпанъёсыз,
но Кузё-Инмарлэн сётэмъёсыз гинэ быдэсмозы.
22Адямилэн шумпотонэз – ӟеч лэсьтон;
куанер улӥсь адями ӧрекчаськись муртлэсь умойгес.
23Кузё-Инмарлэсь кышкан улэп улонэ нуэ,
Кузё-Инмарлэсь кышканэн улӥсь мурт тыр луоз,
уродлык со доры уз вуы.
24Азьтэм мурт кизэ тэркые донге но
ым дорозяз сое нуэмез уг ни поты.
25Мыскылляськись муртэ тынэсьтыд вӧсь каремдэ
огшоры мурт адӟе ке, со но визьмаське;
визьнодо муртлэсь сьӧлыксэ-шексэ шарае поттӥд ке,
со индылонъёстэ валалоз.
26Атайзэ тырттэм кельтӥсь, анайзэ коркасьтыз уллясь –
возьытэз тодӥсьтэм юрӟым пи.
27Пие, визьнодо веранъёслэсь палэнскыны дышетӥсьёсты
кылзэмысь дугды.
28Адӟемзэ-кылэмзэ судын кескичъяськыса верась мурт
судэз мыскыл каре,
законлы пумит улӥсьёслы шонертэм улон ческыт потэ.
29Мыскылляськисьёслы судъёс дасесь,
укылтэмъёслэсь тыбыр вылзэс жугыса вӧсь карон но дась улэ.
Глава 19
