Choose Language
Old Testament Books
New Testament Books
1Ас тодэмъяз улӥсь мурт эзылон мылкыдын улонэз утча,
мар вань визьмоез, солы пумит султэ.
2Укылтэм мурт тодон-валанэз уг яраты,
со аслэсьтыз визьзэ гинэ возьматыны тырше.
3Сьӧлыклэсь кышкасьтэм лыктӥз ке, адӟонтэм карон но лыктоз,
нош сӥтэм-сантэм луонэн ӵош ултӥян вуоз.
4Адямилэн ымысьтыз потэм кылъёс – мур вуос;
визьлыклэн ошмесысьтыз визыл кошкись ву потэ.
5Сьӧлыклэсь кышкасьтэмлы кельшыны тыршыса,
судын шонер улӥсез погыртыны тыршон – ярамон уж ӧвӧл.
6Укылтэм муртлэн ымыз керетонэ-даллашонэ мынэ,
солэн кылъёсыз жугиськонэ вутто.
7Укылтэм муртлэн кылыз аслыз бырон вае,
ас ымысьтыз потэм кылъёсыныз со лулзэ сьӧлтэтэ пыртэ.
8[Азьтэм муртэ кышкан погыртэ,
нош кышномуртъёслы укшась пиосмурт лулъёс сютэм улозы.]
9Кыл сёткасьлэн кылъёсыз ческыт кампет кадесь,
соос кӧт пушкы пыро.
10Сюлэмзэ понытэк ужась мурт – тус-тас карисьлэн агай-выныз.
11Кузё-Инмарлэн нимыз – юн изкар:
отчы шонер улӥсь ватӥське но солы кышкыт ӧвӧл ини.
12Узыр мурт понна аслаз ваньбурез юнматэм город кадь потэ,
солэн син азяз со ӝужыт кенер-борддор кадь пуксе.
13Усён азяз адямилэн сюлмыз вылтӥяськыны кутске,
нош зӥбыт-востэм улон данлык вае.
14Йылозяз-пумозяз кылзӥськытэк ответ сётӥсь мурт –
укылтэм мурт, солы возьыт луыны кулэ.
15Адямилэн духез висёнъёссэ-ляблыкъёссэ чиданы кужым сётэ,
нош висись-чигиськись духез кин юнматыны быгатоз?
16Визьмо-нодо муртлэн сюлмыз тодонлык шедьтэ,
визьлыко муртъёслэн пельзы тодонлык утча.
17Адямилэн кузьымез солы сюрес усьтэ,
кузёйыръёс доры сое вуттоз.
18Ченгешонэз-кыстаськонэз нырысь кутскись мурт
шонер лэсьтэ кадь потэ,
но соин вожвылъяськись мурт лыктэ но
юалляськыса сое эскере-чакла.
19Пус чӧлтон ченгешонэз дугдытэ,
кужмоос куспын кусыпез тупатэ.
20Йыркурен пурӟем агай-вын
юнматэм городлэсь но вормыны луонтэм луэ,
керетонъёс-даллашонъёс
изкарлэсь капказэ пытсась тунгонъёслы укшало.
21Адями аслэсьтыз кӧтсэ ымысьтыз емышен тыре,
ас ымысьтыз потэм кылъёсыныз со ассэ сюдэ.
22Кулон но улон – кыллэн киулаз уло,
сое яратӥсьёс солэсь емышсэ оскалтозы.
23[Ӟеч] кышно шедьтӥсь мурт, ӟечлык шедьтӥз,
Кузё-Инмар дорысь дэлет басьтӥз.
[Ӟеч кышнозэ уллясь мурт аслэсьтыз шудзэ улля,
нош азыса-калгыса улӥсь кышномуртэз дораз возись –
визьзэ ыштэм, сьӧлыклэсь кышкасьтэм мурт.]
24Кураськись тэльмырыса вераське,
нош узыр мурт чурыт кылын ответ сётэ.
25Аслыз эш утчась мурт ачиз эшъяськонэз яратӥсь мед луоз;
озьы но луэ: зэмос эш агай-вынлэсь но матынгес луыны быгатэ.
Глава 18
