Choose Language
Old Testament Books
New Testament Books
1Коркадэ вандэм пудо сӥлен тырмытытозь,
отын керетыса-даллашыса уло ке,
эсьмаса, куасьмем нянь туриж сиёд,
но со понна тупаса улон мед луоз.
2Визьнодо ляльчи укылтэм пиен кузёяськыса улэ,
агай-вынъёсын ӵош со но люкет басьтоз.
3Азвесез ӵыжатыны пурты вань,
зарниез ӵыжатыны ӟырдатэм гур вань,
сюлэмез чакланы-эскерыны – Кузё-Инмар вань.
4Лек мурт законлы пумит улӥсьёслэсь кылзэс санэ понэ,
ӧрекчи мурт лулэз быдтӥсьлэсь верамзэ кабыл басьтэ.
5Кураськисез тышкаськись мурт солэсь Кылдытӥсьсэ сантэма;
шугадӟонэ сюремлы шумпотӥсь мурт
вӧсь каронэз адӟытэк уз кыльы,
[нош гажась-жалясь муртэ ассэ но жалялозы].
6Пересьёслэн венец изьызы – пиоссылэн пиоссы,
нылпиослэн данъяськонзы – анай-атайёссы.
[Оскиськымон муртлэн быдэс дунне узырлыкез,
нош оскиськыны ярантэм муртлэн одӥг копейкаез но ӧвӧл.]
7Укылтэм муртлэн сӥё-дано ужъёс сярысь вераськемез
чебер уг кылӥськы,
уката ик нимо-дано муртлэн ӧрекчаськыса вераськемез
мылкыдэз сӧре.
8Барыш поттон вылысь кузьым сётъясь
аслэсьтыз кузьымзэ дуно из шуыса малпа:
кытчы гинэ со уз мыны, отысь пайда басьтоз, кожа.
9Яратонэн улонэз утчась мурт кӧтӝожзэ вунэтэ,
нош уродэз вунэтӥсьтэм мурт эшсэ ыштэ.
10Визьмо мурт сьӧлыкез-шекез понна шара пыкылэмез
кабыл басьтэ,
нош укылтэм мурт сю пол ньӧрын шуккем бере но уг вала.
11Бугыръяськись мурт уродлыкез гинэ утча,
со понна ик солэн пумитаз
жалянэз тодӥсьтэм кылчин лэземын луоз.
12Адямилы умойгес питэк кылем мумы гондырез пумитаны,
укылтэм муртэ укылтэм ужъёсыныз валче пумитан сярысь.
13Ӟечлык понна уродэн пунэмзэ берыктӥсьлэн юртысьтыз
уродлык уз кошкы.
14Керетонлэн кутсконэз ӧрзэ кырыса кошкись ву кадь;
сюлмыд бугыръяськыны кутскемезлэсь азьло
керетон мылкыддэ кыс.
15Сьӧлыклэсь кышкасьтэм муртэ шонере поттӥсь но
шонер улӥсез янгыше уськытӥсь –
кыксы но Кузё-Инмар азьын юрӟымесь.
16Марлы укылтэмлэн кияз узырлык?
Визьлык басьтон понна солэн визьмыз ӧвӧл.
[Корказэ вылэ ӝутӥсь мурт усён утча;
нош дышетсконлэсь палэнскись мурт шугадӟонъёс пӧлы усе.]
17Эш эшсэ котькыӵе дыре но яратэ,
шуге-леке сюрыку, агай-вын кадь со юрттыны лыктэ.
18Вакчи визьем адями кизэ сётэ,
матысь муртэз понна кыл сётыса дурбасьтэ.
19Кин керетыса-ченгешыса улэ, со сьӧлыкез яратэ;
кин капкаоссэ вылӥе ӝутэ, со усён инты утча.
20Кескич сюлэм ӟечлык уз шедьты,
кескич кыло мурт шугадӟонэ сюроз.
21Укылтэм муртэ вордскытӥсь аслыз кайгулы сое вордскытӥз,
укылтэмлэн атаез со понна шум уз поты.
22Шулдыр сюлэм ӟеч эмъюм кадь,
нош ӝожомыса улӥсь лул лыэз куасьтэ.
23Шонер судлэсь сюресъёссэ кырыжтон понна
сьӧлыклэсь кышкасьтэм пиысьтыз-ӟепысьтыз кузьым поттэ.
24Визьлык – визьнодолэн азяз улэ,
нош укылтэмлэн синъёсыз музъемлэн пумъёстӥз ветло.
25Укылтэм пи атайлы ӝожлык вае, анаезлы кайгу сётэ.
26Умой ӧвӧл шонер муртэ янгыше уськытыны,
шонерлыксы понна кузёйыръёсты жугыны.
27Визьмо адями кылзэ кутыны быгатэ,
визьнодо мурт ассэ бугыръяськыны уг лэзьы.
28Укылтэм мурт но, чус улыкуз, визьмо мурт кадь адӟиське,
ымзэ ворса ке, визьнодо кадь потэ.
Глава 17
