Choose Language
Old Testament Books
New Testament Books
1Адями малпанъёссэ сюлмаз нуллэ,
нош кыл кутонэз – Кузё-Инмар дорын.
2Адямилы аслаз син азяз вань сюресъёсыз чылкытэсь пото,
нош солэсь лулзэ Кузё-Инмар чакла-эскере.
3Ужъёстэ Кузё-Инмар кие сёт, соку мытэм ужъёсыд быдэсмозы.
4Кузё-Инмар ваньзэ Аслыз кызьы кулэ, озьы кылдытӥз;
сьӧлыклэсь кышкасьтэмез – шугадӟон нуналэ кыл кутытон понна.
5Котькудӥз но вылтӥяськись сюлэм Кузё-Инмарлы юрӟым потэ,
кыл сётыса вераны луоз: со вӧсь карытэк кельтэмын уз луы.
[Ӟеч сюреслэн кутсконэз – шонер ужъёс лэсьтон;
курбонъёс сётон сярысь таиз Инмарлы ярамонгес.
Кузё-Инмарез утчась мурт тодон-валанэз
шонерлыкен валче шедьтэ;
сюлмысь Сое утчась муртъёс каньыллык шедьтозы.]
6Гажан-жалян пыр, шонер улон пыр сьӧлыкъёс сузясько;
Кузё-Инмарлэсь кышкан уродлэсь-леклэсь палэнтэ.
7Адямилэн сюресъёсыз Кузё-Инмарлы ярамонэсь ке,
соку Со солэсь тушмонъёссэ но соин тупатскытэ.
8Бадӟым барышез шонертэм амалэн поттытозь,
эсьмаса, ваньбуред ӧжыт мед луоз,
но со шонерлыкен поттэмын мед луоз.
9Адямилэн сюлмыз ас сюресэз сярысь малпаське,
нош сюрес вылтӥз мынонэн Кузё-Инмар кивалтэ.
10Эксэйлэн кылаз-ымаз Инмар дорысь потэм кыл улэ;
судын солэн кылыз-ымыз сьӧлыканы кулэ ӧвӧл.
11Шонер мертась вес, веслэн тэркыосыз – Кузё-Инмарлэн сётэмез,
Солэн ик сётэм вань гираосыз сумкаын возисько.
12Эксэйёс понна юрӟым уж – законлы пумит уж лэсьтон,
малы ке шуоно престол шонерлык вылын возиське.
13Эксэйлы кельшо шонер кылъёс верась ымъёс,
зэмлыкез верась муртэ со яратэ.
14Эксэйлэн вожпотонэз – кулонлэн иворчиез,
но визьлыко адями буйгатоз сое.
15Эксэй лякыт синмын учке ке, отын – улон,
солэн ӟеч эрикез кулэ дыре вуись зоро пилем кадь.
16Визьлык люкан трослы умойгес зарнилэсь,
визь-нод люкан ӟечгес быръем-сузям азвесьлэсь.
17Шонер улӥсьёс уродлэсь-леклэсь палэнско;
улон сюрессэ чакласа-эскерыса улӥсь мурт лулзэ уте.
18Кулонлэн-быронлэн азьпалтӥз вылтӥяськон ветлэ,
усёнлэн-погранлэн мугез – возьытэз тодытэк улон.
19Вылтӥяськисьёсын ӵош талам ваньбурез люкылыса улытозь,
умойгес зӥбыт-востэмъёсын огазе кариськыса улыны.
20Визьмо ужась мурт ӟечлык шедьтэ;
Кузё-Инмар вылэ оскиськись мурт – шудо.
21Сюлмыныз визьмо улӥсь мурт визьнодо адями шуыса нимаське,
ческыт кылъёсын дасям дышетонэз ӟечгес кабыл басьто.
22Визь, кинлэн со вань, – со улон сётӥсь ошмес,
нош укылтэмъёслэн дышетонзы укылтэмлык ик вань.
23Визьмо муртлэн сюлмыз верано кылъёссэ визьлыкоесь каре,
солэсь тодон-валанзэ будэтэ.
24Небыт кылын вераськон – карасэн чечы,
луллы со ческыт, лыослы бурмон сётэ.
25Куд-ог сюресъёс адямилы шонересь кадь пото,
нош соос кулонэ нуо.
26Ужасьлэн сием потэмез ужаны косэ, кӧт сюман сое озьы ужатэ.
27Кескич сямо адями уродлык лэсьтыны малпаса улэ,
кылаз-ымаз солэн ӵушкась тыл улэ.
28Кескич адями керетон-даллашон кизе,
кыл нуллӥсь – эшъёсты люке.
29Ӟеч малпасьтэм адями матысь муртсэ
шонер сюрес вылысь кожытэ,
умойтэм сюрес вылэ нуэ;
30синъёссэ кырмыштэ кескич уж малпан понна;
ымдурзэ куртчыса, лек уж лэсьтэ;
[со – лекъяськонлэн ӝуась гурез].
31Пурысьтам йырси – со данлыкен пиштӥсь венец изьы,
шонерлыко улонлэн сюрес вылтӥз мынӥсьлы со сётӥське.
32Кема чидась мурт кышкасьтэм муртлэсь умойгес,
ассэ кутыны быгатӥсь мурт
городэз киултыны быгатӥсьлэсь вылынгес.
33Адямиос пус чӧлто, но солэн ответэз Кузё-Инмар дорын.
Глава 16
