Choose Language
Old Testament Books
New Testament Books
1[Йыркуръяськон визьнодоосты но вие-быдтэ.]
Зӥбыт-востэм верам кыл йыркурез кысэ,
нош сантэмась кыл йыркурез ӝуатэ.
2Визьлыкоослэн кылзы ӟеч тодон-валан сётэ,
нош укылтэмъёслэн ымзы укылтэм кылъёс вера.
3Кузё-Инмарлэн синмыз ваньзэ адӟе:
уродъёсты но, ӟечъёсты но Со адӟе.
4Зӥбыт-востэм кыл – улон писпу,
нош серметамтэ кыл-ым сюлэмлы чигиськон вае.
5Укылтэм мурт атаезлэсь визьмамзэ-нодъямзэ санэ уг поны;
нош кин атаезлэсь пыкылэмзэ-нодъямзэ кабыл басьтэ,
со – визьмо мурт;
[зэмлык туж бадӟым ке, отын бадӟым кужым,
нош сьӧлыклэсь кышкасьтэмъёс музъем вылысь быдтэмын луозы.]
6Шонер улӥсьлэн корказ пачылаз ваньбурез,
нош сьӧлыклэсь кышкасьтэмлэн ваньбур люкамез куашканэ нуэ.
7Визьлыкоослэн кылзы-ымзы тодон-валан вӧлмытэ,
нош укылтэмъёслэн сюлэмзы озьы уг кары.
8Сьӧлыклэсь кышкасьтэмъёслэн курбон сётэмзы
Кузё-Инмарлы юрӟым потэ,
нош шонер улӥсьёслэн вӧсяськемзы Солы ярамон.
9Сьӧлыклэсь кышкасьтэмлэн сюресэз Кузё-Инмарлы юрӟым потэ,
нош шонерлыклэн сюрес кузяз мынӥсез Со яратэ.
10Шонер сюрес вылысь кожись доры лек вӧсь карон вуэ;
сьӧлыкъёссэ-шекъёссэ шарае поттэмез синазькыль карись мурт
кулоз-быроз.
11Кузё-Инмарлэсь ад пыдэс но, аваддон но ватэмын ӧвӧл,
уката но адями пиослэсь сюлэмъёссэс Со адӟе.
12Укылтэмъяськыса улӥсь
сьӧлыкъёссэ-шекъёссэ шарае поттэмез уг яраты,
визьлыко муртъёс доры со уз мыны.
13Шулдыр сюлэм ымнырез но шулдыр тусъем каре,
нош сюлэм ӝожомыса улыку, лул куректэ.
14Визьнодолэн сюлмыз тодон-валан утча,
нош укылтэмъёслэн кылзы-ымзы укылтэмлыкен пачылмыса улэ.
15Шудтэм муртлэн вань нуналъёсыз ӝожлык пӧлын ортчо,
нош сюлмаз шумпотонэн улӥсь муртлы ялан праздник.
16Трос узырлык люкаса но со понна куалекъяса улытозь,
эсьмаса, ӧжыт узырлык люкалод но
Кузё-Инмарлэсь кышканэн улод.
17Куайытэм ош сӥлен куно карон вӧзын
синазькыль каронэз вань ке,
эсьмаса, одӥг тэркы вож емышен куно мед карозы,
но вӧзаз яратонэз мед луоз.
18Керӟегъяськись адями керетон поттэ,
нош чидась мурт керетонэз чусомытэ.
19Азьтэм муртлэн сюресэз бышкись будослэсь кутэм кенер кадь,
нош шонер улӥсьёслэн сюрессы ӵошкыт луэ.
20Визьлыко пи атайзэ шумпоттэ,
нош укылтэм адями аслэсьтыз анайзэ кулэтэм каре.
21Укылтэмъяськон визьмыз вакчи муртлы шумпотон сётэ,
нош визьнодо адями шонер сюрес кузя мынэ.
22Визь-кенештэк мытэм уж куашка,
нош визь-кенеш сётӥсьёс трос ке, со уж быдэсме.
23Кылыныз-ымыныз шонер ответ сётыкуз, адями шумпотэ,
нош макем умой ас дыраз верам кыл!
24Адлэн пыдэсаз сюронлэсь утиськон понна
визьлыко муртлэн улон сюресэз вылэ тубе.
25Возьытэз тодӥсьтэмъёслэсь юртсэс Кузё-Инмар таркалоз,
нош палкышнолэн музъем люкетэзлэсь межазэ-йыранзэ юнматоз.
26Лек муртъёслэн малпанзы Кузё-Инмар азьын юрӟым адӟиське,
нош дун-шектэм улӥсьёслэн кылъёссы Солы ярамонэсь.
27Барыш люкась муртлэн юртэз пазьгиськоз,
нош барышез синазькыль карись кема улоз.
28Шонер улӥсь сюлмыныз малпаськыса вераське,
нош сьӧлыклэсь кышкасьтэмъёслэн ымзы уродэз-лекез кисьтэ.
[Кузё-Инмар азьын шонер улӥсьёслэн сюресъёссы
шумпотон вайисесь;
соос пыр тушмонъёс но эшъёс луыны быгато.]
29Сьӧлыклэсь кышкасьтэмъёслэсь Кузё-Инмар палэнске,
нош шонер улӥсьлэсь вӧсяськемзэ Со кылэ.
30Чылкыт синмын шоре учко ке, сюлэм шумпотэ,
ӟеч ивор лыосты юнматэ.
31Улэп улонэ валтӥсь дышетонэз сак кылзӥсь пель
визьлыкоос пӧлын улэ.
32Визьмамез-нодъямез кулэтэм карись мурт
лулзэ утён сярысь уг сюлмаськы;
сьӧлыкъёссэ-шекъёссэ шарае поттэмез кабыл басьтӥсь мурт
визьлык люка.
33Кузё-Инмарлэсь кышкан визьлыклы дышетэ,
зӥбыт-востэм улон данлык вае.
Глава 15
